រាជធានីភ្នំពេញ ៖ មាស សុជាតិ មកពីក្លិបឃ្លាំងមឿងកីឡាខេត្តពោធិសាត់ និងឌុម កែវដា មកពីក្លិបមកុដរាជសីហ៍ ត្រូវបានគណៈកម្មការប្រដាល់ផ្គូផ្គងឱ្យជួបប្រកួតជាមួយ កីឡាករជើងខ្លាំងថៃដូចគ្នា…
រាជធានីភ្នំពេញ ៖ មាស សុជាតិ មកពីក្លិបឃ្លាំងមឿងកីឡាខេត្តពោធិសាត់ និងឌុម កែវដា មកពីក្លិបមកុដរាជសីហ៍ ត្រូវបានគណៈកម្មការប្រដាល់ផ្គូផ្គងឱ្យជួបប្រកួតជាមួយ កីឡាករជើងខ្លាំងថៃដូចគ្នា នៅលើសង្វៀនទូរទស្សន៍ស៊ីអិនស៊ី នាថ្ងៃសុក្រ ទី១២ មករា នេះ ។
កីឡាករ មាស សុជាតិ ធ្លាប់ប្រកួត៧៦ដងឈ្នះ៦៥ដង ចាញ់១០ដង ស្មើ១ដង និងផ្ដួលគូប្រកួតឱ្យសន្លប់២១ដង ត្រូវជួបប្រកួតជាមួយកីឡាករថៃឈ្មោះក្វាងងិនម៉ រាជផាត់ម៉ូចមប៊ឹង ក្នុងប្រភេទទម្ងន់៦៣,៥គីឡូក្រាម។ កីឡាករថៃរូបនេះធ្លាប់ប្រកួត៩៣ដង ឈ្នះ៦៥ដង ចាញ់២៣ដង ស្មើ៥ដង និងធ្លាប់ផ្ដួលគូប្រកួតឱ្យសន្លប់១០ដង ។
ចំណែកកីឡាករ ឌុម កែវដា ធ្លាប់ប្រកួត៨៥ដង ឈ្នះ៦៦ដង ចាញ់១៥ដង ស្មើ៤ដងនិងធ្លាប់ផ្ដួលគូប្រកួតឱ្យសន្លប់២០ដង ត្រូវជួបប្រកួតជាមួយកីឡាករថៃឈ្មោះកងស្យាមត ភិថាក់ឆ័យក្នុងប្រភេទទម្ងន់៦៣,៥គីឡូក្រាមដូចគ្នា ។ កីឡាករថៃរូបនេះធ្លាប់ប្រកួត៦៨ដង ឈ្នះ៥២ដង ចាញ់៨ដង ស្មើ៣ដង និងមិនធ្លាប់ផ្ដួលគូប្រកួតឱ្យសន្លប់បានម្ដងណាឡើយ។
បើតាមលោក យុទ្ធភូមិ ត្រាក់ឃុនយ៉ាង ជាគ្រូបង្ហាត់់កីឡាករថៃបានអះអាងថា សម្រាប់ការប្រកួតលើកនេះលោកមានទំនុកចិត្តលើសិស្សគុនរបស់លោកថានឹងទទួលបានជ័យជម្នះមិនខានដោយសារពួកគេទាំងពីរសុទ្ធតែជាកីឡាករឆ្នើមប្រចាំក្លិបនិងធ្លាប់យកឈ្នះកីឡាករថៃដែលសុទ្ធតែជាជើងខ្លាំងដូចគ្នាជាច្រើននាក់ទៀតផង។ទោះបីយ៉ាងណា សម្រាប់អ្នកធ្លាប់តាមដានការប្រកួតភាគច្រើនមិនហ៊ានមើលស្រាលលើខាងណានោះទេ ដោយសារកីឡាករថៃទាំងពីរមិនធ្លាប់មកប្រកួតនៅលើសង្វៀនស្រុកខ្មែរពីមុនមក ។ ដូច្នេះអ្នកណាខ្លាំងឬខ្សោយមានតែរង់ចាំមើលការប្រកួតជាក់ស្ដែងនៅលើសង្វៀនប៉ុណ្ណោះ។
ដោយឡែកគូប្រកួតមិត្តភាពធម្មតាវិញមានកីឡាករ ពុធ ព្រហស្បតិ៍ មកពីក្លិបពុទ្ធសិរីវង្សពោធិសែនជ័យ ប្រកួតជាមួយកីឡាករ ធា វាសនា មកពីក្លិបរាជសីហ៍ខេត្តរតនគិរី និងកីឡាករ ឡៅ ផានាថ មកពីក្លិបមកុដរាជសីហ៍ ប្រកួតជាមួយកីឡាករ ហ៊ឹម សារ៉ាន់មកពីសមាគមកីឡាប្រដាល់ក្រសួងការពារជាតិ ៕
ចែករំលែកព័តមាននេះ