រាជធានីភ្នំពេញ ៖ ផ្លូវជាតិលេខ៥ជាចំណែកមួយនៃផ្លូវអាស៊ាន ដែលក្រសួងសាធារណការ និងដឹកជញ្ជូនកំពុងធ្វើការពង្រីកនោះ ក្រោយពេលបញ្ចប់ការស្ថាបនា អ្នកស្រាវជ្រាវសេដ្ឋកិច្ចមើលឃើញថា នឹងក្លាយជាច្រកសេដ្ឋកិច្ចមួយយ៉ាងសំខាន់សម្រាប់កម្ពុជា ។ គម្រោងនេះនឹងពង្រីកពី២គន្លង…
រាជធានីភ្នំពេញ ៖ ផ្លូវជាតិលេខ៥ជាចំណែកមួយនៃផ្លូវអាស៊ាន ដែលក្រសួងសាធារណការ និងដឹកជញ្ជូនកំពុងធ្វើការពង្រីកនោះ ក្រោយពេលបញ្ចប់ការស្ថាបនា អ្នកស្រាវជ្រាវសេដ្ឋកិច្ចមើលឃើញថា នឹងក្លាយជាច្រកសេដ្ឋកិច្ចមួយយ៉ាងសំខាន់សម្រាប់កម្ពុជា ។
គម្រោងនេះនឹងពង្រីកពី២គន្លង ទៅ៤គន្លងចាប់ពីព្រែកក្ដាម រហូតដល់ក្រុងប៉ោយប៉ែត ដែលការពង្រីកចែកជាដំណាក់កាល ដោយគ្រោងចំណាយថវិកាប្រមាណ៥០០លានដុល្លារ។
លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា មានប្រសាសន៍កាលពីថ្ងៃទី១១ មករា ម្សិលមិញថា ៖« ខ្ញុំយល់ឃើញថា នេះជាច្រកដ៏សំខាន់មួយ។ ការពង្រីកផ្លូវជាតិលេខ៥ ឱ្យមាន៤គន្លង ពីក្រុងភ្នំពេញទៅក្រុងប៉ោយប៉ែតនេះ គឺជាការបើកច្រកសេដ្ឋកិច្ចធំមួយសម្រាប់កម្ពុជា ហើយបើសិនជាអាច គួរធ្វើជាផ្លូវល្បឿនលឿនដើម្បីចំណេញពេលវេលាក្នុងការដឹកជញ្ជូន និងកាត់បន្ថយថ្លៃដើម » ។
លោកបណ្ឌិតបន្តថា ការភ្ជាប់ផ្លូវជាតិលេខ៥ ពីក្រុងប៉ោយប៉ែត មកកាន់រាជធានីភ្នំពេញនេះ ក៏ជាច្រកមួយសម្រាប់ទេសចរណ៍ផងដែរ ព្រោះប៉ោយប៉ែតជាច្រកលំហូរភ្ញៀវទេសចរពីថៃ មកកម្ពុជា ដោយសារផ្លូវនេះមានទំហំធំ និងមានសុវត្ថិភាពល្អ ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រី ក្រសួងសាធារណការ និងដឹកជញ្ជូន មានប្រសាសន៍ក្នុងពិធីចុះហត្ថលេខាលើកិច្ចសន្យាសាងសង់គម្រោងធ្វើឱ្យប្រសើរឡើងវិញនូវកំណាត់ផ្លូវជាតិលេខ៥ ភាគខាងត្បូង នៅទីស្តីការក្រសួងថា ៖« ផ្លូវជាតិលេខ៥នេះ គឺសំខាន់ណាស់ វាជាចំណែកផ្លូវរបស់អាស៊ានហាយវ៉េលេខ១ ដែលបានតភ្ជាប់តាំងពីភូមា មកថៃ កម្ពុជា និងវៀតណាម សម្រាប់ដឹកទំនិញ ។ យើងមានកសិផលក៏ច្រើននៅប៉ៃលិន បាត់ដំបង រួមនឹងខេត្តផ្សេងទៀតអាចដឹកមកតាមផ្លូវនេះចុះទៅកំពង់ផែ ហើយបន្តិចទៀត អាចតភ្ជាប់ផ្លូវល្បឿនលឿនភ្នំពេញ-ក្រុងព្រះសីហនុ ។ ផ្លូវជាតិលេខ៥ ជាផ្លូវសំខាន់ និងជាសរសៃឈាមដ៏ធំមួយដើម្បីធ្វើឱ្យសេដ្ឋកិច្ចជាតិយើងរីកចម្រើនថែមទៀត»។
