ថ្នាំខ្លាំងលឺហើយចង់ឃើញណាស់

ថ្ងៃទី ១១ ខែ មករា ឆ្នាំ ២០១៨
ម៉ោង ១៥:៤២
យ៉ាន់ ចាន់ថេត

ខេត្តកំពង់ចាម ៖ ដំណាំថ្នាំជក់ត្រូវបានប្រជាពលរដ្ឋនាំគ្នាដាំតៗគ្នា តាំងពីបុរាណកាលរហូតមកដល់
សព្វថ្ងៃនេះ ។ តួរយ៉ាងដូចជានៅតាមបណ្តាភូមិមួយចំនួនក្នុងឃុំកោះសំរោង ស្រុកកំពង់សៀម គេឃើញមានប្រភេទថ្នាំកាតាប និងថ្នាំខ្លាំងតែមិនសូវសម្បូរដូចមុនទេ ព្រោះតែទីផ្សារលក់បានថោក ។

លោកតាវ័រ សារុំ អាយុ៧១ឆ្នាំ នៅភូមិទី៣ ឃុំកោះសំរោង ស្រុកកំពង់សៀម មានប្រសាសន៍ឲ្យដឹងនៅ
រសៀលថ្ងៃទី១០ ខែមករា ឆ្នាំ២០១៨ គាត់មានស្រុកកំណើតនៅភូមិនេះតែម្តង ដោយឪពុកម្តាយ គឺបានប្រកបរបរដាំថ្នាំជក់រាល់ឆ្នាំ ក្រោយរដូវទឹកទន្លេមេគង្គបានស្រកទៅវិញ ហើយលោកតាផ្ទាល់បានរៀនដាំដុះ និងនូវតែបន្តរបរនេះដដែលទោះបីជាឪពុកម្តាយបានស្លាប់ចោលក្តី ។ លោកមានប្រសាសន៍បន្តថា រាល់ថ្ងៃថ្នាំជក់ដែលបានដុះនោះមានចំនួន៣កន្លែង ស្មើជាង១ម៉ឺនកូន ដោយប្រើរយៈពេលចំនួន៣ខែ និងហុចផលនាំកូនចៅទៅកាច់ ដើម្បីហាលឲ្យស្ងួតល្អ និងហាន់ទុកលក់ ។

កាលពីឆ្នាំ២០១៧កន្លងទៅ គាត់ធ្វើបានជាង២០០គីឡូក្រាម ជាប្រភេទថ្នាំខ្លាំង ហើយមានគេមកទិញដោយក្នុង១គីឡូក្រាម តម្លៃជាង១ម៉ឺនរៀល គឺដោះស្រាយជីវភាពស្ទើរបានគ្រប់គ្រាន់ ។ ដោយឡែកដីចម្ការនៅភូមិទី១ និងទី២ ត្រូវបានបាក់ចូលទៅក្នុងទន្លេមេគង្គអស់ ហើយអ្នកទីនោះក៏មិនបានបង្កបង្កើនផលដាំដុះដំណាំបន្តទៀតដែរ ។ ហើយក្មេងៗសព្វថ្ងៃនេះច្រើនតែនាំគ្នាចេញទៅរកស៊ីនៅស្រុកឆ្ងាយៗ ដើម្បីរកប្រាក់មកផ្តត់ផ្គង់ជីវភាព សូម្បីតែកូនប្រុស-ស្រីរបស់លោកតាផ្ទាល់ រួមទាំងចៅតូចម្នាក់បានទៅស៊ីឈ្មួលគេនៅប្រទេសថៃបាត់ លុះពេលមានរដូវបុណ្យទានម្តងៗទើបត្រឡប់មកផ្ទះ ។ លោកតាបានត្អូញត្អែរថា កម្លាំងគាត់បានចុះខ្សោយ មិនខ្លាំងដូចកាលពីមុនទៀតទេ ចេះតែថយពីមួយឆ្នាំទៅមួយឆ្នាំ សម្រាប់ទីផ្សារនៅឆ្នាំ២០១៨នេះ គាត់មានក្តីរំពឹងថា តម្លៃថ្នាំខ្លាំងមិនចុះទេ គឺប្រហាក់ប្រហែលនឹងឆ្នាំទៅដែរ ។

លោកសន សុខ មេឃុំកោះសំរោង មានប្រសាសន៏ឲ្យដឹងថា ប្រជាពលរដ្ឋនៅឃុំរបស់លោកបានបន្ត
ប្រពៃណីដាំថ្នាំជក់តាំងពីដូនតាមកដល់សព្វថ្ងៃនេះ សព្វថ្ងៃក្នុងប្រទេសកម្ពុជាបានរៀបចំទិវាលុបបំបាត់
ថ្នាំជក់ហើយអាជ្ញាធរកំពុងតែមានផែនការឲ្យពលរដ្ឋ ដាំដំណាំឆ្លាស់ក្នុងនោះមានដូចជា ពោត ត្រសក់
វិញព្រោះមានគំរោងគាំទ្រពីADB ហើយពេលបានផលនឹងជួយរកទីផ្សារឲ្យថែមទៀត ផែនការនេះនឹង
ធ្វើឡើងដើម្បីជួយដល់អ្នកស្រុកកុំឲ្យមានចំណាកស្រុក ។

លោកគឹម សាវឿន ប្រធានមន្ទីរកសិកម្មរុក្ខាប្រមាញ់ និងនេសាទខេត្តវិញមានប្រសាសន៍ឲ្យដឹងដែរថា
ដំណាំថ្នាំជក់នៅក្នុងឆ្នាំ២០១៨ នៅតាមបណ្តាស្រុកមួយចំនួន នៅតាមដងទន្លេមេគង្គ គឺដាំបានប្រមាណ១.៩០០ហិកតា ក្នុងចំណោមដីជាង៣.៤០០ហិកតា ស្មើនឹង៥៨ភាគរយ នៃផែនការ បើ
ប្រៀបធៀបទៅនឹងឆ្នាំ២០១៧ មានចំនួនប្រហាក់ប្រហែលគ្នា ។ ចំពោះតម្លៃទីផ្សាវិញ គឺមានប្រជាកសិករមួយចំនួនបានធ្វើការជាមួយនឹងក្រុមហ៊ុនBAT អាស្រ័យទៅតាមពេលវេលា និងគុណភាពសន្លឹកថ្នាំជក់ ៕