ទីក្រុងប៉េកាំង ៖ ប្រទេសចិនបាននិយាយថា ខ្លួនបានបញ្ចប់ការសាងសង់ស្ពានដែលវែងជាងគេនៅលើពិភពលោកតាមការគ្រោងទុក បន្ទាប់ពីដំឡើងប្រព័ន្ធភ្លើងបំភ្លឺ និងសាកល្បង ។
គេបានចំណាយពេលរហូតដល់៦ឆ្នាំសម្រាប់ការសាងសង់ស្ពានប្រវែង៥៥គីឡូម៉ែត្រនេះ ដែលតភ្ជាប់ទីក្រុងហុងកុង ជូហៃ និងម៉ាកាវ ។
លោក Zhang Jinwen នាយកគម្រោងនៅស្ពានហុងកុង ជូហៃ និងម៉ាកាវ បាននិយាយថា ក្នុងរយៈពេលប៉ុន្មានសប្តាហ៍ខាងមុខនេះ វិស្វករ និងអ្នកសាងសង់នឹងសាកល្បងសម្របសម្រួលប្រព័ន្ធ និងឧបករណ៍របស់ស្ពាន ហើយបន្តធ្វើការត្រួតពិនិត្យ និងសម្អាត។
លោក Zhang និយាយថា ៖« ស្ពាននេះនឹងដាក់ឲ្យដំណើរការបន្ទាប់ពីបញ្ចប់ការសាងសង់កំពង់ផែរបស់ខ្លួន ហើយគ្រប់គ្រងដោយគយត្រួតពិនិត្យអធិការកិច្ច » ។
លោក Su Yi ជំនួយការប្រធានអាជ្ញាធរស្ពានហុងកុង ជូហៃ និងម៉ាកាវ បាននិយាយថាក្នុងរយៈពេល១៤ឆ្នាំកន្លងមកនេះ បណ្តាញដឹកជញ្ជូនផ្នែកសេដ្ឋកិច្ច និងការដឹកជញ្ជូនក្នុងតំបន់បានផ្លាស់ប្តូរយ៉ាងខ្លាំង ដែលនាំឲ្យអាជ្ញាធរត្រូវត្រួតពិនិត្យឡើងវិញនូវអត្រាប្រើប្រាស់ស្ពាន ។
ប៉ុន្តែលោកបានច្រានចោលការព្រួយបារម្ភដែលថា ស្ពាននេះនឹងគ្មានមនុស្សច្រើនធ្វើដំណើរ ដោយលើកឡើងថា យើងមានទំនុកចិត្តពេញទំហឹងទៅលើស្ពាននេះនាពេលអនាគត ៕
ចែករំលែកព័តមាននេះ