រាជធានីភ្នំពេញ ៖ នាងជួន ចាន់រតនា ហៅក្អយ តារាកំប្លែងល្បីឈ្មោះ ប៉ុន្តែបាត់មុខមួយរយៈលើវេទិកាក៏ដូចជាកញ្ចក់ទូរទស្សន៍ត្រូវបានសមត្ថកិច្ចក្រសួងមហាផ្ទៃដោះលែងឱ្យមានសេរីភាពវិញ កាលពីវេលាម៉ោង៩យប់ថ្ងៃទី២២ មីនា ២០១១ បន្ទាប់ពីនាងចរចាត្រូវរ៉ូវជាមួយម្ចាស់បំណុល (ម្ចាស់រថយន្ត) ដោយយល់ព្រមប្រគល់ប្លង់ដីនៅតាមផ្លូវជាតិលេខ៣ ម្តុំវត្តស្លែងរបស់នាងទៅឱ្យម្ចាស់រថយន្ត ដើម្បីឱ្យម្ចាស់រថយន្តបញ្ចេញលុយទៅលោះរថយន្តដែលនាងក្អយយកទៅបញ្ចាំ ។
ការដោះលែងនេះ ធ្វើឡើងគ្រាន់តែបញ្ចប់សំណុំរឿងបណ្តឹងពីម្ចាស់បំណុល (ម្ចាស់រថយន្ត) ឈ្មោះទី សុធីតា មួយម្ចាស់ប៉ុណ្ណោះ ចំណែកម្ចាស់បំណុល និងម្ចាស់រថយន្តជាច្រើននាក់ទៀត កំពុងស្ថិតក្នុងដៃព្រះរាជអាជ្ញាអមសាលាដំបូងរាជធានីភ្នំពេញនៅឡើយ ដោយព្រះរាជអាជ្ញាកំពុងចាត់នីតិវិធីស៊ើបអង្កេតបឋម ដូច្នេះក្នុងរយៈពេលស៊ើបអង្កេតបឋមនេះ នាងក្អយមិនត្រូវបានឃាត់ខ្លួន ឬចាប់ខ្លួននោះទេ…ប៉ុន្តែនៅពេលស៊ើបអង្កេតច្បាស់លាស់ហើយ និងរកឃើញកំហុសឆបោកណាមួយនោះ តុលាការនឹងចេញដីកាកោះហៅ…ដីកានាំខ្លួន…និងចុងក្រោយ គឺដីកាចាប់ខ្លួន…។
គួររំឭកថា នាងជួន ចាន់រតនា ហៅអយ ឬក្អយ ដែលជាតារាកំប្លែងល្បីឈ្មោះបោះសំឡេងតាមកញ្ចក់ទូរទស្សន៍ និងកម្មវិធីផ្សេងៗ កាលពីថ្ងៃទី២១ មីនា បានត្រូវសមត្ថកិច្ចនគរបាលព្រហ្មទណ្ឌក្រសួងមហាផ្ទៃនាំខ្លួនពាក់ព័ន្ធនឹងបណ្តឹងខ្ចីរថយន្តគេច្រើនគ្រឿងបែរជាយកទៅបញ្ចាំ ។
ទាក់ទិននឹងការនាំខ្លួននាងអយនេះ ត្រូវបានមន្ត្រីនគរបាលក្រសួងមហាផ្ទៃឱ្យដឹងថា នាងអយត្រូវបានឈ្មោះទី សុធីតា ប្តឹងចោទប្រកាន់ពីបទឆបោកយករថយន្តរបស់គេ២គ្រឿងបើគិតជាទឹកប្រាក់មានតម្លៃជាង៣ម៉ឺនដុល្លារសហរដ្ឋអាមេរិក ។ ដើមចមក្នុងបណ្តឹងនេះគឺឈ្មោះទី សុធីតា មានរថយន្ត២គ្រឿង ១គ្រឿងប្រភេទទួរីស១២កៅអី និង១គ្រឿងទៀតឡិចស៊ីស RX 300 ត្រូវនាងអយជួលយកទៅដឹកសំភារសំអាងការតាមកម្មវិធីនានាក្នុងរាជធានីភ្នំពេញ ។ ពេលជួលរថយន្ត ដើមបណ្តឹង និងនាងអយបានធ្វើកិច្ចសន្យាជួលត្រឹមត្រូវ មិនខ្វះចន្លោះពីផ្លូវច្បាប់នោះឡើយ តែក្រោយពេលជួលរថយន្តនោះហើយបានតែប៉ុន្មានថ្ងៃ នាងអយក៏យករថយន្តរបស់ដើមបណ្តឹងទៅបញ្ចាំយកប្រាក់ ។
