ឆ្នាំ២០១៧ គឺជាឆ្នាំដែលមានការខូចខាតយ៉ាងមហាសាលដោយសារគ្រោះធម្មជាតិ ភ្លើងឆេះព្រៃ ទឹកជំនន់ និងព្យុះខ្ពស់បំផុតនៅក្នុងប្រវត្តិសាស្ត្ររបស់អាមេរិកមានតម្លៃប្រហែល៣០៦.០០០លានដុល្លារ ។
របាយការណ៍បញ្ជាក់ថា គ្រោះធម្មជាតិដែលកើតឡើងនៅក្នុងឆ្នាំ២០១៧ ចំនួន១៦លើក បង្កការខូចខាតច្រើន និងធ្វើឱ្យមានអ្នកស្លាប់យ៉ាងតិច៣៦២នាក់ ប៉ុន្តែតួលេខនៃការខូចខាតយ៉ាងពិតប្រាកដអាចច្រើនជាងនេះ ។
តម្លៃនៃការខូចខាតក្នុងឆ្នាំ២០១៧ បាននាំមុខឆ្នាំ២០១៦ ដែលមានការខូចខាត២១៥.០០០លានដុល្លារ ។ ការខាតបង់ដោយសារព្យុះជាច្រើនលើកបានបោកបក់នៅអាមេរិក ធ្វើឱ្យឆ្នាំ២០១៧ ស្ថិតក្នុងតួលេខខ្ពស់ជាប្រវត្តិសាស្ត្រ ហើយព្យុះHarvey ស្ថិតក្នុងលំដាប់ទី១មានចំនួន១២៥.០០០លានដុល្លារ ប៉ុន្តែតិចជាងព្យុះ Katrina នៅឆ្នាំ២០០៥ ខណៈពេលភ្លើងឆេះព្រៃ និងអាកាសធាតុត្រជាក់បង្កការខូចខាតយ៉ាងដំណំដូចគ្នា ។
ក្នុងឆ្នាំកន្លងមកចាត់ទុកថាជាឆ្នាំដែលធាតុអាកាសនៅអាមេរិកក្តៅបំផុតកម្រិតទី៣ តាមពីក្រោយឆ្នាំ២០១៣ និង២០១៦ រីឯសីតុណ្ហភាពមធ្យមក្នុងអាមេរិកមានប្រហែល១២,២អង្សាសេ ខ្ពស់ជាងកម្រិតមធ្យមនៃសតវត្សទី២០ ៕
ចែករំលែកព័តមាននេះ