ក្រុមការងារចម្រុះចុះបោះបង្គោលព្រំដីរដ្ឋ
- សៀមរាប
ខេត្តសៀមរាប ៖ នាថ្ងៃទី១០ ខែមករា ឆ្នាំ២០១៨ គណៈកម្មការចម្រុះ រួមមានអាជ្ញាធរជាតិអប្សរា អាជ្ញាធរក្រុង-ខេត្ត មន្ទីររៀបចំដែនដីនគររូបនីយកម្ម សំណង់…
ខេត្តសៀមរាប ៖ នាថ្ងៃទី១០ ខែមករា ឆ្នាំ២០១៨ គណៈកម្មការចម្រុះ រួមមានអាជ្ញាធរជាតិអប្សរា អាជ្ញាធរក្រុង-ខេត្ត មន្ទីររៀបចំដែនដីនគររូបនីយកម្ម សំណង់…
ខេត្តសៀមរាប ៖ នាថ្ងៃទី១០ ខែមករា ឆ្នាំ២០១៨ គណៈកម្មការចម្រុះ រួមមានអាជ្ញាធរជាតិអប្សរា អាជ្ញាធរក្រុង-ខេត្ត មន្ទីររៀបចំដែនដីនគររូបនីយកម្ម សំណង់ និងសូរិយោដីខេត្ត មេធាវីរបស់អាជ្ញាធរអប្សរា និងកងកម្លាំងសមត្ថកិច្ចចម្រុះ បានចុះធ្វើសកម្មភាពដាំបង្គោលកំណត់ព្រំដី ក្រោយពីក្រុមហ៊ុនរបស់លោកស្រី លី អ៊ុំអេង បានអភិវឌ្ឍន៍ និងចាក់ដីលុបបំពេញលើដីរបស់រដ្ឋ ដែលស្ថិតនៅពីខាងកើតរង្វង់មូលផ្លូវ៦០ម៉ែត្រ ក្នុងភូមិធ្លកអណ្តូង សង្កាត់ស្លក្រាម ក្រុងសៀមរាប ។
លោក ភុំ ប៊ុនផាន់ មេធាវីរបស់អាជ្ញាធរជាតិអប្សរា បានប្រាប់ក្រុមអ្នកសារព័ត៌មានថា ការចុះដាំបង្គោលកំណត់ព្រំដីនេះ គឺដើម្បីបែងចែកឲ្យដាច់រវាងដីកម្មសិទ្ធិឯកជន និងដីរដ្ឋ ចៀសវាងទំនាស់ទៅថ្ងៃក្រោយ ។ លោកបញ្ជាក់ថា លោកស្រី លី អ៊ុំអេង បានអភិវឌ្ឍន៍លើដីផ្ទាល់ខ្លួន ដោយបានចាក់ដីបំពេញដោយទាំងដីរដ្ឋដែលគ្រប់គ្រងដោយអាជ្ញាធរជាតិអប្សរាថែមទៀត ។ មេធាវីនៅមិនទាន់អាចកំណត់ផ្ទៃដីដែលត្រូវគេចាក់រំលោភបាននៅឡើយ តែលោកអះអាងថា មានទំហំប្រហាក់ប្រហែលជិត២ហិកតា ។
នៅពេលក្រុមការងារចម្រុះកំពុងដាំបង្គោលនោះដែរ ភ្លាមៗលោកស្រី លី អ៊ុំអេង ក៏បានមកដល់កន្លែងកើតហេតុ ដោយកាន់ឯកសារ និងបានអះអាងថា ជាប្លង់កម្មសិទ្ធិដីធ្លីស្របច្បាប់របស់លោកស្រី ។ លោកស្រីបានប្រាប់អ្នកសារព័ត៌មានថា គ្រោងនឹងប្តឹងទៅ សម្តេចនាយករដ្ឋមន្ត្រី ព្រោះថាអាជ្ញាធរជាតិអប្សរា មិនព្រមអនុវត្តន៍តាមអនុក្រឹត្យលេខ១៥៨ ដែលរាជរដ្ឋាភិបាលសម្រេចកាត់ដីបុរីសណ្ឋាគារ ទៅប្រជាពលរដ្ឋអាស្រ័យផលវិញ ។
តាមអនុក្រឹត្យលេខ១៥៨ ចុះថ្ងៃទី២៥ ខែកក្កដា ឆ្នាំ២០១៦ រាជរដ្ឋាភិបាលបានសម្រេចកាត់ដីបុរីសណ្ឋាគារប្រគល់ឱ្យប្រជាពលរដ្ឋវិញ ។ ប៉ុន្តែមាត្រា២ នៃអនុក្រឹត្យបានចែងច្បាស់ថា «ការធ្វើប្រទានកម្មជាកម្មសិទ្ធិជូនប្រជាពលរដ្ឋវិញ ចំពោះក្បាលដីទាំងឡាយណាដែលអាជ្ញាធរអប្សរាមិនទាន់បានដោះស្រាយគោលនយោបាយ ហើយបានកាន់កាប់អាស្រ័យផលជាក់ស្តែង» ។
