សារព័ត៌មានក្រុងមូស្គូ ប្រទេសរុស្ស៊ីកាលពីថ្ងៃទី១១ មករា ២០១៨ ផ្សាយថាបុរសម្នាក់បានចូលក្នុងផ្សារទំនើបដោយបើករថក្រោះមួយគ្រឿងពីទីលានហ្វឹកហាត់យ៉ាងលឿនកាត់ព្រៃ និងចូលទៅផ្សារទំនើបមួយក្នុងក្រុងអាប៉ាទីទី ភាគខាងជើង ប្រទេសរុស្ស៊ី រួចលួចយកស្រាមួយដប ។
តាមការបញ្ជាក់របស់សាក្សីនៅកន្លែងកើតហេតុឱ្យដឹងថា បុរសរូបនោះព្យាយាមបត់រថក្រោះនៅលើផ្លូវដ៏ចង្អៀតដោយរូបគេមានអាការស្រវឹងជោកទើបធ្វើឱ្យរថក្រោះទៅបុកបង្អួចរបស់ហាងផ្សារទំនើប«Family»រួចទៅបុករថយន្តមួយគ្រឿងទៀតដែលចតស្ងៀម ។
បុរសបង្កហេតុបានងើបចេញពីរថក្រោះតាមទ្វារខាងលើ រួចត្រួតពិនិត្យការខូចខាតតិចតួចត្រង់កន្លែងកើតហេតុ ក្រោយមកចូលតាមបង្អួចផ្សារទំនើបលួចស្រាមួយដប ។
ក្រោយមកបុរសនោះត្រូវចាប់ខ្លួនរួមជាមួយវត្ថុតាងស្រាមួយដប ។ តាមធម្មតាខាងផ្សារទំនើបមិនអាចលក់ភេសជ្ជៈមានជាតិអាល់កុលនៅពេលព្រឹកបានទេ ។
«RIA»បានផ្សាយថា បុរសបង្កហេតុមានអាយុប្រហែល២០ឆ្នាំ និងមិនបានរារាំងការចាប់ខ្លួនទេ ។
ចាត់ទុកថាជារឿងដ៏ចម្លែកមួយកម្រកើតមាននៅលើពិភពលោកដែលបុរសម្នាក់បើករថក្រោះបុកផ្សារទំនើប និងចូលទៅលួចស្រាមួយដប ៕
ចែករំលែកព័តមាននេះ