រាជធានីភ្នំពេញ ៖ រថយន្តសណ្ដោងកន្ទុយរ៉ឺម៉កដឹកស៊ីម៉ងត៍ បានបើកបរក្នុងល្បឿនយ៉ាងលឿននៅទីប្រជុំជន និងចំណុចផ្លូវខ្វែងរង្វង់មូលថ្នល់បំបែកចោមចៅ ។ បន្ទាប់មកបានជ្រុលទៅបុករះម៉ូតូ និងរ៉ឺម៉កម៉ូតូកង់បីជាច្រើនគ្រឿង បណ្ដាលឲ្យនគរបាលប្រចាំការនៅជិតនោះម្នាក់រងរបួសធ្ងន់បាក់ដៃម្ខាង ។…
រាជធានីភ្នំពេញ ៖ រថយន្តសណ្ដោងកន្ទុយរ៉ឺម៉កដឹកស៊ីម៉ងត៍ បានបើកបរក្នុងល្បឿនយ៉ាងលឿននៅទីប្រជុំជន និងចំណុចផ្លូវខ្វែងរង្វង់មូលថ្នល់បំបែកចោមចៅ ។ បន្ទាប់មកបានជ្រុលទៅបុករះម៉ូតូ និងរ៉ឺម៉កម៉ូតូកង់បីជាច្រើនគ្រឿង បណ្ដាលឲ្យនគរបាលប្រចាំការនៅជិតនោះម្នាក់រងរបួសធ្ងន់បាក់ដៃម្ខាង ។
បន្ទាប់មកអ្នកបើកបររថយន្តនោះ ត្រូវបាននគរបាលឃាត់ខ្លួនបាននាំទៅសាកសួរ ហើយជននេះឆ្លើយថា រថយន្តហ្វ្រាំងអត់ស៊ី ទើបជាន់អត់ជាប់ ហើយបើដូច្នេះមែននេះជាការធ្វេសប្រហែសយ៉ាងធំបំផុតរបស់ក្រុមហ៊ុន និងអ្នកបើកបរផ្ទាល់ ។ ដែលគ្មានការត្រួតពិនិត្យរថយន្តឲ្យបានមត់ចត់ បណ្ដែតបណ្ដោយឲ្យមានគ្រោះថ្នាក់បែបនេះកើតឡើង ឬឯមន្ត្រីនគរបាលរងគ្រោះខាងលើសំណាងណាស់ដែលខ្ទាតចេញពីក្រោមកង់រថយន្ត ។
ហេតុការណ៍នេះបានកើតឡើងកាលពីវេលាម៉ោង១១និង៣០នាទីថ្ងៃត្រង់ ថ្ងៃទី១៣ ខែមករា ឆ្នាំ២០១៨ នៅលើកំណាត់ផ្លូវវ៉េងស្រេង ត្រង់ចំណុចរង្វង់មូលថ្នល់បំបែកចោមចៅ៣ ស្ថិតនៅក្នុងភូមិព្រៃជីសាក់ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
បុរសរងគ្រោះឈ្មោះ សូ សំអូន អាយុ៣៤ឆ្នាំ ជាមន្ត្រីនគរបាលខណ្ឌពោធិ៍សែនជ័យ មានទីលំនៅក្នុងភូមិក្រាំងដូនទៃ សង្កាត់ចោមចៅទី២ ខណ្ឌពោធិ៍សែនជ័យ ។ ជិះម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០០៨ ពណ៌ខ្មៅ មានស្លាកលេខដែរ ប៉ុន្តែអត់ចាំព្រោះត្រូវរថយន្តកិនដាច់បាត់ ។
