រាជធានីភ្នំពេញ ៖ នៅក្នុងដំណើរទស្សនកិច្ចរបស់លោក លី ខឺឈាង (Li Keqiang) នាយករដ្ឋមន្ត្រីនៃសាធារណរដ្ឋប្រជាមានិតចិន កម្ពុជាទទួលបានការចុះហត្ថលេខាជាមួយភាគីចិនចំនួន១៩គម្រោង ក្នុងនោះ…
រាជធានីភ្នំពេញ ៖ នៅក្នុងដំណើរទស្សនកិច្ចរបស់លោក លី ខឺឈាង (Li Keqiang) នាយករដ្ឋមន្ត្រីនៃសាធារណរដ្ឋប្រជាមានិតចិន កម្ពុជាទទួលបានការចុះហត្ថលេខាជាមួយភាគីចិនចំនួន១៩គម្រោង ក្នុងនោះ គម្រោងរវាងរដ្ឋនិងរដ្ឋ មានចំនួន១២គម្រោង, រវាងរដ្ឋ និងវិស័យឯកជនរបស់ចិន មានចំនួន៥គម្រោង និងរវាងវិស័យឯកជនកម្ពុជា និងចិន មានចំនួន២គម្រោង ។
សម្រាប់កិច្ចព្រមព្រៀងដែលបានចុះហត្ថលេខារវាងរដ្ឋ និងរដ្ឋ ទាំង១២គម្រោងរួមមាន ៖
១-អនុស្សរណៈនៃការយោគយល់គ្នា ស្ដីពីការលើកកម្ពស់បន្ថែមការអភិវឌ្ឍមជ្ឈមណ្ឌល ផ្ទេរបច្ចេកវិទ្យាកម្ពុជា-ចិន ។
២-អនុស្សរណៈនៃការយោគយល់គ្នា សម្រាប់កិច្ចប្រតិបត្តិការលើការលើកកម្ពស់គុណភាពផលិតផល ។
៣-កិច្ចព្រមព្រៀង ស្ដីពីកិច្ចសហប្រតិបត្តិការសេដ្ឋកិច្ច និងបច្ចេកទេស ។
៤-លិខិតប្ដូរសារ ស្ដីពីគម្រោងជួសជុលរាជវាំងនៅអង្គរ ។
៥-លិខិតប្ដូរសារ ស្ដីពីការផ្ដល់ជូនបរិក្ខារមួយកញ្ចប់ ។
៦-អនុស្សរណៈនៃការយោគយល់គ្នា ស្ដីពីគម្រោងដំណើរនៃក្ដីស្រឡាញ់ពីបេះដូងនៅកម្ពុជា ។
៧-អនុស្សរណៈនៃការយោគយល់គ្នា ស្ដីពីការរៀបចំផែនការរួមលើការអភិវឌ្ឍកសិកម្មទំនើបនៅកម្ពុជា ។
៨-អនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការអង្គការស្រាវជ្រាវដំណាំស្រូវ ។
៩-កិច្ចព្រមព្រៀង ស្ដីពីការអនុវត្តគម្រោងការបង្កើតមជ្ឈមណ្ឌលបង្កាត់ និងអភិរក្សពូជឈើមានតម្លៃខ្ពស់នៅកម្ពុជា ។
១០-កិច្ចព្រមព្រៀងឥណទានសម្បទាន សម្រាប់គម្រោងសាងសង់ខ្សែអគ្គិសនីតង់ស្យុងខ្ពស់២៣០គីឡូវ៉ុល ដំណាក់កាលទី២ ។
១១-កិច្ចព្រមព្រៀងឥណទានសម្បទានសម្រាប់គម្រោងពង្រីក និងលើកកម្រិតផ្លូវជាតិលេខ៣ (ចោមចៅ បែកគូស ក្រុងកំពត) ។
១២-អនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការទៅវិញទៅមក ។
សម្រាប់អនុស្សរណៈចំនួន៥រវាងរដ្ឋរបស់កម្ពុជា និងវិស័យឯកជនចិនរួមមាន ៖
១-កិច្ចព្រមព្រៀងសម្បទានសម្រាប់គម្រោងអភិវឌ្ឍន៍ហេដ្ឋារចនាសម្ព័ន្ធផ្លូវល្បឿនលឿនពីភ្នំពេញ-ខេត្តព្រះសីហនុ ។
