រាជធានីភ្នំពេញ ៖ នៅពេលរដូវប្រាំងចូលមកដល់បន្ទាប់ពីច្រូតកាត់ប្រមូលផលស្រូវរួច ប្រជាពលរដ្ឋនៅតាមស្រុកស្រែ ដែលមានចិញ្ចឹមគោនោះ តែងតែមានទម្លាប់មួយលែងគោចោលឲ្យដើរស៊ីស្មៅនៅតាមវាលស្រែដោយមិនបានឃ្វាលនោះទេ ។ ពួកគាត់បានលែងគោចេញពីក្រោលនៅវេលាព្រឹក និងដេញវាឲ្យផុតតែពីផ្ទះចង់ពួកវាដើរទៅស៊ីនៅកន្លែងណាក៏ទៅៗ ។…
រាជធានីភ្នំពេញ ៖ នៅពេលរដូវប្រាំងចូលមកដល់បន្ទាប់ពីច្រូតកាត់ប្រមូលផលស្រូវរួច ប្រជាពលរដ្ឋនៅតាមស្រុកស្រែ ដែលមានចិញ្ចឹមគោនោះ តែងតែមានទម្លាប់មួយលែងគោចោលឲ្យដើរស៊ីស្មៅនៅតាមវាលស្រែដោយមិនបានឃ្វាលនោះទេ ។
ពួកគាត់បានលែងគោចេញពីក្រោលនៅវេលាព្រឹក និងដេញវាឲ្យផុតតែពីផ្ទះចង់ពួកវាដើរទៅស៊ីនៅកន្លែងណាក៏ទៅៗ ។ បន្ទាប់មកពួកគាត់បាននាំគ្នាត្រឡប់ទៅធ្វើការងារផ្ទះរៀងៗខ្លួន ហើយដល់វេលាថ្ងៃត្រង់ឬវេលារសៀល ម្ចាស់គោខ្លះក៏បានតាមទៅមើលគោរបស់ខ្លួនមួយភ្លែតដើម្បីឲ្យដឹងថា គោរបស់ខ្លួនកំពុងស្ថិតនៅកន្លែងណាប៉ុណ្ណោះ ក៏ត្រឡប់មកផ្ទះវិញហើយ ។ រហូតដល់វេលាល្ងាចជិតយប់ទើបដេញប្រមូលវាចូលក្រោលវិញ រីឯគោខ្លះវាបានវិលត្រឡប់ចូលក្រោលដោយខ្លួនឯង ដោយមិនចាំបាច់ម្ចាស់ទៅតាមរកដេញវាឡើយ ។
ចំណែកឯម្ចាស់គោខ្លះទៀត ក្រោយពេលលែងគោចេញពីក្រោលរួច ពួកគាត់មិនបានខ្វល់តាមទៅមើលទេ លុះរហូតដល់វេលាល្ងាចជិតយប់ទើបចេញតាមរកដេញគោ ក្រោយពេលមិនឃើញវាត្រឡប់មកផ្ទះវិញ ។ មានអ្នកខ្លះក៏រកឃើញគោត្រឡប់មកផ្ទះវិញតាមបំណង និងអ្នកខ្លះទៀតបាត់រកមិនឃើញ ហើយពួកគាត់មិនត្រឹមតែពឹងពាក់ឲ្យអ្នកជិតខាងជួយតាមរកប៉ុណ្ណោះទេ ថែមទាំងរត់រកគ្រូហោរាឲ្យជួយទស្សន៍ទាយគន់គូររកគោរបស់ខ្លួនថែមទៀតផង ហើយខ្លះក៏តាមរកឃើញមកវិញ និងខ្លះទៀតបាត់រហូតតែម្ដង ។
បញ្ហាខាងលើមិនខុសពីពាក្យមួយដែលគេតែងនិយាយថា មានមាស១ជីឬ២ជី ខំវេចផងខ្ចប់ផងទុកដាក់ក្នុងទូត្រឹមត្រូវព្រោះខ្លាចចោរលួច បាត់ ។ ប៉ុន្តែគោក្នុង១ក្បាលតម្លៃពី៥០០ទៅ១០០០ ឬ១៥០០ដុល្លារ បែរជាលែងចោលមិនខ្លាចចោរលួចឬបាត់បង់សោះ នេះគឺជាទម្លាប់មួយដែលគួរតែកែឲ្យអស់ទៅ ។
គោដែលលែងចោលមានបញ្ហាប្រឈមជា ច្រើនណាស់ដូចជា៖
ទី១-ការបាត់បង់ដោយចោរលួចចាប់យកទៅលក់ទាំងថ្ងៃ
ទី២-បាត់ដោយសារតែពួកវាដោយញីដោយឈ្មោល ។ គោឈ្មោលដើរស្វែងរកមេគោ ដល់ទីឆ្ងាយរហូតដល់វង្វេងទៅតាមហ្វូងគោផ្សេងទៀត ។
ទី៣-ត្រូវងាប់ដោយធ្លាក់ចូលក្នុងរណ្ដៅដីឬអន្លុងជាដើមនៅពេលដែលពួកវារកទឹកផឹក
ទី៤-រដូវប្រាំងជារដូវក្ដៅដែលងាយឲ្យគោកើតមានជំងឺផ្សេងៗខ្លាំងណាស់