ឯមាត្រា៣ «ប្រគល់ជូនអាជ្ញាធរអប្សរាគ្រប់គ្រងនូវផ្ទៃដីទាំងឡាយណា ដែលបានដោះស្រាយគោលនយោបាយរួចហើយ»។ មេធាវីលោក ភុំ ប៊ុនផាន់ បានឱ្យដឹងទៀតថា ភ្លាមៗអំឡុងពេលលោកស្រី លី អ៊ុំអេង ចាក់ដីបំពេញលើដីអភិវឌ្ឍន៍នៅដើមខែវិច្ឆិកា ឆ្នាំ២០១៧នោះ អាជ្ញាធរជាតិអប្សរាបានចុះទប់ស្កាត់ដែរ ដោយមានដាំបង្គោលបំណងមិនឱ្យរថយន្តដឹកដីចូលចាក់បន្ត តែត្រូវបានលោកស្រី លី អ៊ុំអេង ដកបង្គោលនោះចោល ។
យ៉ាងណា ក៏ដោយសកម្មភាពដឹកដីបានបន្តធ្វើក្រោយលោកស្រី លី អ៊ុំអេង បានដាក់លិខិតសុំអនុញ្ញាតទៅសាលាខេត្តសៀមរាប តែមានភ្ជាប់លក្ខខណ្ឌមុននឹងអនុញ្ញាត គឺការប្រើប្រាស់ផ្លូវ៦០ម៉ែត្រ ត្រូវមានស្នើសុំទៅខាងអាជ្ញាធរជាតិអប្សរាជាមុនសិន ។ ជាក់ស្តែងមិនដូច្នោះទេ លោកស្រី លី អ៊ុំអេង ថែមទាំងចាក់ដីដោយទាំងដីរដ្ឋទៀត ។ នេះជាការពន្យល់របស់លោកមេធាវី ភុំ ប៊ុនផាន់ ។ តាមការបញ្ជាក់របស់លោក ភុំ ប៊ុនផាន់ ករណីដែលលោកស្រី លី អ៊ុំអេង បន្តដកបង្គោលកំណត់ព្រំ ដែលគណៈកម្មការចម្រុះបាន និងកំពុងធ្វើនេះ វាជាបទល្មើសជាក់ស្តែង ហើយលោកនឹងដាក់ពាក្យបណ្តឹងទៅតាមផ្លូវច្បាប់ផងដែរ ។
ជុំវិញករណីខាងលើនោះដែរ លោកស្រី លី អ៊ុំអេង អាយុ៤៥ឆ្នាំ មុខរបរទិញដីលក់ដី ដែលរស់នៅភូមិចុងកៅស៊ូ សង្កាត់ស្លក្រាម ក្រុងសៀមរាប បានចេញមុខប្រាប់អ្នកយកព័ត៌មាននៅលើដីទំនាស់រវាងអាជ្ញាធរអប្សរា និងដីរបស់លោកស្រីរៀបរាប់ប្រាប់ថា «ដីដែលនាងខ្ញុំនេះ កំពុងប្តឹងផ្តល់គ្នាតុលាការ ព្រមទាំងនាងខ្ញុំ បានប្តឹងទៅសម្ដេចតេជោ មិនទាន់ដឹងខាងណាឈ្នះផង បែរជាខាងអាជ្ញាធរក្រុង-ខេត្ត និងខាងអប្សរា នាំគ្នាយកបង្គោលមកបិតលើដីរបស់នាងខ្ញុំ ហាក់បីដូចជារំលោភយកដីប្រជាពលរដ្ឋ ព្រោះនាងខ្ញុំមានប្លង់កម្មសិទ្ធកាន់កាប់ដីធ្លីចេញដោយសូរិយោដីខេត្ត ត្រឹមត្រូវផងដែរ មិនមែនខ្ញុំទៅលួចដីគេទេ ។ ដូច្នេះនាងខ្ញុំ និងប្តឹងបន្តទៀត រហូតដល់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលលោកតែងតែជួយប្រជាពលរដ្ឋ ។»
សូមបញ្ជាក់ផងដែរ បើតាមការបញ្ជាក់ពីមេធាវីរបស់អាជ្ញាធរជាតិអប្សរាផ្ទៃដីដែលត្រូវបានរំលោភនោះ មានទំហំប្រមាណជិត២ហិកតា ដូច្នេះគណៈកម្មការចម្រុះ ដែលមានអាជ្ញាធរជាតិអប្សរា និងសាលាខេត្តសៀមរាប បានចុះដាំបង្គោលកំណត់ព្រំដីនៅតំបន់ផ្លូវ៦០ម៉ែត្រ ដែលស្ថិតនៅភូមិធ្លកអណ្តូង សង្កាត់ស្លក្រាម ក្រុងសៀមរាប ។ ការចុះដាំបង្គោលនេះ ធ្វើឡើងបន្ទាប់ពីក្រុមហ៊ុនឯកជនមួយបានចាក់ដីរំលោភលើដីរដ្ឋ ដែលស្ថិតក្រោមការគ្រប់គ្រងរបស់អាជ្ញាធរជាតិអប្សរា ៕
ចែករំលែកព័តមាននេះ