រាជធានីភ្នំពេញ ៖ អ្នកនាំពាក្យក្រសួងការពារជាតិ លោកឈុំ សុជាតិ បានមានប្រសាសន៍នាព្រឹកថ្ងៃទី២៣ មីនា ២០១១ ថា ជំហររបស់កម្ពុជានៅតែឱ្យប្រទេសឥណ្ឌូណេស៊ីក្នុងនាមជាប្រធានអាស៊ាន ចូលរួមជាអ្នកសង្កេតការណ៍នៅក្នុងកិច្ចប្រជុំនានារវាងកម្ពុជា-ថៃក៏ដូចជាមកអង្កេតមើលពីបទឈប់បាញ់ដដែល ។ ការថ្លែងរបស់លោកឈុំ សុជាតិ អ្នកនាំពាក្យក្រសួងការពារជាតិយ៉ាងដូច្នេះធ្វើឡើងបន្ទាប់ពីមេទ័ពថៃ លោកឧត្តមសេនីយ៍ប្រាយុទ្ធ ចាន់អូចា បាននិយាយកាលពីថ្ងៃអង្គារម្សិលមិញថា ថៃបានសម្រេចមិនទៅចូលរួមកិច្ចប្រជុំគណៈកម្មការព្រំដែនទូទៅថៃ-កម្ពុជា (GBC) លើកទី៨ ដែលគ្រោងនឹងធ្វើឡើងនៅទីក្រុងបូហ្គ័រ ប្រទេសឥណ្ឌូណេស៊ី នាថ្ងៃទី៧ និង៨ មេសា ខាងមុខនោះទេ ដោយនៅតែចចេសថា កិច្ចពិភាក្សាណាមួយត្រូវតែធ្វើជាលក្ខណៈទ្វេភាគី ។
ឧត្តមសេនីយ៍ប្រាយុទ្ធបាននិយាយថា យើងនឹងមិនទៅទេ ។ យើងមិនចង់បានកិច្ចប្រជុំដែលធ្វើនៅប្រទេសទី៣ទេ ។ ទាហាននៃប្រទេសទាំង២ មានភាពជិតស្និទ្ធនឹងគ្នាណាស់ ។ កិច្ចពិភាក្សាគួរធ្វើរវាងទាហាននៃប្រទេសទាំង២ប៉ុណ្ណោះ ហើយភាគីទី៣ មិនគួរពាក់ព័ន្ធទេ ។ លោកប្រាយុទ្ធ ក៏បានច្រានចោលសំណើរបស់កម្ពុជាសម្រាប់បង្កើតប៉ុស្តិ៍ត្រួតពិនិត្យចំនួន១៥កន្លែង ដែលរួមគ្នាប្រចាំការនៅទីនោះដោយទាហានថៃ និងកម្ពុជានៅតំបន់ជម្លោះ៤,៦គីឡូម៉ែត្រ ដើម្បីសម្រួលដល់អ្នកសង្កេតការណ៍ឥណ្ឌូណេស៊ី ។ ថ្លែងតាមទូរស័ព្ទប្រាប់កោះសន្តិភាពនៅព្រឹកថ្ងៃពុធ ទី២៣ មីនា នេះ អ្នកនាំពាក្យក្រសួងការពារជាតិ លោកឧត្តមសេនីយ៍ឯកឈុំ សុជាតិ បានចាត់ទុក ការលើកឡើងរបស់មេទ័ពថៃដូចខាងលើនេះ គឺបញ្ជាក់យ៉ាងច្បាស់ថា ថៃមិនគោរពតាមសេចក្តីសម្រេចនៃកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិថ្ងៃទី១៤ កុម្ភៈ និងកិច្ចប្រជុំថ្នាក់រដ្ឋមន្ត្រីការបរទេសអាស៊ាន នៅទីក្រុងហ្សាកាតា ប្រទេសឥណ្ឌូណេស៊ី ថ្ងៃទី២២ កុម្ភៈ កន្លងមកនេះទេ ។
គួរបញ្ជាក់ថា កិច្ចប្រជុំគណៈកម្មការទូទៅថៃ-កម្ពុជាហៅកាត់ជាភាសាអង់គ្លេសថា GBC នោះ តាមគម្រោងនឹងត្រូវប្រារព្ធធ្វើនៅទីក្រុងបូហ្គ័រ ប្រទេសឥណ្ឌូណេស៊ី នៅថ្ងៃទី២៤ និង២៥ មីនា ខាងមុខ ប៉ុន្តែដោយសារតែភាគីថៃអះអាងថា ពុំមានពេលវេលាគ្រប់គ្រាន់ក្នុងការចូលរួមក្នុងកិច្ចប្រជុំនេះ ទើបពន្យារពេលទៅធ្វើនៅថ្ងៃទី៧ ទី៨ មេសា ២០១១ ខាងមុខនេះវិញ ។ គណៈកម្មការទូទៅថៃ-កម្ពុជានេះ មានរដ្ឋមន្ត្រីក្រសួងការពារជាតិនៃប្រទេសទាំង២ជាសហប្រធាន ។ ទាក់ទងទៅនឹងសំណួររបស់កោះសន្តិភាពដែលសួរថា ប្រសិនបើកិច្ចប្រជុំគណៈកម្មការទូទៅថៃ-កម្ពុជា ភាគីថៃមិនចូលរួម តើជំហររបស់កម្ពុជានឹងធ្វើអ្វីជាបន្តនោះ អ្នកនាំពាក្យក្រសួងការពារជាតិលោកឧត្តមសេនីយ៍ឯកឈុំ សុជាតិ បានបញ្ជាក់ថា ពេលវេលានៅយូរដែរ ដូច្នេះអ្វីៗអាចនឹងមានការផ្លាស់ប្តូរ ៕
ចែករំលែកព័តមាននេះ