រាជធានីភ្នំពេញ ៖ មន្ត្រីជាន់ខ្ពស់ក្រសួងកសិកម្មបានលើកឡើងថា ជាមួយនឹងសមិទ្ធផលជាច្រើនក្នុងវិស័យកសិកម្មសម្រេចបាននាពេលកន្លងមក កម្ពុជាក៏នៅមានបញ្ហាប្រឈមជាច្រើនដែលកំពុងកើតមានក្នុងខ្សែសង្វាក់តម្លៃផលិតកម្មកសិកម្ម ក្នុងនោះបញ្ហាសំខាន់ជាងគេមាន៨ចំណុចកំពុងជួបប្រទះ និងត្រូវមានវិធានការដោះស្រាយ ។ ថ្លែងក្នុងវេទិកាស្តីពីកសិកម្មកន្លងមក លោក…
រាជធានីភ្នំពេញ ៖ មន្ត្រីជាន់ខ្ពស់ក្រសួងកសិកម្មបានលើកឡើងថា ជាមួយនឹងសមិទ្ធផលជាច្រើនក្នុងវិស័យកសិកម្មសម្រេចបាននាពេលកន្លងមក កម្ពុជាក៏នៅមានបញ្ហាប្រឈមជាច្រើនដែលកំពុងកើតមានក្នុងខ្សែសង្វាក់តម្លៃផលិតកម្មកសិកម្ម ក្នុងនោះបញ្ហាសំខាន់ជាងគេមាន៨ចំណុចកំពុងជួបប្រទះ និងត្រូវមានវិធានការដោះស្រាយ ។
ថ្លែងក្នុងវេទិកាស្តីពីកសិកម្មកន្លងមក លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា ក្នុងសង្វាក់ផលិតកម្មកសិកម្មនាពេលបច្ចុប្បន្ន មានបញ្ហាប្រឈម៨ចំណុចសំខាន់ៗដូចជា ៖
១-បញ្ហាទាក់ទងនឹងធាតុចូលកសិកម្ម រួមមាន ពូជ ជីកសិកម្ម និងថ្នាំកសិកម្ម ។
២-ពុំទាន់កំណត់ផែនទីដាំដុះដំណាំកសិកម្មឱ្យបានសមស្របទៅតាមភូមិសាស្ត្រនីមួយៗ និងការប្រែប្រួលអាកាសធាតុ ។
៣-ការផ្ដល់បច្ចេកទេសកសិកម្មដល់កសិករ សហគមន៍កសិកម្ម នៅមិនទាន់ឆ្លើយតបគ្រប់គ្រាន់ទៅនឹងការរីកចម្រើននៃទំហំផលិតកម្មកសិកម្មនៅឡើយ ។
៤-ផលិតកម្មក្នុងស្រុកពុំទាន់បានបំពេញគ្រប់គ្រាន់ទៅតាមតម្រូវការ និងមានការនាំចូលបន្លែ ។
៥-ពិបាករកទីផ្សារផលិតផលកសិកម្ម គឺនៅមានចំណុចខ្វះខាតមួយចំនួនក្នុងការអនុវត្តផលិតកម្មកសិកម្មតាមកិច្ចសន្យា បញ្ហាថ្លៃដើមផលិតកម្ម និងកៃច្នៃខ្ពស់ ។
៦-បទល្មើសចលនាសត្វ ការលួចនាំចូលផលិតផលកសិកម្មដោយខុសច្បាប់នៅតាមច្រកព្រំដែន ព្រមទាំងបទល្មើសព្រៃឈើជលផល ទំនាស់ដីធ្លី ការហ៊ុមព័ទ្ធដីព្រៃឈើធ្វើជាកម្មសិទ្ធិដោយខុសច្បាប់ កង្វះធនធានមនុស្ស និងថវិកាសម្រាប់គាំទ្រគោលនយោបាយ និងបច្ចេកទេស ការផ្ដល់កិច្ចសហការ និងការសម្របសម្រួលយន្តការស្ថាប័ននៅមានកម្រិត ។
៧-ការជំរុញការអភិវឌ្ឍតាមវិស័យសម្រាប់គាំទ្រដល់សកម្មភាពឧស្សាហកម្មនៅមានល្បឿនយឺត មិនទាន់មានភាពឆ្លើយឆ្លង និងប្រទាក់ក្រឡាគ្នានៅឡើយ ។
