រាជធានីភ្នំពេញ ៖ បុរសជនសង្ស័យម្នាក់រួម នឹងស្រីស្នេហ៍ម្នាក់ពាក់ព័ន្ធទៅនឹងករណីគ្រឿងញៀនត្រូវបានកម្លាំងមានសមត្ថកិច្ចខណ្ឌពោធិសែនជ័យសហការជាមួយ និងកម្លាំងនគរបាលប៉ុស្តិ៍ផ្សារដើមថ្កូវ ចាប់វាយខ្នោះដៃជាប់ ម្តងទៀត ខណៈដែលរូបគេបាននាំស្រីស្នេហ៍ម្នាក់មកដេកនៅផ្ទះសំណាក់យីហោ«សុវណ្ណគីរី» កាលពីយប់មិញ បុរសរូបនេះ…
រាជធានីភ្នំពេញ ៖ បុរសជនសង្ស័យម្នាក់រួម នឹងស្រីស្នេហ៍ម្នាក់ពាក់ព័ន្ធទៅនឹងករណីគ្រឿងញៀនត្រូវបានកម្លាំងមានសមត្ថកិច្ចខណ្ឌពោធិសែនជ័យសហការជាមួយ និងកម្លាំងនគរបាលប៉ុស្តិ៍ផ្សារដើមថ្កូវ ចាប់វាយខ្នោះដៃជាប់ ម្តងទៀត ខណៈដែលរូបគេបាននាំស្រីស្នេហ៍ម្នាក់មកដេកនៅផ្ទះសំណាក់យីហោ«សុវណ្ណគីរី» កាលពីយប់មិញ បុរសរូបនេះ រួមនឹងស្រីម្នាក់ខាងលើត្រូវបានកម្លាំងនគរបាលប៉ុស្តិ៍ទំនប់ទឹកចាប់វាយខ្នោះដៃម្តង រួចមកហើយ ដោយសារតែស្ត្រីជាប្រពន្ធតាមទាន់ឃើញពួកគេទាំងពីរនាក់ កំពុងជិះម៉ូតូឌុបគ្នាតាមផ្លូវ ហើយស្រែកថា«ចោរៗ»ធ្វើឱ្យមានការយល់ច្រឡំ និងដោះលែងទៅវិញនោះ ។
ការចាប់ឃាត់ខ្លួននេះដែរបានធ្វើឡើងកាលពីវេលាម៉ោង១០និង១៥នាទីព្រឹកថ្ងៃទី១០ ខែមករា ឆ្នាំ២០១៨ នៅផ្ទះសំណាក់សុវណ្ណគីរី ផ្ទះលេខ៤៩៧ ទីតាំងបណ្តោយផ្លូវលេខ២៧១ក្នុងសង្កាត់ផ្សារដើមថ្កូវ ខណ្ឌចំការមន ។
ព័ត៌មានពីនគរបាលប្រាប់ឱ្យដឹងថា បុរសដែលបានចាប់ឃាត់ខ្លួនឈ្មោះសំ តុលា អាយុ៣២ឆ្នាំ មានទីលំនៅក្នុងសង្កាត់ចោមចៅ ខណ្ឌពោធិសែនជ័យ ចំណែកឯស្ត្រីជាស្រីស្នេហ៍ឈ្មោះលីលី ពាក់ព័ន្ធទៅនឹងករណីគ្រឿងញៀន ។ ការចាប់ឃាត់ខ្លួនគូស្នេហ៍ទាំងពីរនាក់ខាងលើនេះដែរបុរសជាជនសង្ស័យម្នាក់ខាងលើរួមទាំងស្រីស្នេហ៍របស់គេ គឺបានធ្វើឡើងក្រោយពីមានការស្រាវជ្រាវឃើញថា ពួកគេទាំងពីរនាក់មានពាក់ព័ន្ធទៅនឹងករណីគ្រឿងញៀនទើបធ្វើការសហការគ្នា និងឈានដល់ការចុះមកចាប់ខ្លួននៅក្នុងផ្ទះសំណាក់ខាងលើតែម្តង ។ តាមប្រភពដដែលបានប្រាប់បន្តទៀតថា គូរស្នេហ៍ប្រុស-ស្រីជាជនសង្ស័យទាំងពីរនាក់នេះ ត្រូវបានកម្លាំងនគរបាលប៉ុស្តិ៍ទំនប់ទឹកចាប់វាយខ្នោះជាប់គ្នាម្តងរួចមកហើយ ។
ដោយសារតែបុរសម្នាក់ខាងលើបានជិះម៉ូតូមួយគ្រឿងឌុបគ្នាតាមផ្លូវ ហើយស្ត្រីជាប្រពន្ធតាមទាន់ និងជិះម៉ូតូដេញតាមស្រែកថា«ចោរៗ» ធ្វើឲ្យមានការភ្ញាក់ផ្អើលកើតឡើងទៅដល់កម្លាំងមានសមត្ថកិច្ចល្បាត និងដេញចាប់បានដាក់ខ្នោះជាប់គ្នានោះ ។ ពេលបញ្ជូនពួកគេទាំងពីរនាក់មកនគរបាលប៉ុស្តិ៍ទំនប់ទឹករួចហើយ កម្លាំងសម្ថកិច្ចក៏បានធ្វើការសួរនាំទៅទើបដឹងថា ជារឿងប្រពន្ធតាមទាន់ប្តីឌុបស្រីស្នេហ៍ និងមិនមានពាក់ព័ន្ធទៅនឹងករណីចោរកម្មអ្វីនោះក៏ធ្វើការដោះលែងពួកគេទាំងពីរនាក់ ឲ្យមានសិរីភាពវិញទាំងយប់នោះ ។
ក្រោយពីកម្លាំងសមត្ថកិច្ចនគរបាលប៉ុស្តិ៍ទំនប់ទឹកធ្វើការដោះលែងបុរសម្នាក់ខាងលើរួម និងស្ត្រីជាស្រីស្នេហ៍ឲ្យត្រឡប់ទៅវិញនោះ ពួកគេទាំងពីរនាក់មិនបានបែកគ្នាទៅផ្ទះឡើយ ហើយបាននាំគ្នាទៅដេកនៅផ្ទះសំណាក់ ខាងលើលុះព្រឹកឡើងក៏ត្រូវកម្លាំងមានសមត្ថកិច្ចធ្វើការស្រាវជ្រាវ និងតាមចាប់វាយខ្នោះបញ្ជូនទៅកាន់អធិការដ្ឋាននគរបាលខណ្ឌពោធិសែនជ័យ ដើម្បីចាត់ការទៅតាមផ្លូវច្បាប់ជាបន្តទៅទៀត ៕
ចែករំលែកព័តមាននេះ