រាជធានីភ្នំពេញ ៖ រថយន្តដឹកថ្មបើកបុកម៉ូតូ២គ្រឿងស្លាប់៣នាក់រងរបួសធ្ងន់ម្នាក់ និងបុកផ្ទប់រថយន្ត៣គ្រឿងទៀត បង្កមានការភ្ញាក់ផ្អើលកាលពីវេលាម៉ោង០៦និង៤០នាទីយប់ ថ្ងៃទី០៩ ខែមករា ឆ្នាំ២០១៨ តាមបណ្ដោយផ្លូវជាតិលេខ៤ កែងផ្លូវQMI…
រាជធានីភ្នំពេញ ៖ រថយន្តដឹកថ្មបើកបុកម៉ូតូ២គ្រឿងស្លាប់៣នាក់រងរបួសធ្ងន់ម្នាក់ និងបុកផ្ទប់រថយន្ត៣គ្រឿងទៀត បង្កមានការភ្ញាក់ផ្អើលកាលពីវេលាម៉ោង០៦និង៤០នាទីយប់ ថ្ងៃទី០៩ ខែមករា ឆ្នាំ២០១៨ តាមបណ្ដោយផ្លូវជាតិលេខ៤ កែងផ្លូវQMI ទល់មុខវិទ្យាល័យជម្ពូវ័ន្ត ដែលស្ថិតនៅភូមិជម្ពូវ័ន្ដ សង្កាត់ចោមចៅ៣ ខណ្ឌពោធិ៍សែនជ័យ ។
រថយន្តបង្កម៉ាកហ៊ីយ៉ាន់ដាយ ពណ៌ស្លែ ពាក់ស្លាកលេខ ខេមរៈភូមិន្ទ ០២ ៣-៣៩៣៦ ជារថយន្តដឹកថ្មអងដឺ បើកក្នុទិសដៅពីលិចទៅកើត ។ ចំណែកម៉ូតូរងគ្រោះម៉ាកហុងដាឌ្រីម ស៊េរី២០០១ ពណ៌ខៀវ ពាក់ស្លាកលេខ កំពត ១D-៧៩២២ ជិះគ្នា៣នាក់ ម្តាយ និងកូនស្លាប់ ឪពុករងរបួសធ្ងន់ បើកបរក្នុងទិសដៅពីកើតទៅលិច ។ ម៉ូតូរងគ្រោះមួយគ្រឿងទៀតម៉ាកហុងដាឌ្រីម ស៊េរី២០១៥ ពណ៌ខ្មៅ ពាក់ស្លាកលេខ តាកែវ ១J-៥៦៨៧ បើកដោយបុរសម្នាក់ (ស្លាប់) ក្នុងទិសដៅពីលិចទៅកើត និងរថយន្តរងគ្រោះជាបន្តបន្ទាប់ចំនួន៣គ្រឿងទៀត ទី១.រថយន្តកូរ៉េដឹកមាន់ ពណ៌ខៀវ ពាក់ស្លាកលេខ ភ្នំពេញ ២AG-១៤៥២ បើកបរស្របគ្នាលិចទៅកើត ទី២.រថយន្តកូរ៉េ ពណ៌ស ដឹកកម្មកររោងចក្របើកស្របគ្នា រងការខូចខាតតិចតួច មិនមានរងគ្រោះឡើយ បើកក្នុងទិសដៅស្របគ្នាលិចទៅកើត និងរថយន្តមួយគ្រឿងទៀតមិនចាំម៉ាក ។
សពស្ត្រីរងគ្រោះមានឈ្មោះ សួន ធារ៉ា ភេទស្រី អាយុ២៥ឆ្នាំ មុខរបរកម្មការិនីរោងចក្រ ស្នាក់នៅបុរីសែនមនោរម្យ ភូមិកន្ទោកជើង សង្កាត់កន្ទោក ខណ្ឌពោធិ៍សែនជ័យ មានស្រុកកំណើតនៅខេត្តកំពង់ចាម និងកូនប្រុសអាយុ៣ឆ្នាំ ចំណែកប្តីមានឈ្មោះ ពេជ ពៅអាយុ២៨ឆ្នាំ មុខរបរកម្មកររោងចក្រ ស្នាក់នៅជាមួយគ្នា ។ ឬឯសពបុរសម្នាក់ទៀតឈ្មោះ ឈៀន សាមិត ហៅវិត អាយុ៤៣ឆ្នាំ មុខរបរយោធា និងជាបុគ្គលិកក្រុមហ៊ុនឯកជន រស់ភូមិវិហារខ្ពស់ ឃុំវាំងចាស់ ស្រុកឧដុង្គ ខេត្តកំពង់ស្ពឺ ។ តៃកុងរថយន្តបង្កមានឈ្មោះ យឹម ភារម្យ ភេទប្រុស អាយុ២៩ឆ្នាំ មុខរបរបើករថយន្ត នៅភូមិកំពង់ស្នែងរមាំង ឃុំខេមជំនះពេន ស្រុកសំរោង ខេត្តតាកែវ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញម៉ូតូរងគ្រោះខាងលើ បើកបរក្នុងទិសដៅពីលិចទៅកើតដោយបើកពីមុខរថយន្តបង្ក លុះបើកមកដល់ចំណុចកើតហេតុដោយសារផ្លូវកែង ហើយរថយន្តរងគ្រោះនៅខាងមុខបានបន្ថយល្បឿន ស្រាប់តែរថយន្តបង្ក បើកក្នុងទិសដៅពីលិចទៅកើតស្របគ្នា បានដាច់ហ្វ្រាំងជ្រុលទៅបុកម៉ូតូរងគ្រោះ២គ្រឿង ហើយជ្រុលទៅបុកផ្ទប់រថយន្ត២គ្រឿងទៀតជាមួយរថយន្តដឹកមាន់ បណ្ដាលឱ្យស្លាប់ស្ត្រី និងកូន ព្រមទាំងបុរសម្នាក់ទៀតជិះម៉ូតូមួយគ្រឿងទៀត ចំណែកបុរសត្រូវជាប្តីរងរបួសធ្ងន់ ។
ក្រោយពេលកើតហេតុ រថយន្តបង្កព្រមទាំងម៉ូតូរងគ្រោះ និងរថយន្តរងគ្រោះនៅលើ ត្រូវបាននគរបាលចរាចរណ៍ផ្លូវគោករាជធានីភ្នំពេញ ធ្វើការវាស់វែង និងយកទៅរក្សាទុក ដើម្បីរង់ចាំការដោះស្រាយថ្ងៃក្រោយ ៕
ចែករំលែកព័តមាននេះ