ក្មេងប្រុសជនជាតិចិនម្នាក់បានដើរកាត់ព្រិលទៅសាលាក្រោមអាកាសធាតុត្រជាក់-៩អង្សាសេ ធ្វើឱ្យសក់ និងចិញ្ចើមជាប់កំណកព្រិល។ ឃើញបែបនោះមិត្តិភក្តិក្នុងថ្នាក់រៀននាំគ្នាសើចសប្បាយ ។ រូបភាពនោះថតនៅសាលាមួយក្នុងក្រុងលូតៀន ភាគខាងកើតឆៀងខាងជើងខេត្តយូណានកាលពីថ្ងៃទី៨ មករា ២០១៨ ។
នាយិកាសាលាបញ្ជាក់ថា ក្មេងប្រុសវាំង ហ្វូម៉ាន់ អាយុ៨ឆ្នាំ រស់នៅជាមួយបងស្រីនៅឆ្ងាយពីសាលាប្រហែល៤,៥គីឡូម៉ែត្រ និងដោយសារឪពុកធ្វើការនៅឆ្ងាយពីផ្ទះតម្រូវឱ្យរូបគេត្រូវដើរទៅសាលារៀនជារៀងរាល់ថ្ងៃ ។
ស្របពេលជាមួយគ្នានេះក៏ជាថ្ងៃដំបូងនៃការប្រឡង ខណៈពេលសីតុណ្ហភាពធ្លាក់ចុះ-៩អង្សាសេ ហើយក្មេងប្រុសបានបង្ហាញឱ្យឃើញពិន្ទុប្រឡងបានដល់ទៅ៩៩ពិន្ទុឯណោះបង្កើតការពេញចិត្តដល់អ្នកលេងអ៊ីនធើរណេត ។
រំលងបានមួយថ្ងៃបន្ទាប់ពីព័ត៌មានបានលេចឮក្មេងប្រុសដែលមានរហស្សនាមថាជា «ក្មេងទឹកកក» ក្លាយជាមនុស្សល្បី ដោយមានអ្នកកាសែតច្រើននាក់ទៅដល់ផ្ទះ ។
ឪពុករបស់កុមារនោះបានបម្រើការងារជាកម្មករមានចំណូលប្រហែល៤៥០ដុល្លារ អាចត្រឡប់ទៅផ្ទះបានក្នុងអំឡុង៤ទៅ៥ដងក្នុងមួយខែ ។ ចំណែកម្តាយបានឈប់ពីការងារ និងបានចាកចេញពីក្រុមគ្រួសារ ខណៈពេលក្មេងប្រុសវាំងបញ្ជាក់ថា គេមានក្តីស្រមៃចង់ក្លាយជាប៉ូលិស ។ នៅក្នុងឆ្នាំថ្មីនេះរូបគេចង់ចូលរៀន និងរកប្រាក់ទិញថ្នាំព្យាបាលលោកយាយដែលឈឺថ្កាត់ ។
ក្មេងប្រុសវាំងនិយាយថា ទៅសាលារងាណាស់ ប៉ុន្តែមិនពីបាកទេ គឺជារឿងងាយស្រួលសម្រាប់រូបគេ ៕
ចែករំលែកព័តមាននេះ