ទីប្រឹក្សាជាន់ខ្ពស់ផ្នែកសេដ្ឋកិច្ចនៃក្រុមហ៊ុន Emerging Marketing Consulting លោក ង៉ែត ជូ មានប្រសាសន៍ថា ៖« នៅថ្ងៃអនាគត ផ្លូវនេះនឹងជួយសម្រួលដល់ការធ្វើដំណើរគ្រប់បែបយ៉ាង តែការពង្រីកផ្លូវជាតិលេខ៥ ខ្ញុំមើលឃើញថា មិនបានបន្ថែមតម្លៃលើការទាក់ទាញខ្លាំងក្លាទេ ដោយសារការវិនិយោគភាគច្រើនទៅលើវិស័យកាត់ដេរ » ។
លោកបន្តថា ៖« បើនិយាយក្នុងន័យសេដ្ឋកិច្ចវិញ ជំរុញការវិនិយោគឱ្យតម្លៃកសិកម្មយើងបានថ្លៃ ក៏មិនបានជួយប៉ុន្មានដែរ តែវាអាចជួយផលិតផលមួយចំនួនដែលមានតម្លៃខ្ពស់ ធ្វើឱ្យភាគរយនៃថ្លៃដើមដឹកជញ្ជូនមានតម្លៃទាប បើប្រៀបធៀបនឹងថ្លៃដើមនៃការផលិត » ។
បើតាមលោកបណ្ឌិត គី សេរីវឌ្ឍន៍ ក្រោយពីការពង្រីកផ្លូវជាតិលេខ៥ចប់រួចរាល់សម្រាប់ការអភិវឌ្ឍបន្ទាប់ គឺវិស័យកសិឧស្សាហកម្ម និងទេសចរណ៍ ជាចំណុចបន្ទាប់ដែលរាជរដ្ឋាភិបាលត្រូវយកចិត្តទុកដាក់ដើម្បីជំរុញកំណើនសេដ្ឋកិច្ចនៅពេលខាងមុខ ។ ចំណុចនេះ ប្រាកដណាស់នឹងមានចំណាប់អារម្មណ៍ពីវិនិយោគិនខាងក្រៅ ព្រោះពេលផ្លូវធ្វើបានល្អ ការដឹកជញ្ជូនចំណាយថ្លៃដើមទាប ថែមទាំងកាត់បន្ថយការចំណាយពេលវេលា និងថវិកានៅតាមតំបន់ព្រំដែនទៀតផង ។ ដូច្នេះ ការទាក់ទាញវិនិយោគិនបានកាន់រឹងមាំ និងខ្លាំងក្លាជាងពេលមុន ។
យោងតាមសេចក្តីប្រកាសរបស់ក្រសួងសាធារណការ និងដឹកជញ្ជូន បានឱ្យដឹងថា គម្រោងធ្វើឱ្យប្រសើរឡើងវិញនូវកំណាត់ផ្លូវជាតិលេខ៥ គឺជាគម្រោងក្រោមឥណទានសម្បទានពីរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុនប្រចាំកម្ពុជា (JICA)។ គម្រោងនេះ គឺផ្តើមសាងសង់ចេញពីព្រែកក្តាម រហូតដល់ក្រុងប៉ោយប៉ែត មានប្រវែងសរុប៣៦៦គីឡូម៉ែត្រ ដែលគ្រោងចំណាយថវិកាប្រមាណ៥០០លានដុល្លារ ។