ជនរងគ្រោះត្រូវបានរថយន្តសង្គ្រោះអង្គភាព៧១១ កងពលតូចលេខ៧០ដឹកទៅសង្គ្រោះបន្ទាន់ភ្លាមៗដែរ ។ ចំណែករថយន្តបង្ក ពណ៍ក្រហម ពាក់ស្លាកលេខកំពង់ធំ 3A-១៤៤៦ បើកបរដោយបុរសម្នាក់ឈ្មោះ យ៉ែម សំណាង អាយុ៣១ឆ្នាំ មានទីលំនៅក្នុងភូមិសាំងស្រឡៅ ឃុំតាំងខ្យា ស្រុកភ្នំស្រួច ខេត្តកំពង់ស្ពឺ ។ បានបុករះម៉ូតមន្ត្រីនគរបាលខាងលើ រួមជាមួយរ៉ឺម៉កម៉ូតូកង់បី២គ្រឿង បណ្ដាលឲ្យមន្ត្រីនគរបាលខាងលើរងរបួសបាក់ដៃម្ខាងយ៉ាងដំណំ ។
តាមប្រភពព័ត៌មានបានឲ្យដឹងថា នៅមុនពេលកើតហេតុខាងលើ មន្ត្រីនគរបាលរងគ្រោះបានជិះម៉ូតូធ្វើដំណើរក្នុងទិសដៅពីត្បូងទៅជើង លុះពេលទៅដល់ត្រង់ចំណុចកើតហេតុ ដែលជាចំណុចផ្លូវខ្វែង និងជារង្វង់មូលផង ។ ជនរងគ្រោះបានឈប់រង់ចាំអាទិ៍ភាពផ្លូវក្នុងទិសដៅពីលិចទៅកើតទៅផុតសិន ហើយខណៈនោះក៏មានម៉ូតូ និងរ៉ឺម៉កម៉ូតូកង់បី ព្រមទាំងរថយន្តជាច្រើនគ្រឿងឈប់ត្រៀបត្រាជិតនោះដែរ ។
ប្រភពដដែលបានបន្តទៀតថា លុះបន្តិចក្រោយមក ស្រាប់តែឃើញរថយន្តបង្កខាងលើបើកបរក្នុងល្បឿនលឿនក្នុងទិសដៅស្របគ្នាពីត្បូងទៅជើងដែរ ។ ពេលនោះរថយន្តមិនបានជាន់ហ្វ្រាំងឈប់ទេ ក៏បានជ្រុលទៅបុករះម៉ូតូជនរងគ្រោះពីក្រោយ បណ្ដាលឲ្យមន្ត្រីនគរបាលខាងលើខ្ទាតចូលទៅចំកណ្ដាលរថយន្ត ខុសកង់រថយន្តរងរបួសបាក់ដៃធ្ងន់ធ្ងរ ។
ចំណែកម៉ូតូជាប់ក្រោមកង់រថយន្ត ខ្ទេចទាំងស្រុង ហើយរថយន្តបង្កបានបន្តអូសម៉ូតូជ្រុលទៅបុករ៉ីម៉កម៉ូតកង់បី២គ្រឿងជាបន្តបន្ទាប់ទៀត រួចទើបឈប់ស្ងៀម ។ ប្រភពខាងលើបានបន្តថា បន្ទាប់មកអ្នកបើកបររថយន្តប្រុងរត់គេចខ្លួន ប៉ុន្តែត្រូវបាននគរបាលចរាចរណ៍ផ្លូវគោក នៃស្នងការដ្ឋានរាជធានីភ្នំពេញ ចាប់ខ្លួនបាននាំយកទៅសួរនាំនៅប៉ុស្ដិ៍ចោមចៅ៣ ។
ពេលនោះអ្នកបើកបររថយន្តនេះ និយាយាថា រថយន្តនោះហ្វ្រាំងអត់ស៊ី ទើបបុកជាបន្តបន្ទាប់បែបនេះ ប៉ុន្តែត្រូវបាននគរបាលថា ជាការដោះសារយករួចខ្លួនតែប៉ុណ្ណោះ ។ ប្រសិនបើហ្វ្រាំងរថយន្តអត់ស៊ីបែបនេះមែននោះ វាគឺជាកំហុស និងការធ្វេសប្រហែសរបស់ក្រុមហ៊ុន ដែលមិនបានរៀបចំ ឬពិនិត្យឲ្យបានច្បាស់ និងត្រឹមត្រូវមុននឹងចេញដំណើរ ទើបបង្កឲ្យមានគ្រោះថ្នាក់កើតឡើងបែបនេះ ៕
ចែករំលែកព័តមាននេះ