រាជធានីភ្នំពេញ៖ បើតាមសេចក្តីរាយការណ៍បន្ថែមបានឲ្យដឹងថា ផ្ទះចំនួន១៦ខ្នងដែលត្រូវបានអគ្គិភ័យឆាបឆេះអស់ទាំងស្រុង គឺមកពីម្ចាស់ផ្ទះធ្វេសប្រហែលកម្តៅសម្លទុកចោល បង្កឱ្យមានអគ្គិភ័យឆាបឆេះសន្ធោសន្ធៅផ្អើលអស់រាជធានីភ្នំពេញ ហេតុការណ៍នេះកើតឡើងកាលពីល្ងាចថ្ងៃទី១៥ មករា ស្ថិតក្បែរផ្សារបឹងឈូក ក្រុម១០ ក្នុងភូមិបូរីកម្មករ…
រាជធានីភ្នំពេញ៖ បើតាមសេចក្តីរាយការណ៍បន្ថែមបានឲ្យដឹងថា ផ្ទះចំនួន១៦ខ្នងដែលត្រូវបានអគ្គិភ័យឆាបឆេះអស់ទាំងស្រុង គឺមកពីម្ចាស់ផ្ទះធ្វេសប្រហែលកម្តៅសម្លទុកចោល បង្កឱ្យមានអគ្គិភ័យឆាបឆេះសន្ធោសន្ធៅផ្អើលអស់រាជធានីភ្នំពេញ ហេតុការណ៍នេះកើតឡើងកាលពីល្ងាចថ្ងៃទី១៥ មករា ស្ថិតក្បែរផ្សារបឹងឈូក ក្រុម១០ ក្នុងភូមិបូរីកម្មករ (អតីតត្រពាំងឈូក) សង្កាត់ទឹកថ្លា ខណ្ឌសែនសុខ ។
សេចក្តីរាយការណ៍បានបន្តថា ម្ចាស់ផ្ទះឈ្មោះ គង់ សារ៉ាត់ អាយុ៤១ឆ្នាំ (ប្តី) ចំណែកប្រពន្ធឈ្មោះគីម ហេង អាយុ៣៥ឆ្នាំ មុខរបរលក់ត្រី រស់នៅភូមិឃុំកើតហេតុខាងលើ ដែលផ្ទះនោះខាងក្រោមធ្វើពីថ្ម ខាងលើធ្វើពីឈើ ។
សមត្ថកិច្ចបានឲ្យដឹងថា មូលហេតុដែលបណ្តាលឲ្យមានការឆាបឆេះផ្ទះប្រជាពលរដ្ឋអស់ចំនួន១៦ខ្នងនេះ គឺបណ្តាលមកពីម្ចាស់ផ្ទះបង្កហេតុបានកម្តៅសម្ល រួចចាក់សោទុកចោល ហើយនាំគ្នាទៅដើរលេងនៅកោះពេជ្របាត់ ដែលបង្កឲ្យមានការឆាបឆេះអគ្គិភ័យនេះកើតឡើងយ៉ាងសន្ធោសន្ធៅធ្វើឲ្យផ្អើលអស់រាជធានីភ្នំពេញ ។
បច្ចុប្បន្ននេះអនុសាខាកាកបាទក្រហមខណ្ឌសែនសុខ បាននាំយកអំណោយទៅចែកជូនបងប្អូនប្រជាពលដ្ឋដែលរងគ្រោះដោយសារអគ្គិភ័យខាងលើនេះ ។
គួររំលឹកថា លំនៅឋាន១៦ខ្នង ក្នុងនោះមាន១៤ខ្នងជាផ្ទះឈើ និងមួយខ្នងជាផ្ទះថ្ម ត្រូវបាន អគ្គិភ័យលេបត្របាក់ហ្មត់ទាំងស្រុង ហេតុការណ៍នេះបង្កឱ្យមានការផ្អើលកាលពីវេលាម៉ោង១៧និង៣០នាទីល្ងាច ថ្ងៃទី១៥ ខែមករា ឆ្នាំ២០១៨ ស្ថិតក្បែរផ្សារបឹងឈូក ក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ ។
លំនៅឋាននេះសុទ្ធសឹងជាសំណង់សាងសង់ឡើងពីឈើប្រក់សង្ក័សី ហើយសង់ជាប់គ្នាយ៉ាងរដឹកតែម្តង ។ ហើយមុនដំបូងគេលឺសូរសម្លេងផ្ទុះចេញពីលំនៅឋានមួយក្នុងចំណោមលំនៅឋានជាច្រើន លុះមួយសន្ទុះក្រោយមកស្រាប់តែមានជាអណ្តាតភ្លើងលាយឡំជាមួយផ្សែងខ្មួយខ្មាញ់ហ៊ុយឡើងឆាបឆេះរាលដាលលំនៅបន្តបន្ទាប់រហូតដល់អស់១៦ខ្នងតែម្តង ។
ភ្លាមៗនោះបងប្អូនប្រជាពលរដ្ឋ ខ្លះនាំគ្នាជួយពន្លត់ និងខ្លះទៀត នាំគ្នាប្រមែប្រមូលអីវ៉ាន់ និងសម្ភារចេញពីលំនៅឋាន ក្រែងអណ្តាតភ្លើងឆាបឆេះដល់លំនៅឋានរបស់ខ្លួន ។ ចំណែកឯកម្លាំងអាជ្ញាធរចម្រុះមានអាជ្ញាធរសង្កាត់ខណ្ឌ កម្លាំងនគរបាល និងកម្លាំងអាវុធហត្ថ រួមជាមួយរថយន្តពន្លត់អគ្គិភ័យជាច្រើនគ្រឿងបានចុះអន្តរាគមន៍ដល់កន្លែងកើតហេតុ ដើម្បីបាញ់ទឹកទប់ស្កាត់អណ្តាតភ្លើង រហូតដល់ម៉ោង១០យប់ថ្ងៃដដែល ទើបរលត់ទាំងស្រុង ៕
ចែករំលែកព័តមាននេះ