ក្រោយពីទទួលដំណឹងថា នាងអយយករថយន្តទៅដាក់បញ្ចាំខុសពីកិច្ចសន្យាជួលយកទៅធ្វើអាជីវកម្មនោះ ដើមបណ្តឹងបានណាត់ជួបនាង ជាច្រើនលើកសុំយករថយន្តមកវិញ ប៉ុន្តែនាងអយចេះតែគេចវេះ ។ បន្ទាប់មកទើបដើមបណ្តឹងបង្ខំចិត្តដាក់ពាក្យបណ្តឹងទៅកាន់សមត្ថកិច្ចនគរបាលការិយាល័យព្រហ្មទណ្ឌ កំរិតធ្ងន់ក្រសួងមហាផ្ទៃ ហើយនៅថ្ងៃទី២១ មីនា ដើមបណ្តឹងបានសហការជាមួយសមត្ថកិច្ចនាំខ្លួននាងអយទៅក្រសួងមហាផ្ទៃ ដើម្បីឱ្យនាងយករថយន្តមកប្រគល់ឱ្យវិញ ។ ប៉ុន្តែជាលទ្ធផល គឺនាងអយមានតែគ្រឿងសំអាងប៉ុណ្ណោះដាក់តម្កល់ចំពោះសមត្ថកិច្ច ។ ចំពោះបណ្តឹងមួយករណីនេះគឺគូភាគីទាំង២កំពុងធ្វើការសម្រុះសម្រួលគ្នា ព្រោះ ពេលនេះនាងអយបានប្រាប់សមត្ថកិច្ចថា នាងមានដីមួយកន្លែងនៅខេត្តកំពង់ស្ពឺ តែដីនោះមានតម្លៃត្រឹម៣.០០០ដុល្លារប៉ុណ្ណោះ និងមានសំភារសំអាងការមួយចំនួនទៀត តែអាសយដ្ឋានគ្មានទេ គឺជាផ្ទះជួល ។ ដូច្នេះ ប្រការនេះហើយបានជាដើមបណ្តឹងបង្ខំចិត្តទាមទារឱ្យសមត្ថកិច្ចចាត់ការតាមផ្លូវច្បាប់ ព្រោះទឹកប្រាក់ប្រមាណជាង៣ម៉ឺនដុល្លារលើតម្លៃរថយន្តរកសងមិនបានឡើយ ។
ប្រភពព័ត៌មាននៅសាលាដំបូងរាជធានីភ្នំពេញបានឱ្យដឹងថា នាងជួន ចាន់រតនា ហៅអយ ត្រូវគេប្តឹងច្រើនដែលសុទ្ធតែរឿងជួលរថយន្ត គេជិះបែរជាយកទៅបញ្ចាំដូចខាងលើ ។ មានដើមបណ្តឹងពីឈ្មោះឈុំ សុគន្ធណារិទ្ធ និងឈ្មោះឈ ប៊ុនឆាយ អស់រថយន្ត៥គ្រឿង ដែលសំណុំរឿងស្ថិតលើព្រះរាជអាជ្ញារង២រូប កំពុងស៊ើបអង្កេតបឋម ។ ប្រភពព័ត៌មានពីសាលាដំបូងដដែលបានឱ្យដឹងទៀតថា នាងអយមិនមែនមានត្រឹមតែរឿង ប៉ុណ្ណឹងទេ គឺនៅជំពាក់ប្រាក់គេវ័ណ្ឌកច្រើនទៀត ដូច្នេះទំនងមិនអាចគេចផុតពីការចោទប្រកាន់តាមផ្លូវច្បាប់នោះឡើយ ពោលគឺអាចឃុំខ្លួនបណ្តោះអាសន្នក៏ថាបាន ។ រហូតមកដល់ល្ងាចថ្ងៃទី២២ មីនា នាងអយស្ថិតនៅក្នុងការឃាត់ខ្លួនរបស់សមត្ថកិច្ចក្រសួងមហាផ្ទៃនៅឡើយ ៕
ចែករំលែកព័តមាននេះ