រាជធានីភ្នំពេញ ៖ បុរសម្នាក់បានទុករថយន្តម៉ាកតូយ៉ូតា១គ្រឿង នៅមុខផ្ទះរបស់ខ្លួនពេលយប់ជារៀងរាល់ថ្ងៃ និងយូរមកហើយ មិនដែលមានបញ្ហាអ្វីកើតឡើងនោះឡើយ ទើបតែចុងក្រោយនេះខណៈរវល់ដេកលក់ ស្រាប់តែចោរចូលទៅលួចបើកយកទៅបាត់ស្រមោល ។
លុះក្រោយពេលភ្ញាក់ពីដេកនាវេលាជិតភ្លឺ ចេញពីក្នុងផ្ទះទៅមើលរថយន្តស្រាប់តែបាត់មិនឃើញ ទើបមានការភ្ញាក់ផ្អើលឆោឡោ តាមរកគ្រប់កន្លែងប៉ុន្តែមិនបានឃើញនោះទេ ហើយរហតដល់ព្រឹកឡើង ទើបធ្វើដំណើរទៅកាន់ប៉ុស្ដិ៍នគរបាលប៉ុស្ដិ៍ចោមចៅ២ ដាក់ពាក្យបណ្ដឹងសុំឲ្យជួយស្រាវជ្រាវ ។
ហេតុការណ៍នោះបានភ្ញាក់ផ្អើលឡើងកាលពីវេលាម៉ោង០៤និង១០នាទីទាបភ្លឺ ថ្ងៃទី១១ ខែមករា ឆ្នាំ២០១៨ នៅចំណុចផ្ទះលេខ៩៩L ផ្លូវលេខ៤២៤ ស្ថិតនៅក្នុងភូមិចោមចៅ៣ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មានបានឲ្យដឹងថា បុរសដែលបាត់រថយន្តនោះឈ្មោះពេជ្យ ភក្តី អាយុ៣២ឆ្នាំ មុខរបរបុក្គលិកក្រុមហ៊ុនស្រាបៀរ ស្នាក់នៅផ្ទះកើតហេតុខាងលើ ។ បានបាត់រថយន្ត១គ្រឿងម៉ាក Toyota Corolla ពណ៌ទឹកមាស ពាក់ស្លាកលេខ ភ្នំពេញ ២AO-៣០២៨ ផលិតឆ្នាំ២០០៣ លេខម៉ាស៊ីន 1ZZ5641931 នឹងលេខតួ 1XNBR32E23Z114048 ។
រថយន្តនេះមិនមែនជាកម្មសិទ្ធិរបស់គាត់ឡើយ គឺជារថយន្តរបស់ក្រុមហ៊ុនស្រាបៀរ ដែលគាត់គ្រាន់តែជាអ្នកបើកបរឲ្យក្រុមហ៊ុនស្រាបៀរនោះតែប៉ុណ្ណោះ ។ ប្រភពដដែលបានបន្តថា នៅវេលាយប់ថ្ងៃទី១០ ខែមករា មុនពេលកើតហេតុ បុរសខាងលើបានទុករថយន្តនៅមុខផ្ទះ បន្ទាប់មកបានចូលទៅដេកហើយបានលង់លក់យ៉ាងស្កប់ស្កល់ ដោយមិនបានដឹងថាក្រុមចោរចូលទៅធ្វើសកម្មភាពលួចយករថយន្តតាំងពីពេលណាមកនោះទេ ។
លុះដល់វេលាម៉ោង០៤និង១០នាទីទាបភ្លឺថ្ងៃទី១១ ខែមករា ទើបភ្ញាក់ហើយបានចេញពីក្នុងផ្ទះទៅមើលរថយន្តបាត់មិនឃើញ ក៏មានការភ្ញាក់ផ្អើលឆោឡោតាមរកគ្រប់កន្លែងប៉ុន្តែ មិនបានឃើញនោះទេ ហើយរហូតដល់វេលាព្រឹកថ្ងៃដដែល ទើបធ្វើដំណើរទៅដាក់ពាក្យបណ្ដឹងសុំការអន្តរាគមន៍ពីកម្លាំងនគរបាលប៉ុស្ដិ៍ចោមចៅ២ ដើម្បីឲ្យជួយស្វែងរករថយន្តខាងលើ ។
ប្រភពខាងលើបានបន្តទៀតថា បុរសរូបនោះ គឺជាអ្នកបើកបររថយន្តឲ្យក្រុមហ៊ុនស្រាបៀរមួយ ចំណែករថយន្តនោះមិនមែនជាកម្មសិទ្ធិរបស់គាត់ឡើយ ហើយគាត់តែងបានបើកវាយកទៅទុកនៅមុខផ្ទះដែលជាចំណុចកើតហេតុ នេះជារៀងរាល់យប់តែមិនដែលមានបញ្ហាអ្វីកើតឡើងនោះទេ ។ ទើបតែពេលនេះ ស្រាប់តែត្រូវចោរលួចបាត់ ហើយមិនដឹងថាឲ្យគាត់ដោះស្រាយជាមួយក្រុមហ៊ុនបែបណានោះទេ នេះជាបញ្ហាលំបាកមួយសម្រាប់រូបគាតផងដែរ ៕
ចែករំលែកព័តមាននេះ