រាជធានីភ្នំពេញ ៖ សម្តេចប្រធានរដ្ឋសភាកម្ពុជា បានកោតសរសើរចិន ដែលបានចូលរួមចំណែកអភិវឌ្ឍន៍កម្ពុជា ពិសេសក្នុងប៉ុន្មានឆ្នាំចុងក្រោយនេះ ចិនបានវិនិយោគលើវិស័យអចលនទ្រព្យជាច្រើននៅកម្ពុជា ។
ក្នុងជំនួបរវាងលោក តាន់ស្រឺ ជួងចូវវិន អគ្គនាយកក្រុមហ៊ុនស៊ីនហ្សុងវៃ ជាមួយសម្តេចអគ្គមហាពញាចក្រី ហេង សំរិន ប្រធានរដ្ឋសភាកម្ពុជា នាព្រឹកថ្ងៃទី១១ មករា លោកឧកញ៉ា អ៊ឹង លីហេង បានថ្លែងឲ្យដឹងថា រយៈពេល២-៣ឆ្នាំចុងក្រោយនេះ វិស័យអចលនទ្រព្យនៅកម្ពុជាបានលូតលាស់ ដោយមានអគារខ្ពស់ៗ ល្បីៗលំដាប់អន្តរជាតិកំពុងសាងសង់ ។ ដោយឡែក វិស័យទេសចរណ៍មានការលូតលាស់នៅតំបន់ឆ្នេរ ប្រាសាទអង្គរ និងប្រាសាទបុរាណច្រើនទៀតផងដែរ ។
យោងតាមទិន្នន័យរបស់ក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា ប្រទេសចិនឈរលើលំដាប់ទី១ ដែលវិនិយោគក្នុងវិស័យសំណង់នៅកម្ពុជាឆ្នាំ២០១៧ និងមានទឹកប្រាក់ជាង២.០០០លានដុល្លារអាមេរិក។ ប្រទេសចិន កូរ៉េ ជប៉ុន និងប្រទេសសិង្ហបុរី បានជាប់លេខរៀងបន្តបន្ទាប់ ។
លោក តាន់ស្រឺ ជួងចូវវិន បានឲ្យដឹងថា លោកបានបង្កើតសមាគមមនុស្សធម៌ ឡាយអ៊ិនក្លិបទទួលបានជោគជ័យ ដើម្បីមកជួយវិស័យសុខាភិបាល សាសនា និងអប់រំ គឺជាការជួយទាំងថវិកា ស្មារតី និងបទពិសោធន៍នៅកម្ពុជា ។
សម្តេច ហេង សំរិន បានឲ្យដឹងថា កម្ពុជាមានការភ្ជាប់ជើងហោះហើរត្រង់ពីបណ្តាប្រទេសមួយចំនួនទាំងនៅក្នុងតំបន់ និងពិភពលោក ដែលបានជំរុញឲ្យមានកំណើនទេសចរណ៍ និងវិនិយោគិនផ្ទាល់ពីបរទេសមកកម្ពុជាជារៀងរាល់ឆ្នាំ។ សម្តេចបន្តថា ក្នុងចំណោមនោះ ប្រទេសចិន គឺជាដៃគូវិនិយោគដ៏សំខាន់របស់កម្ពុជា ដោយជួយឲ្យកម្ពុជាមានសេដ្ឋកិច្ចរីកចម្រើនក្នុងរយៈពេលប៉ុន្មានឆ្នាំចុងក្រោយនេះ ដែលធ្វើឲ្យទុនវិនិយោគចិនមានទំហំទឹកប្រាក់១៦ពាន់លានដុល្លារអាមេរិក ឈរលំដាប់ទី១នៅកម្ពុជា ។
លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានថ្លែងថា ការចូលមកវិនិយោគច្រើនរបស់វិនិយោគិនចិន ជារឿងដែលត្រូវអបអរសាទរ ព្រោះការវិនិយោគកាន់តែច្រើន នឹងផ្តល់ផលប្រយោជន៍ដល់កម្ពុជាកាន់តែច្រើន ហើយការវិនិយោគច្រើនរបស់ចិន ដោយសារទំនាក់ទំនងដ៏ល្អរវាងរដ្ឋាភិបាលប្រទេសទាំងពីរ និងកត្តាផ្ទៃក្នុងកម្ពុជាល្អប្រសើរ ដូចជា សុខសន្តិភាព ស្ថិរភាពនយោបាយ និងច្បាប់វិនិយោគដ៏ល្អ ។
លោកបន្តថា ៖« ទោះជាយ៉ាងណា កម្ពុជាគួរធ្វើពិពិធកម្មលើការវិនិយោគ ដោយធ្វើយ៉ាងណា ឲ្យមានការវិនិយោគពីប្រទេសជាច្រើន កុំពឹងផ្អែកតែប្រទេសមួយៗ ព្រោះបើប្រទេសនោះជួបវិបត្តិសេដ្ឋកិច្ច កម្ពុជាក៏មានបញ្ហាផងដែរ » ៕
ចែករំលែកព័តមាននេះ