ខេត្តសៀមរាប ៖ ប្លង់ស្ថាបត្យកម្មនៃព្រលានយន្តហោះថ្មីនៅខេត្តសៀមរាបដែលមានតម្លៃវិនិយោគប្រមាណ៩០០លានដុល្លារត្រូវបានបង្ហាញ និងត្រូវបានដាក់ឆ្លងសម្តេចតេជោ ហ៊ុន សែន នាយករដ្ឋមន្ត្រីកម្ពុជា ដើម្បីចុះហត្ថលេខាក្នុងពេលដំណើរទស្សនកិច្ច របស់លោកលឺ ខឺឈាង…
ខេត្តសៀមរាប ៖ ប្លង់ស្ថាបត្យកម្មនៃព្រលានយន្តហោះថ្មីនៅខេត្តសៀមរាបដែលមានតម្លៃវិនិយោគប្រមាណ៩០០លានដុល្លារត្រូវបានបង្ហាញ និងត្រូវបានដាក់ឆ្លងសម្តេចតេជោ ហ៊ុន សែន នាយករដ្ឋមន្ត្រីកម្ពុជា ដើម្បីចុះហត្ថលេខាក្នុងពេលដំណើរទស្សនកិច្ច របស់លោកលឺ ខឺឈាង នាយករដ្ឋមន្ត្រីចិនមកបំពេញទស្សនកិច្ចនៅកម្ពុជាចាប់ពីថ្ងៃទី១០ដល់១២ ខែមករានេះ។
អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលលោកស៊ិន ចាន់ សិរីវុត្ថាបានថ្លែងឲ្យដឹងកាលពីថ្ងៃទី០៩ ខែមករា ឆ្នាំ២០១៨ថា ព្រលានយន្តហោះថ្មីខេត្តសៀមរាបនឹងត្រូវសាងសង់នាពេលឆាប់ៗនេះ នៅលើផ្ទៃដីជាង៧០០ហិកតា និងបោះទុនវិនិយោគលើទឹកប្រាក់ ៨៨០លានដុល្លារអាមេរិកក្រោមការវិនិយោគ ដោយក្រុមហ៊ុន YUNAN Development Group ដែលជាក្រុមហ៊ុនយក្សមួយ មានមូលដ្ឋាននៅប្រទេសចិន ។
ប្លង់ស្ថាបត្យកម្មនេះមានចំនួន៦ជម្រើស និងត្រូវបានដាក់ឆ្លងសម្តេចតេជោ ដើម្បីជ្រើសរើសសម្រេចលើកចុងក្រោយរួចហើយ ប៉ុន្តែរហូតមកទល់ពេលនេះមិនមានប្រភពណាបញ្ជាក់ថា សម្តេចតេជោ នឹងជ្រើសរើសប្លង់ស្ថាបត្យកម្ម ណាមួយនៅឡើយទេ ។ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងលោកលឺ ខឺឈាង និងអញ្ជើញជាអធិបតីក្នុងពិធីចុះហត្ថលេខាក្នុងការសម្រេចយកប្លង់ស្ថាបត្យកម្មណាមួយនៃប្លង់ស្ថាបត្យកម្មថ្មីទាំងនេះ ។ ទីប្រឹក្សាសមាគមទីភ្នាក់ងារទេសចរណ៍កម្ពុជាលោកហូ វណ្ឌី បានថ្លែងថា ការសាងសង់ព្រលានយន្តហោះអន្តរជាតិថ្មីក្នុងស្រុកសូទ្រនិគម ខេត្តសៀមរាបនឹងជាការជួយជម្រុញកំណើនសេដ្ឋកិច្ច និងភ្ញៀវទេសចរណ៍អន្តរជាតិមកទស្សនាកម្ពុជាបន្ថែមទៀត ពិសេសជាការទាក់ទាញក្រុមហ៊ុនអាកាសចរណ៍ធំៗ មកចុះចតនៅកម្ពុជាដោយសារសមត្ថភាពព្រលានយន្តហោះថ្មីនេះអាចអនុញ្ញាតឲ្យយន្តហោះខ្នាតធំចុះចតបាន ។
លោកបន្តថា ការកើនឡើងនូវសេវាដឹកជញ្ជូនផ្លូវអាកាស និងនាំមកនូវទំហំពាណិជ្ជកម្មការវិនិយោគ និងកំណើនភ្ញៀវទេសចរណ៍កាន់តែច្រើនមកទស្សនាកម្ពុជា ៕
ចែករំលែកព័តមាននេះ