រាជធានីភ្នំពេញ ៖ នៅទីបំផុត ការប្រកួតប្រដាល់នៅលើសង្វៀនទូរទស្សន៍ប៉ុស្ដិ៍លេខ៥ត្រូវបានបញ្ចប់យ៉ាងខកចិត្តបំផុតសម្រាប់អ្នកគាំទ្រ កីឡាករថៃ ដែលត្រូវគេស្គាល់ថា ជាជើងខ្លាំង នៅពេលកីឡាកររូបនេះត្រូវបានគណៈកម្មការផ្គូផ្គងដាក់ឱ្យប្រកួតជាមួយកីឡាករ អាំង សំអាត បែរជាត្រូវខ្ចប់ក្នុងទឹកទី២ទាំងមិនអស់ចិត្ត ។
ការប្រកួតកាលពីល្ងាចថ្ងៃទី៦ មករា ម្នាក់ៗបានកត់សម្គាល់ឃើញថា កីឡាករទាំងពីរវាយគ្នាខ្លាំងផង និងមិនសូវខ្លាំងផង ដោយសារតែការប្រកួតនៅមានកម្រិត ។ កីឡាករ អាំង សំអាត ត្រូវបានគេទាយតាំងពីដើមទីថានឹងមិនអាចឈ្នះការប្រកួតបានទេ ដោយសារកីឡាករថៃគឺគេល្អខ្លាំងជាង ហើយបើនិយាយពីសមត្ថភាពក៏ល្អមិនធម្មតាបើផ្អែកលើការប្រកួតកន្លងមក។
ហេតុផលដែលមានការលើកឡើងបែបនេះ គឺដោយសារតែកីឡាករថៃល្អខ្លាំង ខណៈដែលកីឡាករ អាំង សំអាត ក៏ចាស់វស្សា ហើយការវាយតប់លើឆាកទៀតសោត ក៏រាងធ្លាក់ដៃទៅហើយ ។ គូនេះក្រោយបង្ហាញការតស៊ូយ៉ាងស្វិតស្វាញ កីឡាករដែលត្រូវគេគិតថាមានប្រៀប និងឈ្នះការប្រកួត បែរជាចាញ់ប្រៀបវិញ ដោយសារតែកីឡាករកម្ពុជាដែលត្រូវគេគិតថាមិនអាចទៅរួច ស្រាប់តែមានឱកាសវាយឱ្យកីឡាករថៃខូចជើងហើយបន្តការប្រកួតមិនកើត ។
ងាកមកកាន់ការប្រកួតនៅក្នុងទឹកទី១ គេឃើញកីឡាករទាំង២មានចំណុចប្រដំប្រសងគ្នារកចំណុចឈ្នះចាញ់មិនឃើញនោះទេ គឺរហូតដល់ទឹកទី២ទើបគេឃើញឱកាសឈ្នះប្រៀបក៏ចាប់ផ្ដើមលេចឡើងដោយសារតែកីឡាករកម្ពុជាវាយឱ្យកីឡាករថៃខូចជើងប្រកួតលែងកើត។
គណៈកម្មការបានប្រកាសថា នឹងឱ្យកីឡាករទាំងពីរសងសឹកគ្នាវិញក្នុងពេលខាងមុខ ដោយសារតែភាគីថៃអះអាងថាមិនអស់ចិត្តនឹងការទទួលបរាជ័យលើកនេះ ។ កីឡាករ អាំងសំអាត ត្រូវគេអះអាងថាបានទទួលជ័យជម្នះដោយចៃដន្យមួយផ្នែកពាក់ព័ន្ធនឹងការភ្លាត់ស្នៀតរបស់កីឡាករថៃ ។ ជាមួយគ្នានេះមានការលើកឡើងផងដែរថា ជើងខ្លាំងកម្ពុជាក្រោយទទួលជ័យជម្នះមិនប្រាកដថានឹងឈ្នះការប្រកួតលើកក្រោយនោះទេ ដោយសារតែកីឡាករថៃគឺជាជើងខ្លាំង ហើយបើនិយាយពីការជឿជាក់ក៏អ្នកគាំទ្រភាគច្រើនឱ្យតម្លៃលើកីឡាករថៃច្រើនជាងដែរ ។
