ការកែទម្រង់រដ្ឋធម្មនុញ្ញដែលស្នើឡើងដោយរដ្ឋអំណាចយោធាអេហ្ស៊ីបសំដៅរៀបចំឱ្យបានឆាប់រហ័សនូវការបោះឆ្នោតប្រធានាធិបតី និងសភាដោយសេរី និងពហុបក្សត្រូវបានអនុម័តកាលពីថ្ងៃទី២០ មីនា ដោយសម្លេងភាគច្រើនគឺដល់៧៧% ។ ប៉ុន្តែអត្រានៃអ្នកចូលរួមបោះប្រជាមតិមានត្រឹមតែ៤១,២% ប៉ុណ្ណោះ ក្នុងចំណោមអ្នកបោះឆ្នោត៤៥លាននាក់ ដែលនោះជាការឆ្លុះបញ្ចាំង ថា ពលរដ្ឋអេហ្ស៊ីបភាគច្រើនមានការភ័យខ្លាចក្រែងអតីតគណបក្សកាន់អំណាចគឺគណបក្សជាតិប្រជាធិបតេយ្យ PND និងគណបក្សរបស់ពួកបងប្អូនអ៊ិស្លាមជាគណបក្សប្រឆាំងសំខាន់អាចយកចំណេញពីការបោះឆ្នោតដ៏ប្រញាប់ប្រញាល់នោះ ។
រយៈពេល៣០ឆ្នាំ នៃការកាន់អំណាចអតីតប្រធានាធិបតីអេហ្ស៊ីបលោកហូស្នី មូបារ៉ាក់ បានរាំងខ្ទប់មិនឱ្យមានក្រុមប្រឆាំងនានាដែលជាប្រភពនៃការងើបបះបោរបណ្តេញលោកចេញពីអំណាចកាលពីថ្ងៃទី១១ កុម្ភៈ ។
ក្នុងចំណោមចំណុចនៃការកែទំរង់រដ្ឋធម្មនុញ្ញនេះមានជាពិសេសការកម្រិតអាណត្តិប្រធានាធិបតីត្រឹមតែ២អាណត្តិប៉ុណ្ណោះហើយក្នុងមួយអាណត្តិមានរយៈពេល៤ឆ្នាំ ។ ពួកយោធាដែលកំពុងកាន់អំណាចនាពេលនេះឱ្យដឹងថា ខ្លួនចង់ប្រគល់អំណាចដល់ជនស៊ីវិលឱ្យបានឆាប់រហ័សបំផុតតាមដែលអាចធ្វើទៅបាន ហើយឱ្យដឹងថា ការបោះឆ្នោតសភាអាចធ្វើក្នុងខែកញ្ញាមុនការបោះឆ្នោតប្រធានាធិបតី ។ ឥស្សរជន២រូបបានប្រកាសឈរឈ្មោះជាបេក្ខជនប្រធានាធិបតីរួចហើយ គឺអគ្គលេខាធិការសម្ព័ន្ធអារ៉ាប់លោកអាមរ៍ មូសា និងអតីតនាយករបស់ទីភ្នាក់ងារថាមពលបរមាណូអន្តរជាតិលោកម៉ូហាម៉េដ អែលបារ៉ាដេ ។ ក្រុមបងប្អូនអ៊ិស្លាមនិយាយថា ពួកគេ នឹងមិនមានបេក្ខជនប្រធានាធិបតីឡើយ៕
ចែករំលែកព័តមាននេះ