រាជធានីភ្នំពេញ ៖ ការប្រកួតប្រដាល់កាលពីថ្ងៃទី ១៣ មករា នៅសង្វៀនប៉ុស្តិ៍លេខ៥ព្រែកកំពិស កីឡាករ សៅ វណ្ណា បានក្លាយជាម្ចាស់ពានជើងឯកដែលទទួលបានប្រាក់រង្វាន់៤ពាន់ដុល្លារគួរឱ្យសរសើរ…
រាជធានីភ្នំពេញ ៖ ការប្រកួតប្រដាល់កាលពីថ្ងៃទី ១៣ មករា នៅសង្វៀនប៉ុស្តិ៍លេខ៥ព្រែកកំពិស កីឡាករ សៅ វណ្ណា បានក្លាយជាម្ចាស់ពានជើងឯកដែលទទួលបានប្រាក់រង្វាន់៤ពាន់ដុល្លារគួរឱ្យសរសើរ បើទោះជាគូប្រកួតរបស់គេគឺជាកីឡាករល្អម្នាក់ ។
យ៉ាងណាមិញ លោកថា ទម្រាំតែទទួលបានពាន និងទឹកប្រាក់យ៉ាងសន្ធឹកនេះ គឺលោកបានសម្រេចចិត្តចោលប្រពន្ធ ចោលកូន១០ថ្ងៃពេញតែម្ដង ព្រោះតែមិនចង់ឈ្នះដោយចៃដន្យដូចមុន ។
គ្មានអ្នកណាមិនដឹងនោះទេថា កីឡាករ សៅ វណ្ណា បានឡើងវគ្គ៤នាក់ និងបានឈ្នះក្នុងវគ្គ៤នាក់ឡើងទៅវគ្គផ្ដាច់ព្រ័ត្រដោយសារតែភាពហេងស៊យប៉ុណ្ណោះ ។ លោកធ្លាប់សារភាពថា មុនពេលប្រកួតជម្រុះយក៤នាក់១ថ្ងៃ ប្រពន្ធលោកកើតកូនប្រុសដំបូងនៅក្នុងជីវិត ដោយលោកអត់មានលទ្ធភាពធ្វើការហ្វឹកហាត់នោះទេ គឺបានឆ្លៀតហាត់តែប៉ុន្មានម៉ោងក្នុងមួយថ្ងៃមុនប្រកួតតែប៉ុណ្ណោះ តែនៅពេលលោកឡើងប្រកួតក៏បានទទួលជ័យជម្នះ ។
ឈានដល់ការប្រកួតក្នុងវគ្គជម្រើស២នាក់ទៅកាន់វគ្គផ្ដាច់ព្រ័ត្រ លោកក៏អត់បានហ្វឹកហាត់ដូចមុនដែរដោយសារតែកូនតូចរបស់លោកមានជំងឺក្ដៅខ្លួនព្យាបាលនៅផ្ទះមិនបាន ហើយតម្រូវឱ្យលោកត្រូវយកទៅពេទ្យ ដោយលោក និងភរិយាត្រូវតែរវល់ក្នុងការមើលថែ ។ យ៉ាងណាក៏ដោយលោកនៅតែបន្តឈ្នះទៀត ដោយលោកបានទាំងចាត់ទុកថាជ័យជម្នះទាំង២លើកនោះ ជាលទ្ធផលខ្មោចឱ្យ និងថាដោយសារតែបានកម្លាំងចិត្តពីប្រពន្ធ និងកូននោះផង ។ សម្រាប់ការប្រកួតនៅវគ្គចុងក្រោយនោះវិញ កីឡាកររូបនេះបានអះអាងថា អត់បានប្រើការផ្សងព្រេងដូចមុនទៀតទេ ដោយសារតែលោកតាំងចិត្តហ្វឹកហាត់ និងសម្រេចចិត្តចោលប្រពន្ធចោលកូនរហូតដល់១០ថ្ងៃពេញតែម្ដង ដើម្បីធ្វើការហ្វឹកហាត់ ។
