សហរដ្ឋអាមេរិក ៖ ចៅក្រមអាមេរិកមួយរូបកាលពីថ្ងៃទី៩ មករា បានរាំងខ្ទប់ការលុបចោលរបស់ប្រធានាធិបតីលោកដូណាល់ ត្រាំ កម្មវិធីមួយដែលអនុញ្ញាតឱ្យបណ្តាយុវជនចូលមកសហរដ្ឋអាមេរិក ដោយខុសច្បាប់កាលពីពេលពួកគេនៅតូចអាចធ្វើការ និងសិក្សាដោយស្របច្បាប់ ។
ចៅក្រមលោក WILLIAM ALSUP នៃទីក្រុងសាន់ហ្វ្រាន់ស៊ីស្កូ រដ្ឋកាលីហ្វ័រនីញ៉ាបានចេញបញ្ជាដល់រដ្ឋការលោកត្រាំ បន្តអនុវត្តកម្មវិធីនេះហៅកម្មវិធី DACA នៅទូទាំងសហរដ្ឋអាមេរិក ។ ចៅក្រុមរូបនេះយល់ថា មតិរបស់ក្រសួងយុត្តិធម៌ ដែលថាកម្មវិធី DACA អនុម័តកាលក្នុងអាណត្តិប្រធានាធិបតី លោកបារ៉ាក់ អូបាម៉ា ពុំស្របច្បាប់ដោយផ្អែកលើមូលដ្ឋានគតិយុត្តិពុំត្រឹមត្រូវ ។
លោកត្រាំ ថ្លែងកាលពីខែកញ្ញាថា លោកលុបចោលកម្មវិធី DACA ក៏ប៉ុន្តែពន្យារពេល
អនុវត្តរយៈពេល៦ខែ រហូតដល់ខែមីនាខាងមុខនេះ ដើម្បីទុកពេលឱ្យសភាស្វែងរកដំណោះស្រាយសម្រាប់ពួកអ្នកទាំងនេះ ។
ក្នុងអាណត្តិលោកអូបាម៉ា យុវជនអន្តោប្រវេសន៍វ័យក្មេងទាំងនេះត្រូវបានការពារពីការចាប់បណ្តេញចេញពីសហរដ្ឋអាមេរិក ។ កម្មវិធីនេះអាចឱ្យជនអន្តោប្រវេសន៍វ័យក្មេងស្ថិតក្នុងស្ថានភាពពុំស្របច្បាប់៦៩០.០០០នាក់ ធ្វើការ និងសិក្សាដោយស្របច្បាប់នៅសហរដ្ឋអាមេរិក ៕
ចែករំលែកព័តមាននេះ