២-កិច្ចព្រមព្រៀង ស្តីពីវិស័យអប់រំបណ្ដុះបណ្ដាលបច្ចេកទេស និងវិជ្ជាជីវៈ ។
៣-អនុស្សរណៈនៃការយោគយល់គ្នា ស្តីពីពាណិជ្ជកម្មអង្ករ ។
៤-កិច្ចសន្យាសម្រាប់គម្រោងសាងសង់ខ្សែបញ្ជូនអគ្គិសនី៥០០គីឡូវ៉ុល ជាឆ្អឹងខ្នងសម្រាប់បណ្ដាញជាតិ និងភ្ជាប់អនុតំបន់ ។
៥-កិច្ចព្រមព្រៀងក្របខ័ណ្ឌ ស្តីពីកិច្ចសហប្រតិបត្តិការហិរញ្ញប្បទានគម្រោងអាកាសយានដ្ឋានភ្នំពេញថ្មីសម្រាប់កម្ពុជា ។
ដោយឡែក គម្រោង២ទៀតរវាងឯកជន និងឯកជន ដែលបានចុះហត្ថលេខាក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោក លី ខឺឈាង នាយករដ្ឋមន្ត្រីចិន រួមមាន កិច្ចព្រមព្រៀងក្របខ័ណ្ឌ ស្តីពីគម្រោងបាញ់បង្ហោះផ្កាយរណបតេជោ១ និងកិច្ចព្រមព្រៀង ស្តីពីគម្រោងវិនិយោគលើការសាងសង់ និងប្រតិបត្តិការកំពង់ផែស្ទឹងហាវ ។
លោក លី ខឺឈាង នាយករដ្ឋមន្ត្រីនៃសាធារណរដ្ឋប្រជាមានិតចិន បានមានប្រសាសន៍ថា ប្រទេសចិន គឺជាដៃគូពាណិជ្ជកម្មធំជាងគេរបស់ប្រទេសកម្ពុជា ថៃ មីយ៉ាន់ម៉ា និងវៀតណាម ហើយចិនក៏ជាដៃគូពាណិជ្ជកម្មធំទី២របស់ឡាវផងដែរ ។
យោងតាមស្ថិតិពាណិជ្ជកម្មក្នុងឆ្នាំ២០១៧កន្លងទៅនេះ ពាណិជ្ជកម្មរវាងប្រទេសទាំង៥នៅតាមដងទន្លេមេគង្គជាមួយចិន មានទំហំទឹកប្រាក់២២០ប៊ីលានដុល្លារអាមេរិក កើនឡើង១៦% ក្នុងនោះការវិនិយោគសរុបរបស់ចិន ក្នុងបណ្ដាប្រទេសទាំង៥កើនឡើង២០% និងភ្ញៀវទេសចរចិនធ្វើដំណើរទៅកាន់ប្រទេសនោះ កើនឡើងរហូតដល់៨០% ។
សម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា បានអរគុណដល់មិត្តចិនដែលតែងតែយកចិត្តទុកដាក់ជួយដល់ការអភិវឌ្ឍប្រទេសកម្ពុជា រួមទាំងហេដ្ឋារចនាសម្ព័ន្ធតូចធំជាច្រើននៅក្នុងប្រទេស ដើម្បីជួយកាត់បន្ថយភាពក្រីក្រធ្វើឲ្យជីវភាពរស់នៅរបស់ប្រជាពលរដ្ឋកាន់តែល្អប្រសើរឡើង ។
គួរបញ្ជាក់ថា នៅក្នុងឆ្នាំ២០១៧ រយៈពេល១១ខែ ទំហំពាណិជ្ជកម្មចិននិងកម្ពុជា មានទឹកប្រាក់ប្រមាណជាង៥ពាន់លានដុល្លារអាមេរិក ក្នុងនោះទំនិញសំខាន់សម្រាប់ទំនាក់ទំនងទំហំពាណិជ្ជកម្មរវាងប្រទេសទាំងពីរ គឺសម្ភារកាត់ដេរ ដែលមានទឹកប្រាក់រហូតដល់ជាង២ពាន់លានដុល្លារអាមេរិក ៕
ចែករំលែកព័តមាននេះ