ខេត្តបន្ទាយមានជ័យ ៖ បុរសម្នាក់បាត់ខ្លួន២យប់៣ថ្ងៃទើបប្រទះឃើញសពក្នុងចំការដំឡូងសង្ស័យករណីឃាតកម្មត្រូវគេសម្លាប់បង្កការភ្ញាក់ផ្អើលនៅភូមិអូរឬស្សី សង្កាត់ផ្សារកណ្តាល ក្រុងប៉ោយប៉ែត ។ ជនរងគ្រោះឈ្មោះ ឡាច សម្ភស្ស…
ខេត្តបន្ទាយមានជ័យ ៖ បុរសម្នាក់បាត់ខ្លួន២យប់៣ថ្ងៃទើបប្រទះឃើញសពក្នុងចំការដំឡូងសង្ស័យករណីឃាតកម្មត្រូវគេសម្លាប់បង្កការភ្ញាក់ផ្អើលនៅភូមិអូរឬស្សី សង្កាត់ផ្សារកណ្តាល ក្រុងប៉ោយប៉ែត ។ 
ជនរងគ្រោះឈ្មោះ ឡាច សម្ភស្ស ភេទប្រុស អាយុ២៦ឆ្នាំ មានទីលំនៅភូមិអូរនាង សង្កាត់កើតហេតុមកស្នាក់នៅជួយដកដំឡូងជាមួយឱពុក និងបងប្អូនប្រុសស្រីបង្កើត និងបងថ្លៃសរុប៥នាក់នៅក្បែរកន្លែងកើតហេតុប្រហែល១០០ម៉ែត្រ ។
តាមប្រភពពីបងប្រុសជនរងគ្រោះឈ្មោះ ឡាច សុផា អាយុ២៩ឆ្នាំ ប្រាប់សមត្ថកិច្ចថា កាលពីព្រលប់ថ្ងៃទី០៧ ខែមករា ឆ្នាំ២០១៨ ជនរងគ្រោះបានជិះម៉ូតូម៉ាកMSX ពណ៌លឿង មកកន្លែងស្នាក់នៅធ្វើចំការក្បែរកន្លែងកើតហេតុដោយញ៉ាំបាយទឹកជុំបងប្អូន ខណៈឱពុកមិននៅកន្លែងទេទាល់យប់ជ្រៅបានវិត្រឡប់មកវិញ ។ បុរសជាបងបន្តថា ក្រោយញ៉ាំអាហាររួមគ្នាខ្លួន និងបងប្អូននាំគ្នាដេកមិនដឹងថា ប្អូនប្រុសទៅណាឡើយ ។
លុះព្រឹកថ្ងៃទី៨ថ្ងៃខែដដែលពេលក្រោកពីដេកឃើញតែម៉ូតូបាត់មនុស្សហើយចុចទូរស័ព្ទមិនចូលទើបដឹងថា បាត់ហើយនៅព្រឹកថ្ងៃទី៩នេះទើបប្រទះឃើញសពដេកស្លាប់ផ្កាប់មុខខាងលិចកន្លែងស្នាក់នៅប្រហែល១០០ម៉ែត្រ ។ នៅកន្លែងកើតហេតុគេឃើញមាបកាំបិតបុ័ងតោចំនួន២ប្រឡាក់សុទ្ធតែឈាមពេលនេះសមត្ថកិច្ចពាក់ព័ន្ធក្នុងខេត្ត និងក្រុងប៉ោយប៉ែតកំពុងស្ថិតនៅកន្លែងកើតហេតុហើយបើកការត្រួតពិនិត្យ និងធ្វើកោសល្យវិច្ច័យ និងកំពុងសាកសួរបងប្អូន និងឱពុកជនរងគ្រោះដើម្បីរកមូលហេតុ ។
ករណីខាងលើត្រូវបានលោក ភឿង ម៉ាន់សឹ នាយការិយាល័យកម្រិតធ្ងន់នៃស្នងការនគរបាលខេត្តសន្និដ្ឋានបឋមថា ជាការធ្វើឃាតដោយខ្លួនឯងគ្មានអ្នកវាយសម្លាប់ទេ ព្រោះលើរូបរាងកាយជនរងគ្រោះពុំមានស្លាកស្នាមគឺមានតែស្នាមអា.កខាងស្តាំ ម្យ៉ាងកាំបិតដែលប្រទះឃើញនៅកន្លែងកើតហេតុយកចេញពីកន្លែងស្នាក់នៅ ។ លោកបន្តថា បើជនដទៃសម្លាប់ជនរងគ្រោះក៏អាចបងប្អូនឮសម្រែកដែរព្រោះមិនដល់១០០ម៉ែត្រផង រីឯបងប្អូនបង្កើតក៏មិនអាចសម្លាប់គ្នាយកអ្វីដែរ ៕
ចែករំលែកព័តមាននេះ