ខេត្តមណ្ឌលគិរី ៖ មន្ត្រីជំនាញបានរកឃើញស្ថានីយចាក់ប្រេងសាំងចំនួនបីក្នុងក្រុងសែនមនោរម្យ បាននឹងកំពុងលក់កេងចំណេញលើអតិថិជន ដែលការរកឃើញនេះ ធ្វើឡើងក្នុងប្រតិបត្តិការដឹកនាំដោយ លោក ចាន់ វាសនា ប្រធានសាខាកាំកុងត្រួលខេត្តមណ្ឌលគិរី សហការណ៍ជាមួយមន្ត្រីមន្ទីរពាណិជ្ជកម្មខេត្ត និងរថយន្តមន្ទីរ ពិសោធន៍ប្រេងឥន្ធនៈចល័តរបស់អគ្គនាយកដ្ឋានកាំកុងត្រួល បានចុះត្រួតពិនិត្យគុណភាព និងបរិមាណប្រេងឥន្ធនៈតាមស្ថានីយប្រេងទាំង៩ ក្នុងក្រុងសែនមនោរម្យ ខេត្តមណ្ឌលគិរី កាលពីថ្ងៃទី១២ ខែមករា ឆ្នាំ២០១៨ ។
លោក ចាន់ វាសនា ប្រធានសាខាកាំកុងត្រួលខេត្តមណ្ឌលគិរី បានឲ្យដឹងថា ការចុះត្រួតពិនិត្យគុណភាព និងបរិមាណប្រេងឥន្ធនៈ ធ្វើនៅតាមស្ថានីយទូទាំងប្រទេស ។ ជាក់ស្តែង ការចុះត្រួតពិនិត្យគុណភាពបរិមាណប្រេងឥន្ធនៈ និងដេប៉ូចែកចាយទាំង៩ស្ថានីយ នៅក្នុងក្រុងសែនមនោរម្យនាពេលនេះ ដោយប្រើប្រាស់រថយន្តពិសោធន៍ចល័តផ្នែកប្រេងឥន្ធនៈ របស់អគ្គនាយកដ្ឋានកាំកុងត្រួល ដែលបំពាក់ដោយឧបករណ៍វិភាគ និងឧបករណ៍រង្វាស់រង្វាល់ដែលធ្វើព្យាករសកម្មត្រឹមត្រូវ ដើម្បីធ្វើតេស្ត ចៀសវាងការក្លែងបន្លំ ។ ជាលទ្ធផលផ្នែកគុណភាព ប្រេងសាំងធម្មតា សាំងស៊ុបពែ ប្រេងម៉ាសូត គឺត្រូវត្រូវតាមស្តង់ដា ឬឯផ្នែកបរិមាណបាញ់ចេញពីទុយយោ មានស្ថានីយ៍ចំនួន៣ ដែលមានកម្រិតលំអៀងពី៣លីត្រទៅ៥លីត្រ ក្នុង១០០លីត្រ បាញ់ចេញ ។
ទន្ទឹមនឹងនោះដែរ សមត្ថកិច្ចជំនាញបានអប់រំណែនាំដល់ម្ចាស់ស្ថានីយប្រេងឥន្ធនៈទាំងនោះ ធ្វើកិច្ចសន្យាជាលើកទី១ ឲ្យកែប្រែឡើងវិញ ដោយទុកក្នុងរយៈពេល១ខែទៀត ខាងមន្ត្រីជំនាញនឹងចុះមកពិនិត្យម្តងទៀត តែបើឃើញមិនប្រក្រតីដដែល ម្ចាស់សា្ថនីយនោះនឹងត្រូវធ្វើការផាកពិន័យ ។
ជាមួយគ្នានេះដែរ លោក ចាន់ វាសនា ប្រធានសាខាកាំកុងត្រួលខេត្ត បានធ្វើការណែនាំដល់ម្ចាស់ស្ថានីយ៍ និងដេប៉ូចែកចាយទាំងអស់ ត្រូវពិនិត្យឡើងវិញនូវផ្នែកបរិមាណបាញ់ចេញពីទុយយោចៀសវាងការបន្លំ ដើម្បីធ្វើយ៉ាងណាឲ្យមានតម្លាភាព យុត្តិធម៌ រវាងអ្នកលក់ អ្នកចែកចាយ និងអ្នកប្រើប្រាស់ឲ្យកាន់តែមានទំនុកចិត្ត និងមានការគាំទ្រកាន់តែច្រើនឡើងពីមហាជនផងដែរ ៕
ចែករំលែកព័តមាននេះ