ទីក្រុងវ៉ាស៊ីនតោន ៖ កាលពីថ្ងៃអង្គារកន្លងមកនេះ ក្រុមហ៊ុនផលិតអាលុយមីញ៉ូមអាមេរិកចង់ឲ្យចាត់វិធានការការពារផលិតផលនាំចូលពីចិន ដោយបានចោទប្រកាន់ក្រុមហ៊ុន China Zhongwang Holdings Ltd ថា គេចវេះពន្ធ ដោយសារក្រុមហ៊ុននេះនាំចេញផលិតផលរបស់ខ្លួនពីប្រទេសវៀតណាមទៅវិញ ។
ក្រុមប្រឹក្សាផ្នែកអាលុយមីញ៉ូមនិយាយថា ផលិតផលអាលុយមីញ៉ូមរបស់ក្រុមហ៊ុនចិន Zhongwang Holdings ត្រូវបានដឹកជញ្ជូនទៅកាន់ក្រុមហ៊ុន Global Vietnam Aluminum Co Ltd មានទីតាំងក្នុងប្រទេសវៀតណាម ហើយនាំចេញមកកាន់សហរដ្ឋអាមេរិក ។
យោងតាមក្រសួងពាណិជ្ជកម្មអាមេរិកបានឲ្យដឹងថា ការដាក់ពន្ធលើផលិតផលទាំងនេះ គឺស្មើប្រមាណ១០៦%ឯណោះ ។
ក្រុមហ៊ុន Zhongwang Holdings បានប្រាប់ថា ការចោទប្រកាន់នេះគ្មានភស្តុតាងគ្រប់គ្រាន់អាចបញ្ជាក់បានទេ ។
លិខិតនេះបានចេញបន្ទាប់ពីសហរដ្ឋ អាមេរិកចេញសកម្មភាពជាច្រើនដើម្បីជាឧបសគ្គដល់ការនាំចូលអាលុយមីញ៉ូមចិន រួមមាន ការដាក់ពន្ធលើក្រដាសអាលុយមីញ៉ូមចិន និងស៊ើបអង្កេតលើការនាំចូលក្រដាសអាលុយមីញ៉ូមជាដើម ។
វាក៏កើតឡើង ខណៈរដ្ឋាភិបាលរបស់លោកប្រធានាធិបតីអាមេរិក ដូណាល់ ត្រាំ កំពុងតែពិចារណារឹតបន្តឹងលើការនាំចូលផលិតផលពីបរទេស ដើម្បីការពារសន្តិសុខជាតិ ។
ក្រសួងពាណិជ្ជកម្មអាមេរិកនឹងផ្តល់យោបល់ដល់លោកប្រធានាធិបតី ត្រាំ ទាក់ទងនឹងការស៊ើបអង្កេតលើការនាំចូលអាលុយមីញ៉ូម នៅថ្ងៃទី២២ មករា ខាងមុខ ៕
ចែករំលែកព័តមាននេះ