លោកថា ក្នុងរយៈពេល១០ថ្ងៃមុនពេលឡើងរេញលោកអត់បានប្រើតួនាទីជាឪពុក និងជាស្វាមីមើលការខុសត្រូវក្នុងគ្រួសារនោះទេ គឺដឹងតែព្រលឹមបាត់ព្រលប់ចូល ហើយបង្ហាញខ្លួនតែនៅកន្លែងហ្វឹកហាត់តែម្ដង ដោយសារតែលោកមិនចង់បរាជ័យ ។ លោកថា ការប្រកួតលើកនេះ គឺលោកឡើងរេញដោយភាពជឿជាក់ ដោយលោកបានសុំភរិយាបែករយៈពេល១០ថ្ងៃហើយគាត់ក៏យល់ព្រមដោយពេញចិត្តនោះផង ។
លោកថា ទឹកប្រាក់៤ពាន់ដុល្លារមានតម្លៃសម្រាប់ជីវិតរបស់លោកខ្លាំងណាស់ ទើបលោកសម្រេចចិត្តចោលភារៈជាឪពុក និងជាស្វាមី ហើយសម្ងំនៅតែកន្លែងហ្វឹកហាត់ ដោយងើបហាត់រត់ផង និងហាត់វ៉ៃផងយ៉ាងទៀងទាត់។
លោកកាន់តែសប្បាយចិត្ត និងមានមោទនភាព បន្ទាប់ពីការសម្រេចចិត្តចោលកូនចោលភរិយារបស់លោកពេញរយៈពេល១០ថ្ងៃ ទទួលបានជោគជ័យតាមការគ្រោងទុក ដោយធ្វើឱ្យលោកទទួលបានពានជើងឯកមួយ និងទឹកប្រាក់៤ពាន់ដុល្លារ ដែលនេះជាគឺជាលទ្ធផលដ៏វិជ្ជមាននៅក្នុងជីវិតរបស់លោក ចាប់តាំងពីបានប្រឡូកនៅក្នុងអាជីពប្រដាល់។
លោក សេង កដិកា អ្នករៀបចំការប្រកួតប្រចាំប៉ុស្ដិ៍លេខ៥ បានអះអាងថា នេះជាការប្រកួតដណ្ដើមជើងឯកវ័យក្មេងដែលស្ថាប័នរបស់លោកបានរៀបចំឡើងច្រើនខែមកហើយ ដោយមានកីឡាករមកពីគ្រប់ក្លិបទូទាំងប្រទេសរហូតដល់៣២រូបប៉ះគ្នាលើរេញ។ រូបមន្តក្នុងការប្រកួតលោកថាគឺនៅតែរក្សាដដែលដូចគ្នានឹងការប្រកួតជើងឯករបស់ប៉ុស្ដិ៍លេខ៥មុនដែរ ដោយតម្រូវឱ្យកីឡាករក្នុងប្រភេទទម្ងន់ដូចគ្នាមកពីគ្រប់ក្លិបទូទាំងប្រទេសទាំង៣២រូបចាប់គូប្រកួតគ្នា ហើយប្រកួតជម្រុះចាញ់ធ្លាក់ៗរហូតស្វែងរកបានតែ៤នាក់ចុងក្រោយឱ្យប្រកួតយកចំណាត់ថ្នាក់ ។
លោក សេង កដិកា បញ្ជាក់ថា កីឡាករ សៅ វណ្ណា ដែលទទួលបានចំណាត់ថ្នាក់លេខ១ ទទួលបានទឹកប្រាក់៤ពាន់ដុល្លារ និងពានជើងឯក១ កីឡាករ អ៊ុំ វណ្ណេត ចំណាត់ថ្នាក់លេខ២ ទទួលបានពានកិត្តិយស១ និងទឹកប្រាក់២០០០ដុល្លារ ។ កីឡាករ គឹម វាសនា មកពីក្លិបកងទ័ពឆត្រយោង៩១១ ចំណាត់ថ្នាក់លេខ៣ ទទួលបានពានកិត្តិយស១ និងទឹកប្រាក់៧៥០ដុល្លារ និងកីឡាករ ង៉ែត្រ រដ្ឋា មកពីក្លិបតាព្រហ្មមានជ័យ ចំណាត់ថ្នាក់លេខ៤ ទទួលបានទឹកប្រាក់៥០០ដុល្លារ ៕
ចែករំលែកព័តមាននេះ