រាជធានីភ្នំពេញ ៖ បុរសម្នាក់បានស្លាប់ភ្លាមៗនៅនឹងកន្លែងទាំងក្បាលពាក់មួកសុវត្ថិភាព ដោយសារតែរថយន្តដឹកប្រេងសាំងមួយគ្រឿងបើកបុកពេញទំហឹងខណៈពេលដែលរូបគេកំពុងជិះម៉ូតូតែម្នាក់ឯង ។ ចំណែករថយន្តបង្កបន្ទាប់ពីបុកហើយបានបើករត់គេចទៅបាត់ស្រមោល ប៉ុន្តែប្រជាពលរដ្ឋដែលនៅជិតនោះបានស្គាល់ស្លាកលេខយ៉ាងច្បាស់ ជារបស់ក្រុមហ៊ុនប្រេងតេលា ។
ឧប្បត្តិហេតុគ្រោះថ្នាក់ចរាចរណ៍នោះបានកើតឡើងកាលពីវេលាម៉ោង២និង៤០នាទីរសៀលថ្ងៃទី១ ធ្នូ ២០១២ នៅលើកំណាត់ផ្លូវអូរដឹម កប់ស្រូវត្រង់ចំណុចភូមិកប់ស្រូវធំ សង្កាត់គោករកា ខណ្ឌពោធិ៍សែនជ័យ។
បុរសរងគ្រោះ ឈ្មោះហួន អីុម អាយុ២៥ឆ្នាំ រស់នៅក្នុងភូមិភ្នំទទឹង ឃុំជើងរាស់ ស្រុកឧដុង្គ ខេត្តកំពង់ស្ពឺ ជិះម៉ូតូម៉ាកឌ្រីមសេ១២៥ ស៊េរី២០១២ ពណ៌ខ្មៅ ដែលម៉ូតូនោះបានរងនូវការខូចខាតយ៉ាងដំណំផងដែរ ។ សាក្សីឱ្យដឹងថា មុនពេលកើតហេតុគេបានឃើញរថយន្ត និងម៉ូតូធ្វើដំណើរក្នុងទិសដៅបញ្ច្រាសទិសគ្នា ដោយរថយន្តបើកបោះពួយធ្វើដំណើរពីកើតទៅលិចក្នុងល្បឿនយ៉ាងលឿន ។ ចំណែកជនរងគ្រោះជិះម៉ូតូតែម្នាក់ឯងធ្វើដំណើរពីលិចទៅកើតកៀនចិញ្ចើមផ្លូវខាងស្តាំដៃរបស់ខ្លួន ដែលតាមការប៉ាន់ស្មានគឺជិះក្នុងល្បឿនពី៤០ទៅ៥០គីឡូម៉ែត្រក្នុង១ម៉ោងប៉ុណ្ណោះ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