រាជធានីភ្នំពេញ ៖ កាលពីព្រឹកថ្ងៃទី២ មីនា ២០១១ ប្រធានចៅក្រមជំនុំជម្រះនៃតុលាការកំពូលគឺលោកខឹម ប៉ុន បានប្រកាសសាលដីកាដោះលែងជនជាប់ចោទឈ្មោះថាច់ សាវ៉េត ហៅជា សុភ័ក្រ ដែលជាប់ចោទពីបទសម្លាប់ប្រធានសហជីពឈ្មោះរស់ សុវណ្ណារ៉េត ឱ្យនៅក្រៅឃុំបណ្តោះអាសន្ន ។ ការប្រកាសឱ្យស្ថិតនៅក្រៅឃុំជាបណ្តោះអាសន្ននេះបានធ្វើឡើងក្រោយថាច់ សាវ៉េត ជាប់ឃុំឃាំងអស់រយៈពេល៧ឆ្នាំនៅពន្ធនាគារព្រៃស ។
ជនជាប់ចោទត្រូវបានចោទប្រកាន់ពីបទព្រហ្មទណ្ឌក្នុងករណីមនុស្សឃាតលើឈ្មោះរស់ សុវណ្ណារ៉េត ប្រធានសហជីពកម្មករនៅក្រុមហ៊ុនកាត់ដេរកុមារាទុហ្គា កាលពីឆ្នាំ២០០៤ ។ លោកចៅក្រមក៏បានបញ្ជាឱ្យសាលាឧទ្ធរណ៍ស៊ើបអង្កេត និងធ្វើការជំនុំជម្រះឡើងវិញ ។ អ្នកស្រីឃួន ផល្លី ម្តាយជនជាប់ចោទបាននិយាយថា គាត់សប្បាយរីករាយណាស់នៅពេលដែលកូនរបស់គាត់ត្រូវបានដោះលែងឱ្យមានសេរីភាពបន្ទាប់ពីឃុំខ្លួនរយៈពេល៧ឆ្នាំយ៉ាងអយុត្តិធម៌ ។ អ្នកស្រីបន្តថា គេបានចាប់កូនគាត់ដាក់គុកដោយចោទពីបទសម្លាប់មនុស្ស តែកូនគាត់មិនបានសម្លាប់មនុស្សដូចការចោទប្រកាន់ទេ ។
មេធាវីជនជាប់ចោទបានថ្លែងថា កូនក្តីរបស់លោកអាចត្រូវដោះលែងនៅពេលណាសាលដីកាដោះលែងត្រូវបានបញ្ជូនដល់ពន្ធនាគារ ។ គួររំលឹកថា កាលពីឆ្នាំ២០០៤ បន្ទាប់ពីលោកជា វិជ្ជា ប្រធានសហជីពសេរីកម្មករនៃព្រះរាជាណាចក្រកម្ពុជា ត្រូវបានឃាតកបាញ់សម្លាប់នោះ ក្រោយពេលគ្នាបន្តិចបន្តួចនេះ លោករស់ សុវណ្ណារ៉េត ក៏ត្រូវបានឃាតកបាញ់សម្លាប់ដែរ នៅតាមផ្លូវសហព័ន្ធរុស្ស៊ី ហើយអាជ្ញាធរប៉ូលិសចាប់ខ្លួនជនជាប់ចោទគឺឈ្មោះថាច់ សាវ៉េត ហៅជា សុភ័ក្រ ៕
ចែករំលែកព័តមាននេះ