ពលរដ្ឋក្រីក្រ១គ្រួសារ បានទទួលអំណោយពីសប្បុរសជន
- បាត់ដំបង
ខេត្តបាត់ដំបង ៖ នៅសៀលថ្ងៃច័ន្ទ ១៤រោច ខែបុស្ស ឆ្នាំរកា នព្វស័ក ពុទ្ធសករាជ២៥៦១ ត្រូវនឹងថ្ងៃទី១៥ ខែមករា…
ខេត្តបាត់ដំបង ៖ នៅសៀលថ្ងៃច័ន្ទ ១៤រោច ខែបុស្ស ឆ្នាំរកា នព្វស័ក ពុទ្ធសករាជ២៥៦១ ត្រូវនឹងថ្ងៃទី១៥ ខែមករា ឆ្នាំ២០១៨ លោកឧត្តមសេនីយ៍ទោ ឯក សំអូន ប្រធានក្រុមការងារចុះជួយ សង្កាត់រតនៈ បានប្រគល់ផ្ទះមួយខ្នងទំហំ ៤គុណនឹង៦ម៉ែត្រ ធ្វើពីដែកប្រក់សង្ក័សី ជាអំណោយរបស់លោក ឡុង ផលគុណ និងអ្នកស្រី សួន វណ្ណនេ ជូនប្រជាពលរដ្ឋ ដែលជួបការលំបាកខ្វះខាតក្នុងជីវភាព ក្នុងការរស់នៅដែលមានឈ្មោះ ឌុច យ៉ាំ អាយុ៧៣ឆ្នាំ រស់នៅ២នាក់ប្រពន្ធអាយុ៧១ឆ្នាំ ដែលរស់ នៅភូមិរំចេក៥ សង្កាត់រតនៈ ក្រុង ខេត្តបាត់ដំបង។
លោកឧត្តមសេនីយ៍ទោបានបញ្ជាក់ថា ជារៀងរាល់ឆ្នាំ យើងតែងតែពិនិត្យមើលជាប្រចាំរបស់បងប្អូនប្រជាពលរដ្ឋរស់នៅក្នុងសង្កាត់រតនៈ និងចុះជួយជាបន្តបន្ទាប់នៅពេលដែលគាត់ជួបការលំបាកខ្លាំង ហើយរស់នៅស្ថិតនៅក្នុងការលំបាកទាំងការស្នាក់នៅ និងផ្លូវត្រូវចូលដែលគ្មានផ្តល់ភាពងាយស្រួលដល់បងប្អូនចេញចូលជារៀងរាល់ថ្ងៃឡើយ ។
ហើយក្នុងពេលនេះបានប្រគល់ផ្ទះនេះដែលជាអំណោយសប្បុរសជនមានលោក ឡុង ផលគុណ ប្រធានមន្ទីរធនធានទឹកបានជួយកសាងផ្ទះនេះដោយចំណាយថវិកាអស់ចំនួន២៥០០ដុល្លារ ចាក់ដីធ្វើផ្លូវចូលអស់ចំនួន៤៥០ដុល្លារ រៀបចំបណ្តាញតទឹកប្រើប្រាស់ ព្រមទាំងមានសប្បុរសជនដែលបានឃើញផ្ទាល់ជួយទិញសម្ភារបន្ថែមទៀតមានអង្ករ២ការ៉ុង ទឹកត្រី១យួរ ទឹកស៊ីអ៊ីវ១យួរ ប៊ីចេង១កញ្ចប់ ទឹកសុទ្ធ១កេះ និងថវិកាចំនួន២០ម៉ឺនរៀលដល់ម្ចាស់ផ្ទះបន្ថែមទៀត។ និងជួយផ្តល់ថវិកាដល់បងប្អូនជួបការលំបាកចំនួន៤គ្រួសារ នៅជិតនោះដោយក្នុងម្នាក់ទទួលបានថវិកា១០ម៉ឺនរៀលបន្ថែមទៀត ហើយត្រៀមបន្តជួយបងប្អូនជួបការលំបាកជាបន្តបន្ទាប់ទៀតដែលក្រុមការងារកំពុងរៀបចំបន្តទៅថ្ងៃខាងមុខ៕
ចែករំលែកព័តមាននេះ