រាជធានីភ្នំពេញ ៖ ចោរពីរនាក់បានជិះម៉ូតូធ្វើសកម្មភាពឆក់ទូរស័ព្ទ i Phone 6plus ពីនារីម្នាក់បានសម្រេច ខណៈកំពុងតែអង្គុយចុចលេងនៅលើម៉ូតូ កាលពីវេលាម៉ោង៨ និង៣០នាទីយប់ថ្ងៃទី៦ មករា នៅមុខមន្ទីរពេទ្យព្រះកុសុមៈ តាមផ្លូវ២៧១ ក្នុងសង្កាត់ទឹកល្អក់២ខណ្ឌទួលគោក ។
នារីរងគ្រោះដែលត្រូវចោរឆក់ទូរស័ព្ទនោះឈ្មោះ សេង ស្រីពៅ អាយុ២០ឆ្នាំ ជានិសិត្សឆ្នាំទី២ ស្នាក់នៅក្នុងសង្កាត់ភ្នំពេញថ្មី ខណ្ឌសែនសុខ និងនារីម្នាក់ទៀតរួមដំណើរជាមួយគ្នា សុំមិនបញ្ចេញឈ្មោះ ពួកនាងជិះម៉ូតូមួយគ្រឿងម៉ាកហុងដាឌ្រីម ស៊េរី២០០៧ ពណ៌ខ្មៅ ពាក់ស្លាកលេខ ភ្នំពេញ 1I -6702 ។
តាមសម្ដីនារីរងគ្រោះបានប្រាប់ឲ្យដឹងថា នៅមុនពេលកើតហេតុ ពួកនាងទាំងពីរនាក់បានជិះម៉ូតូឌុបគ្នាយកស្បែកជើងទៅឲ្យមិត្តភក្តិដោយអង្គុយលើម៉ូតូចាំនៅមុខមន្ទីរពេទ្យព្រះកុសុមៈ ដែលជាកន្លែងកើតហេតុ ។ នៅពេលរង់ចាំនោះនាងបានដកទូរស័ព្ទពីហោប៉ៅខោមកចុចលេង ស្របពេលនោះមានចោរ២នាក់ ជិះម៉ូតូម្នាក់មួយគ្រឿង និងមិនចាំស្លាកលេខបានមកធ្វើសកម្មភាពឆក់ទូរស័ព្ទរបស់នាងម៉ាក i Phone 6plus ពីដៃបានសម្រេច ហើយជិះម៉ូតូគេចខ្លួនបាត់ដោយសុវត្តិភាព ។
ក្រោយពេលកើតហេតុសមត្ថកិច្ចមូលដ្ឋាន នគរបាលប៉ុស្ដិ៍ទឹកល្អក់២ បានចុះមកដល់កន្លែងកើតហេតុ ហើយបានត្រឹមតែនាំនារីរងគ្រោះ ទៅដាក់ពាក្យបណ្ដឹង ៕
ចែករំលែកព័តមាននេះ