ខេត្តកំពង់ធំ ៖ តំណាងប្រជាពលរដ្ឋបានឲ្យដឹងថា ពួកគាត់រស់នៅភូមិតាឡែកថ្មី ភូមិតាឡែកចាស់ និងភូមិអណ្ដាស ស្ថិតនៅក្នុងឃុំសាលាវិស័យ ស្រុកប្រាសាទបល្ល័ង្គ បានផ្ដិតមេដៃប្ដឹងមេសហគមន៍ជាំម្រេច និងលោកមេភូមិតាឡែកថា…
ខេត្តកំពង់ធំ ៖ តំណាងប្រជាពលរដ្ឋបានឲ្យដឹងថា ពួកគាត់រស់នៅភូមិតាឡែកថ្មី ភូមិតាឡែកចាស់ និងភូមិអណ្ដាស ស្ថិតនៅក្នុងឃុំសាលាវិស័យ ស្រុកប្រាសាទបល្ល័ង្គ បានផ្ដិតមេដៃប្ដឹងមេសហគមន៍ជាំម្រេច និងលោកមេភូមិតាឡែកថា បានឃុបឃិតគ្នាកាប់ និងឈូសឆាយបំផ្លាញព្រៃសហគមន៍ជាំម្រេចដើម្បីរៀបដីលក់ឲ្យឈ្មួញចំនួន៣កន្លែង ក្នុងមួយកន្លែងៗទំហំជាង៣០ហិកតា ទៅនគរបាល។ ពាក់ព័ន្ធករណីខាងលើ លោក យឹម សោភ័ណ្ណ នគរបាលសេដ្នកិច្ច នៃស្នងការខេត្តកំពង់ធំបាន បញ្ជាក់ថា ក្រោយពីបានទទួលបានពាក្យបណ្ដឹងរបស់ប្រជាពលរដ្ឋថា មានករណីមេសហគមន៍ឃុបឃិតជាមួយ មេភូមិតាឡែកថ្មី ភូមិតាឡែកចាស់ ភូមិអណ្ដាស កាប់ឈូសបំផ្លាញព្រៃសហគមន៍ជាំម្រេច ដើម្បីរៀបដីលក់ឲ្យឈ្មួញ លោកក៏បាននាំកម្លាំងសហការណ៍គ្នាជាមួយមន្ត្រីឧទ្យាននុរក្សចុះត្រួតពិនិត្យ បន្ទាប់ពីវាស់នៅចំណុច អូរកន្ទប ឃើញថាមានការកាប់ព្រៃអស់ទំហំជាង ៣០ហិកតាមែនកម្លាំងចម្រុះ និងបន្ដចុះវាស់វែង២កន្លែងផ្សេងទៀតដើម្បីស្រាវជ្រាវរកការពិត។
ចំណែកប្រធានសហគមន៍ជាំម្រេចឈ្មោះ សោម សុភ័ក្រ បានឆ្លើយបដិសេដយ៉ាងខ្លីថា លោកមិនដឹងច្បាស់ទេពីបញ្ហានេះសូមសួរទៅលោកមេភូមិ ទៅ សហគមន៍របស់លោកគ្រប់គ្រងដីតែ ២១០០ហិកតាតែប៉ុណ្ណោះ ក្រៅពីនេះអត់ដឹងទេ។ លោក ហេង សារឿន មេភូមិតាឡែក បានឲ្យដឹងថា ពាក់ព័ន្ធនឹងរឿងនេះលោកកំពុងតែចុះពិនិត្យ និងវាស់វែងជាមួយសមត្ថកិច្ច ឃើញថា ដីដែលឈូសនោះមួយចំនួនជាដីបុស្សចាស់ និងមួយចំនួនទៀតជាដីចម្ការរបស់ប្រជាពលរដ្ឋអាស្រ័យផលគាត់ចង់លក់។ ជុំវិញករណីខាងលើនេះ លោក តុប កក្កដា ប្រធានមន្ទីរបរិស្ថានខេត្តកំពង់ធំ បានឲ្យ កោះសន្តិភាព ដឹងនៅរសៀលថ្ងៃទី១០ ខែមករា ឆ្នាំ២០១៨ នេះថា ដីនេះពិតជាស្ថិតនៅក្នុងដែនគ្រប់គ្រងរបស់ក្រសួងបរិស្ថានមែន តែបានប្រគល់ឲ្យសហគមន៍ជាំម្រេចជាអ្នកគ្រប់គ្រងផ្ទាល់ ចំណែកមន្ទីរបរិស្ថានរងចាំការសហការណ៍ ពីសហគមន៍ពេលត្រូវការកម្លាំង ពេលណាដែលមានសកម្មភាពកាប់ឈូសព្រៃឈើកើតឡើង។
ម្យ៉ាងវិញទៀតមន្ទីរបរិស្ថានក៏ ធ្លាប់បានចុះបង្ក្រាបជាច្រើនដងមកហើយ ចំណែកលោកក៏ធ្លាប់បានទទួលព័ត៌មានពីបងប្អូនប្រជាពលរដ្ឋមកថា ប្រធានសហគមន៍ជាំម្រេច និងមេភូមិតាឡែកគឺជាអ្នករកស៊ីគួជេដីដែរ កន្លងមកលោកបានឲ្យធ្វើការបោះឆ្នោតជ្រើសរើសប្រធាន សហគមន៍ថ្មីដែរ តែបន្ទាប់ពីបោះឆ្នោតរួចជាប់ប្រធានដដែល មូលហេតុដោយសារតែនៅក្នុងសហគមន៍ ជាំម្រេចមានពលរដ្ឋមួយចំនួនធំត្រូវរូវគ្នាជាមួយប្រធានសហគមន៍ដោយបានទទួលផលប្រយោជន៍ពីគ្នា ចំណែកមួយចំនួនតូចទៀតមិនបានទទួលផលប្រយោជន៍ក៏នាំគ្នាប្តឹងទៅ តែ ឬបញ្ហាខាងលើនេះលោកបានចាត់ឲ្យមន្ត្រីរបស់លោកសហការណ៍គ្នាជាមួយនគរបាល និងលោកមេឃុំចុះវាស់វែងឲ្យបានច្បាស់លាស់រួចកសាងសំណុំរឿងដាក់ជូនខាងតុលាការចាត់ការតាមផ្លូវច្បាប់។ ទោះបីយ៉ាងណាក្តីក៏បងប្ទូនប្រជាពលរដ្ឋនៅតែសំណូមពរយ៉ាងទទូចសុំឲ្យ អាជ្ញាធរមូលដ្ឋាន និងមន្ទីរជំនាញដែលពាក់ព័ន្ធសូមមេត្តាចាត់វិធានការទប់ស្កាត់ និងដោះស្រាយឲ្យពួកគាត់ជាបន្ទាន់ ដើម្បីឲ្យពួកគាត់បានព្រៃនៅគង់វង្ស និងបានអាស្រ័យផល បោចវល្លិ៍ បោចផ្ដៅ និងកាប់ឧសលក់ ដើម្បីជីវភាព៕
ចែករំលែកព័តមាននេះ