រាជធានីភ្នំពេញ ៖ បុរសជាព្រូរថយន្តស្ទួចម្នាក់បានលើកស្ទូចទូកុងទ័រនឺ ដើម្បីធ្វើការស្ទូចដាក់លើរថយន្តបែរ ជាផ្លត់ស្នៀតធ្លាក់ស្លាប់បាត់បង់ជីវិតម្នាក់ ខណៈពេលដឹកមកដល់មន្ទីពេទ្យ ។ ហេតុការណ៍កើតឡើងកាលពីវេលាម៉ោង៩និង៤០នាទីយប់ថ្ងៃទី១០ ខែមករា ឆ្នាំ២០១៨ ត្រង់ចំណុចក្នុងផែស្ងួត Toll តាមបណ្តោយផ្លូវបេតុង ស្ថិតក្នុងភូមិអូដឹម សង្កាត់ចោមចៅទី៣ ខណ្ឌពោធិ៍សែនជ័យ។
ជនរងគ្រោះឈ្មោះង៉ាន តូច ភេទប្រុស អាយុ២៣ឆ្នាំ ជាព្រូរថយន្តស្ទូច មានស្រុកកំណើតនៅស្រុកបន្ទាយមាស ខេត្តកំពត ។
សម្តីពីបុរសម្នាក់ដែលជាសន្តិសុខយាមនៅក្នុងផែស្ងួតកើតហេតុខាងលើបានរៀបរាប់ឲ្យដឹងថាបុរសរងគ្រោះខាងលើ គឺមិនមែនជាបុគ្គលិកនៅក្នុងក្រុមហ៊ុនផែស្ងួតកើតហេតុខាងលើនោះទេ គឺដោយសារតែគ្រឿងចាក់នៅក្នុងក្រុមហ៊ុនផែស្ងួតខាងលើនោះខូច ហើយខាងក្រុមហ៊ុនក៏បានជួលខាងក្រុមហ៊ុនរថយន្តស្ទួចដែលបុរសរងគ្រោះធ្វើការនៅក្នុងនោះ ដើម្បីឲ្យមកស្ទូចទូរកុងទ័រនឺ ដាក់លើរថយន្តដឹកចេញទៅតាមដេប៉ូនានា ។ បុរសរងគ្រោះរួមទាំងតៃកុងរថយន្តស្ទួចម្នាក់ទៀត បានមកធ្វើការនៅក្នុងផែស្ងួតកើតហេតុខាងលើ អស់រយៈពេលមួយខែមកហើយ ស្រាប់តែនៅថ្ងៃកើតហេតុបុរសរងគ្រោះដែលជាព្រូតួម ទាំងតៃកុងរថយន្តបានធ្វើការស្ទូចទូរកុងទ័រនឺ ដាក់លើរថយន្ត និងស្ទូចចេញពីរថយន្តដាក់ក្នុងផែជាធម្មតាដូចសព្វដង ។
លុះដល់វេលាកើតហេតុបុរសរងគ្រោះ និងតៃកុងរថយន្តស្ទូចបានធ្វើការស្ទូចទូកុងទ័រនឺទទេមួយ ដែលដាក់ត្រួតនៅពីលើគ្នាចំនួនបីទូ ដោយបុរសរងគ្រោះបានឡើងខាងលើទូកុងទ័រនឺ ដែលនៅខាងលើគេ ដោយមិនបានពាក់នូវខ្សែក្រវ៉ាត់សុវត្ថិភាពឲ្យបានត្រឹមត្រូវនោះទេ ហើយបុរសរងគ្រោះបានយកខ្សែកាបចំនួន២សរសៃទៅថ្ពួងសង់ខាងនៃទូកុងទ័រនឺនោះ ដើម្បីដាក់ទៅលើរថយន្តសណ្តោងមួយគ្រឿងទៀត ។ ដោយខ្វះការប្រុងប្រយ័ត្នបន្ទាប់មកតៃកុងរថយន្តស្ទូចក៏បានធ្វើការស្ទូចទាំងបុរសរងគ្រោះនៅខាងលើទូរកុងទ័រនឺ ខណៈពេលនោះស្រាប់តែខ្សែកាបម្ខាង បានរបូតចេញពីទូកុងទ័រនឺ បណ្តាលឲ្យបុរសរងគ្រោះធ្លាក់ពីលើទូរផ្កាប់មុខទៅនឹងដីរងរបួសធ្ងន់ធ្ងរឈាមចេញតាមត្រចៀក ។ ភ្លាមនោះក៏ត្រូវបានសន្តិសុខដែលយាមនៅក្នុងបាននាំគ្នាប្រញាប់ដឹកតាមម៉ូតូមកសង្គ្រោះនៅមន្ទីពេទ្យព្រះកុសុមៈ តែជាអកុសលខណៈពេលដឹកមកគ្រូពេទ្យបានប្រាប់ថា បុរសរងគ្រោះបានដាច់ខ្យល់ស្លាប់បាត់ទៅហើយ ។
ក្រោយពេលកើតហេតុសពបុរសរងគ្រោះត្រូវបានសាច់ញាតិដឹកយកទៅធ្វើបុណ្យទៅតាមប្រពៃណីនៅឯខេត្តកំពត ដែលជាស្រុកកំណើត ៕
ចែករំលែកព័តមាននេះ