ការប្រកួតពានរង្វាន់អង់គ្លេសលីគខាប់ បានឈានមកដល់វគ្គពាក់កណ្តាលផ្តាច់ព្រ័ត្រហើយនៅរាត្រីនេះ គឺជាការជួបគ្នារវាងក្រុមChelsea និងក្រុម Arsenal ។
ក្រុមម្ចាស់ផ្ទះ Chelsea តែងតែរឹងមាំក្នុងទឹកដីរបស់ខ្លួន ហើយពួកគេសង្ឃឹមថា នឹងអាចបំបាក់គូប្រកួត ដើម្បីបន្តក្តីស្រមៃក្រសោបពាន ។
ការប្រកួតក្នុងទឹកដី១១ប្រកួតចុងក្រោយ ក្រុមតោខៀវធ្វើបានយ៉ាងល្អដោយទទួលបានជ័យជម្នះ៩ដង និងស្មើ២ដង ។ យោងតាមការចេញផ្សាយរបស់គេហទំព័រទស្សន៍ទាយកីឡាបាល់ទាត់ បានឱ្យដឹងថា រដូវកាលនេះ ក្លិប Chelsea មានឱកាសឈ្នះគូប្រកួតនៅលើទឹកដីរបស់ខ្លួន ៧១% ។ បញ្ហាចោទសម្រាប់ក្រុមម្ចាស់ផ្ទះ គឺភាពស្ទាក់ស្ទើរពីវត្តមានរបស់កីឡាករ Eden Hazard ខណៈខ្សែបម្រើចំណូលថ្មី Ross Barkley ដែល Chelsea ទើបទិញពីក្លិប Everton អាចនឹងដាក់ចូលលេងនៅរាត្រីនេះ ។
ចំណែកក្រុមភ្ញៀវ Arsenal គេសង្កេតឃើញថា នៅរដូវកាលនេះពួកគេហាក់មានរាសីស្រុតចុះយ៉ាងខ្លាំង និងទើបតែធ្លាក់ចេញពីការប្រកួតពានរង្វាន់ FA Cup ក្រោមថ្វីជើងក្រុមមកពីឆេមពានស៊ីប Nottingham ។ ម្យ៉ាងទៀត ជំនួបចុងក្រោយជាមួយក្រុមតោខៀវនៅលើទឹកដីខ្លួនឯង ក៏ Arsenal មិនអាចធ្វើអ្វីពួកគេបានដែរ ។ ដូច្នេះការធ្វើដំណើរទៅទឹកដី Stamford Bridge លើកនេះ Arsenal សង្ឃឹមតិចណាស់ថានឹងទទួលបានលាភសំណាង ។
ចំពោះស្ថានភាពកូនក្រុមវិញ Arsenal អាចនឹងបាត់បង់កីឡាករសំខាន់ពីររូបក្នុងនោះមាន Olivier Giroud និង Aaron Ramsey ។
ជំនួបរវាងក្រុមខ្លាំងទាំងពីរក្នុងជើងទី១នេះ ក្រុម Chelsea មានភាគរយឈ្នះច្រើនជាងក្រុមភ្ញៀវ ផ្អែកលើស្ថានភាពកីឡាករ និងទម្រង់លេងនាពេលបច្ចុប្បន្ន ។
បាល់ទាត់អង់គ្លេសលីគខាប់ វគ្គពាក់កណ្តាលផ្តាច់ព្រ័ត្រ ជើងទី 1 នារាត្រីថ្ងៃពុធនេះមាន 1 ប្រកួត ។ ក្រុមតោខៀវ Chelsea អាចទម្លុះរបាំងការពាររបស់ក្រុមកាំភ្លើងធំ Arsenal បានទេ ?
ចែករំលែកព័តមាននេះ