ទីក្រុងហុងកុង ៖ ការលូតលាស់នៃសេដ្ឋកិច្ចសកលនៅមានភាពរឹងមាំ ប៉ុន្តែអាចនឹងចុះខ្សោយក្នុងរយៈពេលប៉ុន្មានឆ្នាំខាងមុខនេះ ។
ធនាគារពិភពលោក (World Bank) ទើបតែចេញការព្យាករក្នុងឆ្នាំនេះ បន្ទាប់ពីមើលឃើញសេដ្ឋកិច្ចលូតលាស់ក្នុងឆ្នាំ២០១៧ ល្អជាងការគិតទុក ។
ធនាគារនេះបាននិយាយកាលពីថ្ងៃអង្គារក្នុងរបាយការណ៍ថ្មីជាងគេថា ប្រទេសជុំវិញពិភពលោកកំពុងតែមើលឃើញការងើបឡើងវិញនេះ ។
ពួកគេព្យាករថា សេដ្ឋកិច្ចសកលនឹងលូតលាស់បាន៣,១%ក្នុងឆ្នាំ២០១៨នេះ ច្រើនជាងការព្យាករមុនដែលស្មើតែ២,៩%ប៉ុណ្ណោះ។ អត្រានេះក៏ខ្ពស់ជាងការលូតលាស់ក្នុងឆ្នាំមុនដែលស្មើ៣% ផងដែរ ។
ធនាគារពិភពលោកបន្ថែមថា កត្តាដែលជួយជំរុញដល់ការលូតលាស់ រួមមាន ការប្រសើរឡើងវិញនៃការធ្វើពាណិជ្ជកម្ម, អត្រាការប្រាក់ទាប និងតម្លៃប្រេងឆៅងើបឡើងវិញ ដែលជំរុញដល់ជំនឿចិត្ត ។
របាយការណ៍ខាងលើឲ្យដឹងថា ឆ្នាំនេះនឹងក្លាយជាឆ្នាំទី១ ដែលសេដ្ឋកិច្ចសកលដំណើរការបានល្អជាងគេតាំងពីវិបត្តិហិរញ្ញវត្ថុសកលមក មានន័យថា អត្រាគ្មានការងារបានធ្លាក់ចុះទាប, សមត្ថភាពផលិតមានកម្រិតខ្ពស់ ហើយអត្រាអតិផរណាមានស្ថិរភាពផងដែរ ដែលធ្វើឲ្យតម្រូវការកើនឡើង ។
ប៉ុន្តែរបាយការណ៍ខាងលើព្រមានថា ការលូតលាស់នេះអាចនឹងដល់ដំណាក់កាលឈប់ ហើយវាចាប់ផ្តើមធ្លាក់ចុះវិញក្នុងឆ្នាំ២០១៩ និង២០២០ ព្រោះសេដ្ឋកិច្ចធំៗដូចជា សហរដ្ឋអាមេរិក ចិន និងសហភាពអឺរ៉ុបចាប់ផ្តើមអន់ថយ ។
World Bank ព្យាករទៀតថា ការអន់ថយនឹងកើតមានឡើងនៅពេលវិធានការរដ្ឋាភិបាល រួមមាន អត្រាការប្រាក់ទាបជិតស្មើសូន្យ និងវិធានការផ្សេងៗចាប់ផ្តើមបាត់បង់ប្រសិទ្ធភាព ។
ជាមួយគ្នានេះ ប្រទេសសេដ្ឋកិច្ចធំៗលើពិភពលោក នឹងត្រូវដោះស្រាយបញ្ហាពលរដ្ឋមានវ័យចំណាស់ច្រើន ដែលអាចនឹងប៉ះពាល់ដល់សមត្ថភាពផលិតរបស់ពួកគេ ។
World Bank គិតថា ២ភាគ៣នៃសេដ្ឋកិច្ចសកលនឹងទទួលរងផលប៉ះពាល់ពីការអន់ថយនេះ ។ ពួកគេផ្តល់យោបល់ឲ្យរដ្ឋាភិបាលផ្តោតលើការកែទម្រង់វិស័យសុខាភិបាលនិងការអប់រំ និងធ្វើឲ្យហេដ្ឋារចនាសម្ព័ន្ធកាន់តែប្រសើរឡើងផងដែរ ៕
ចែករំលែកព័តមាននេះ