ចំពោះការសាងសង់ពង្រីកកំណាត់ផ្លូវជាតិដែលមានស្រាប់ពី២គន្លងទៅ៤គន្លង មានទទឹងសរុប២៣ម៉ែត្រ មានប្រវែងសរុប៣០៤គីឡូម៉ែត្រ ដោយក្រាលជំនួសកៅស៊ូ AC (Asphalt Concrete) និងមានសួនច្បារកណ្តាល ។
សេចក្តីប្រកាសដដែលបញ្ជាក់ថា ចំពោះការអនុវត្តនីតិវិធីក្នុងការសាងសង់ ត្រូវបានបែងចែកជា៣គម្រោងធំៗរួមមាន ៖
១-ផ្នែកខាងជើង ៖ មានឈ្មោះជាផ្លូវការថា គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគខាងជើង (បាត់ដំបង-សិរីសោភ័ណ) ប្រវែង៨៤,៧៤គីឡូម៉ែត្រ និងចំណាយទឹកប្រាក់សាងសង់ប្រមាណ១៤៣,០៤លានដុល្លារ ដោយប្រើរយៈពេលសាងសង់៣ឆ្នាំ ។
២-ផ្នែកខាងត្បូង ៖ មានឈ្មោះជាផ្លូវការថា គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគខាងត្បូង (ព្រែកក្តាម-ធ្លាម្អម) ប្រវែង១៣៥,២៥គីឡូម៉ែត្រ និងចំណាយទឹកប្រាក់សាងសង់ប្រមាណ២៤៦,៣៥លានដុល្លារ និងត្រូវការរយៈពេល៤ឆ្នាំសម្រាប់ដំណើរការសាងសង់ ហើយក្នុងនោះចែកចេញជា៣គឺ ៖ កញ្ចប់ការងារទី១ មានប្រវែង៤១,៥៤គីឡូម៉ែត្រ (ផ្លូវវាងឧដុង្គ ប្រវែង៥,២គីឡូម៉ែត្រ)។ កញ្ចប់ការងារទី២ មានប្រវែង៤២,៥០គីឡូម៉ែត្រ (ផ្លូវវាងកំពង់ឆ្នាំង ប្រវែង១២,០៧គីឡូម៉ែត្រ) និងកញ្ចប់ការងារទី៣ មានប្រវែង៥១,២០គីឡូម៉ែត្រ ។
៣-ផ្នែកកណ្តាល ៖ មានឈ្មោះជាផ្លូវការថា គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគកណ្តាល (ធ្លាម្អម-បាត់ដំបង និងសិរីសោភ័ណ-ប៉ោយប៉ែត) ប្រវែង១៤៦,០៤គីឡូម៉ែត្រ ចែកចេញជា៥កញ្ចប់ការងារ ។ កញ្ចប់ការងារទី១ មានប្រវែង១៩,៨គីឡូម៉ែត្រ (ផ្លូវវាងក្រុងពោធិ៍សាត់ ប្រវែង១១,៦៩គីឡូម៉ែត្រ)។ កញ្ចប់ការងារទី២ មានប្រវែង៤៧គីឡូ ម៉ែត្រ។ កញ្ចប់ការងារទី៣ មានប្រវែង៤៤,១គីឡូម៉ែត្រ ។ កញ្ចប់ការងារទី៤ មានប្រវែង៣៥,៤គីឡូម៉ែត្រ និងកញ្ចប់ការងារទី៥ ការស្ថាបនាស្ថានីយជញ្ជីងថ្លឹងទម្ងន់ចំនួន៦ទីតាំង ក្នុងនោះមានការស្ថាបនាថ្មី៣ស្ថានីយ និងនៅលើទីតាំងចាស់៣ស្ថានីយ ៕
ចែករំលែកព័តមាននេះ