រាជធានីភ្នំពេញ ៖ សិស្សសាលាតូរ្យតន្ត្រី៣នាក់ត្រូវបានរថយន្តឈ្នួលប្រភេទទេសចរណ៍១២កៅអី និងរថយន្តធុនយក្សយីឌុបបុក និងកិន ព្រមគ្នា បណ្តាលឱ្យដាច់ដៃដាច់ជើងបែកខ្លួន និងបែកក្បាលស្លាប់ភ្លាមៗទាំង៣នាក់នៅនឹងកន្លែង ព្រមទាំងខ្ទាតរាយប៉ាយពាសពេញផ្លូវគួរឱ្យរន្ធត់បំផុត រីឯរថយន្តឈ្នួលប្រភេទទេសចរណ៍១២កៅអីនោះក្រោយពេលបុកមនុស្សស្លាប់ ហើយបានជ្រុលទៅមុខជាង៤០ម៉ែត្រ ទើបរេចង្កូតធ្លាក់ចូលទៅក្នុងប្រឡាយទឹក ចំណែករថយន្តធុនយក្សយីឌុបវិញបានបន្ថែមល្បឿនរត់គេចបាត់ស្រមោល ។
ឧប្បត្តិហេតុគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១០និង៤៧នាទីយប់ថ្ងៃទី២៩ វិច្ឆិកា ២០១២ នៅលើកំណាត់ផ្លូវជាតិលេខ៣ ត្រង់ចំណុចភូមិព្រៃកី សង្កាត់ភ្លើងឆេះរទេះ ខណ្ឌពោធិ៍សែនជ័យ ។ យុវជនរងគ្រោះដែលស្លាប់បាត់បង់ជីវិតទាំង៣នាក់ត្រូវបានគេស្គាល់ម្នាក់ឈ្មោះសៅ មករា ភេទប្រុស អាយុ១៩ឆ្នាំ មានទីលំនៅភូមិក្រពើហា សង្កាត់ព្រែកឫស្សី ក្រុងតាខ្មៅ ខេត្តកណ្តាល និង២នាក់ទៀតដែលជាអ្នករួមដំណើរជាមួយគ្នាមិនទាន់ត្រូវបានគេស្គាល់អត្តសញ្ញាណនៅឡើយទេ គ្រាន់តែដឹងថា មានទីលំនៅក្នុងសង្កាត់កំពង់សំណាញ់ ក្រុងតាខ្មៅ ពួកគេទាំង៣នាក់គឺជាសិស្សសាលាតូរ្យតន្ត្រីនៅខេត្តកំពង់ស្ពឺ ។ ពួកគេជិះម៉ូតូមួយគ្រឿងម៉ាកឌ្រីមសេ១២៥ ស៊េរី២០០៨ ពណ៌ខ្មៅ ហើយម៉ូតូនោះបានរងការខូចខាតទាំងស្រុងតែម្តង ។ រថយន្តបង្កមាន២គ្រឿងគឺមួយគ្រឿងប្រភេទទេសចរណ៍១២កៅអី ពណ៌ខៀវ បានជ្រុលទៅមុខរួចធ្លាក់ចូលទៅក្នុងប្រឡាយទឹក ឯអ្នកបើកបររត់គេចខ្លួនបាត់ស្រមោល និងរថយន្តមួយគ្រឿងទៀតមិនស្គាល់ម៉ាកជាប្រភេទរថយន្តធុនយក្សយីឌុបដែលគេមានការសង្ស័យថា ជារថយន្តដឹកគោបានបើករត់គេចទៅបាត់។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