៨-ការប្រែប្រួលរបបពាណិជ្ជកម្មដែលបណ្ដាលមកពីនិន្នាការគាំពារនិយម និងការហូរត្រឡប់ទៅវិញនៃវិនិយោគផ្ទាល់ពីបរទេស ដែលតម្រូវឱ្យកម្ពុជាពង្រឹងសមត្ថភាពទីផ្សារក្នុងស្រុក និងខិតខំទាញយកអត្ថប្រយោជន៍ជាអតិបរមាពីការចូលរួមក្នុងសមាហរណកម្មសេដ្ឋកិច្ចតំបន់ ។
បើទោះបីជាបញ្ហាប្រឈមទាំងនេះកំពុងកើតមានក្នុងសង្វាក់ផលិតកម្មសព្វថ្ងៃ ប៉ុន្តែដើម្បីដោះស្រាយបញ្ហា ក៏ដូចជាតម្រង់ទិសក្នុងការអភិវឌ្ឍវិស័យកសិកម្ម ក្រសួងកសិកម្មបាននិងកំពុងយកចិត្តទុកដាក់លើវិធានការពង្រីក និងធ្វើទំនើបកម្មសហគ្រាសកសិកម្មធុនតូច និងមធ្យម និងពង្រឹងសមត្ថភាពសហគមន៍កសិកម្មឱ្យមានលក្ខណៈអាជីព ដោយជំរុញឱ្យអនុវត្តបច្ចេកវិទ្យាសមស្រប និងអនុវត្តផលិតកម្មកសិកម្មតាមកិច្ចសន្យា ។ ក្រសួងក៏លើកកម្ពស់ការចូលរួមវិនិយោគពីវិស័យឯកជន ក្នុងការគ្រប់គ្រងខ្សែសង្វាក់តម្លៃកសិកម្ម ដើម្បីផ្សារភ្ជាប់កសិករខ្នាតតូចទៅនឹងទីផ្សារតាមអភិក្រមភាពជាដៃគូរវាងរដ្ឋ ឯកជន ផលិតករ និងសហគមន៍ ។
ជាមួយគ្នានេះ ក្រសួងក៏ត្រូវតម្រង់ទិសការជួយគាំទ្រទាំងឡាយ ពិសេសការផ្តល់បច្ចេកទេស ផលិតកម្ម ប្រើប្រាស់ពូជសុទ្ធមានទិន្នផលខ្ពស់ ស្របតាមតម្រូវការទីផ្សារ និងបច្ចេកទេសដាំដុះថែទាំ រហូតដល់ពេលប្រមូលផល ។
លោករដ្ឋមន្ត្រីថ្លែងថា ៖« ក្រសួងបន្តលើកកម្ពស់វិធានអនាម័យ និងភូតគាមអនាម័យ ដោយយកចិត្តទុកដាក់ទៅលើយន្តការក្របខ័ណ្ឌគតិយុត្ត និងបច្ចេកវិទ្យា ដើម្បីសម្រួលពាណិជ្ជកម្ម សមាហរណកម្ម សេដ្ឋកិច្ច និងទទួលបានទីផ្សារផលិតផលកសិកម្មក្នុងតំបន់ និងអន្តរជាតិ » ។
ទន្ទឹមនឹងនេះ បង្កើតក្រុមការងារសម្របសម្រួលថ្នាក់ខេត្ត ដើម្បីជួយដោះស្រាយបញ្ហាពាក់ព័ន្ធនឹងការងារស្រូវអង្ករនៅមូលដ្ឋាន ។ កិច្ចការនេះចាំបាច់ត្រូវតែបន្តពង្រឹងឱ្យបានសកម្ម ថែមទៀត ដើម្បីជួយកសិករ និងពាណិជ្ជករឱ្យមានសកម្មភាពសេដ្ឋកិច្ចរស់រវើក មានលក្ខណៈប្រទាក់ក្រឡាគ្នា និងមានប្រសិទ្ធភាពខ្ពស់ ។
លោកឧកញ៉ា សុង សារ៉ន នាយកក្រុមហ៊ុន អេមរុ រាយស៍ មានប្រសាសន៍ថា ៖« ទន្ទឹមនឹងកសិករកំពុងជួបបញ្ហាប្រឈម ការចំណាយថ្លៃដើមទៅលើការទិញប្រេងសាំង និងជីគីមី ក៏មានតម្លៃខ្ពស់ ដែលត្រូវរកវិធីយ៉ាងណាឲ្យតម្លៃចុះថោក ។ លើសពីនេះ យើងគួរព្យាយាមពង្រីកផ្លូវទឹក ឬប្រព័ន្ធស្រោចស្រពសម្រាប់កសិកម្មជូនកសិករឱ្យបានច្រើន ដើម្បីកាត់បន្ថយការចំណាយរបស់កសិករ » ៕
ចែករំលែកព័តមាននេះ