ទី៥-ថ្វីដ្បិតតែរដូវប្រាំងការច្រូតកាត់ប្រមូលផលស្រូវតាមស្រែរួចរាល់មែន ប៉ុន្តែក៏មានដំណាំផ្សេងៗនៅតាមផ្ទះអ្នកស្រុកតាមបណ្ដាភូមិនានាដែលផ្ទះខ្លះមានរបង និងខ្លះអត់របងទេ ។ គោបានចូលទៅស៊ីដំណាំធ្វើឲ្យម្ចាស់ផ្ទះមានការក្ដៅក្រហាយវាយឬកាប់គោឲ្យរបួស ពិការ ដែលបង្ខំចិត្តឲ្យពួកគាត់ជាម្ចាស់លក់ក្នុងតម្លៃថោកៗទៅឲ្យឈ្មួញ។
ទី៦-សម័យនេះមានការអភិវឌ្ឍនៅតំបន់ស្រុកស្រែចម្ការ មានភ្លើងអគ្គិសនីប្រើប្រាស់មិនមែនប្រើចង្កៀងប្រេងកាតឬអាគុយបំភ្លឺដូចមុនទេ ហើយពេលគោដើរស៊ីស្មៅនៅក្បែរបង្គោលភ្លើងត្រូវចរន្តអគ្គិសនីឆក់ងាប់ជាបន្តបន្ទាប់ទៀតផង ។
ទី៧-ប៉ះពាល់សណ្ដាប់ធ្នាប់ចរាចរណ៍តាមដងផ្លូវសាធារណៈ និងបង្កគ្រោះថ្នាក់ចរាចរណ៍ថែមទៀតផង ហើយក៏នៅមានបញ្ហាប្រឈមនានាជាច្រើនទៀតដែលធ្វើឲ្យពួកគាត់ជាម្ចាស់គោខាតបង់ ។
ប្រជាពលរដ្ឋមួយចំនួនបាននិយាយថា ការលែងគោចោលនៅរដូវប្រាំងក្រោយពីការប្រមូលផលស្រូវរួច មិនមែនទើបតែអនុវត្តនោះទេ គឺធ្វើឡើងតាមទម្លាប់តាំងពីយូរយារមកហើយ ។ ព្រោះរដូវប្រាំងនៅស្រុកស្រែគ្មានដំណាំដែលឲ្យគោស៊ីនាំឲ្យមានការខាតបង់នោះទេ ម្យ៉ាងទៀតវាខុសពីខែវស្សាដែលសម្បូរស្មៅអាចចងគោឲ្យស៊ី ឬច្រូតដាក់ទ្រុងឱ្យគោស៊ីក៏បានដែរ ។
ដូច្នោះហើយទើបតាំងពីដើមរៀងមក ពលរដ្ឋមួយចំនួនតែងនាំគ្នាលែងចោលនៅខែប្រាំងឲ្យវាដើរស៊ីជញ្ជ្រាំងស្រូវពេលថ្ងៃ ហើយដល់ពេលល្ងាចកៀងចូលក្រោល យប់ឡើងដាក់ចំបើងឲ្យស៊ីថែម ។ ដោយឡែកនៅដើមខែវស្សាជាពេលដែលចាប់ផ្ដើមសាបព្រោះដកស្ទូងស្រូវ ទើបពួកគាត់ចាប់ចងព្រោះខ្លាចស៊ីសំណាប។មិនតែប៉ុណ្ណោះមួយរយៈពេលដែលលែងគោចោលនោះ ពួកគាត់បានទំនេរពីការឃ្វាលគោមកធ្វើការងារផ្ទះនិងប្រកបរបររកស៊ីផ្សេងៗបាន ។
ដោយឡែក អាជ្ញាធរសង្កាត់និងឃុំមួយចំនួនរបស់ខណ្ឌពោធិ៍សែនជ័យ រាជធានីភ្នំពេញ និងស្រុកអង្គស្នួល ខេត្តកណ្ដាល ដែលមានប្រជាពលរដ្ឋចិញ្ចឹមគោច្រើនដែរនោះ បានឲ្យដឹងថា កន្លងមកអាជ្ញាធរសង្កាត់និងឃុំបានអនុវត្តតាមគោលការណ៍របស់សាលាខណ្ឌនិងស្រុក ដោយធ្វើការផ្សព្វផ្សាយឲ្យបងប្អូនប្រជាពលរដ្ឋបានដឹងនិងយល់ពីផលប៉ះពាល់នៃការលែងគោចោលនេះ ។
អាជ្ញាធរបានឲ្យពួកគាត់ចងឬដាក់ក្រោលឲ្យបានត្រឹមត្រូវ ជាពិសេសឲ្យគាត់កែទម្លាប់អាក្រក់លែងគោចោលបែបនេះចេញ ដើម្បីរួមចំណែកនៅក្នុងសង្គមនិងចៀសវាងមានការខាតបង់ ព្រោះគោជាកម្លាំងអូសទាញយ៉ាងសំខាន់ក្នុងការងារបង្កបង្កើនផល និងប្រកបរបរកសិកម្ម ។ មិនតែប៉ុណ្ណោះអ្នកខ្លះចងការលុយធនាគារទិញវាដើម្បីប្រើប្រាស់ទៀតផង ដូច្នេះគួរតែយកចិត្តទុកដាក់ថែរក្សាវាឲ្យបានល្អមិនគួរលែងចោលតទៅទៀតទេ ៕
ចែករំលែកព័តមាននេះ