លោក សេង កដិកា អ្នករៀបចំកម្មវិធីប្រកួតបានចាត់ទុកជ័យជម្នះរបស់កីឡាករកម្ពុជាគឺជាលទ្ធផលបច្ចេកទេស និងថាដោយសារតែកីឡាករថៃដែលល្បីថាខ្លាំងមើលស្រាលចំពោះគូប្រកួត ។ លោកថា ការប្រកួតមួយនេះ នៅក្នុងទឹកទី១មើលមិនទាន់ដឹងថា កីឡាករកម្ពុជាប្រកួតល្អនោះទេ ប៉ុន្តែឈានដល់ទឹកទី២ កីឡាករកម្ពុជាស្រាប់តែវាយសម្រុកបានល្អយ៉ាងខ្លាំងតែម្ដង ដោយសារតែគេស្រាប់តែរកឃើញចំណុចខ្សោយគូប្រកួតហើយធ្វើឱ្យកីឡាករថៃខូចជើងដល់ថ្នាក់បន្តការប្រកួតទៅមុខលែងកើត ។
លោកថា ការប្រកួតប្រដាល់មិនខុសពីការប្រកួតបាល់ទាត់នោះទេ គឺមានន័យថាមិនមែនប្រាកដថាឱ្យតែខ្លាំងសុទ្ធតែឈ្នះ ហើយឱ្យតែខ្សោយជាងគឺសុទ្ធតែចាញ់នោះទេ ។ អ៊ីចឹងហើយទើបកីឡាករ អាំង សំអាត បែរជាឈ្នះការប្រកួតមុនចប់ទឹកទី២ ។ លោកបានហៅជ័យជម្នះមួយនេះថាមិនមែនជារឿងចៃដន្យ តែលោកក៏ថាកីឡាករកម្ពុជាបើមិនប្រថុយទាត់ហើយទាត់ទៀតដោយមិនខ្លាចពីការតបតរបស់គូប្រកួតក៏មិនមានសំណាងដល់ម្លឹងនោះដែរ ។ លោកគ្រោងឱ្យកីឡាករទាំងពីរសងសឹកគ្នាឆាប់ៗ ហើយលោកនៅតែជឿជាក់ថា កីឡាករកម្ពុជានឹងឈ្នះដដែលបើទោះជាការប្រកួតលើកក្រោយអាចនឹងពិបាកទទួលបានលទ្ធផលបែបនេះម្ដងទៀតក្ដី ។ លោកថា កីឡាករថៃល្អកែង និងម៉ាត់ ប៉ុន្តែសម្រាប់ការទាត់ឆ្វេងស្ដាំ គឺកម្ពុជាល្អជាង ។ យ៉ាងណាក៏ដោយ អ្វីដែលលោក សេង កដិកា លើកឡើងត្រូវបានភាគីអ្នកដឹកនាំកីឡាករថៃមិនយល់ស្របនោះទេ។
លោក ថៃ អ៊ូ តំណាងកីឡាករថៃបានអះអាងថា កីឡាករ Yout Phu Pha ខូចជើងនៅក្នុងការប្រកួតនោះគឺដោយសារតែគេធ្វើដំណើរមកពីថៃទាំងមិនសូវមានសុខភាពល្អ ព្រោះតែគេមានរបួសមិនទាន់ជាក្នុងពេលដែលឡើងប្រកួតនៅសង្វៀននៅក្នុងប្រទេសថៃតែប៉ុណ្ណោះ ។ លោកថា កីឡាកររបស់លោកឈឺជើងមិនទាន់បាត់ទេ ទើបក្រោយពេលកីឡាករកម្ពុជាសម្រុកទាត់ខ្លាំង ក៏ឈានដល់ការខូចជើងតែម្ដង ។
លោកចាត់ទុកថា ការបរាជ័យរបស់កីឡាករថៃគឺបណ្ដាលមកពីមានបញ្ហាសុខភាព ហើយចាញ់ប្រៀបខុសគ្នាជាមួយនឹងកីឡាករកម្ពុជា ដោយលោកបានទាំងអះអាងថា បើកីឡាកររបស់លោកមិនមានបញ្ហាបែបនេះ គឺកីឡាករ អាំង សំអាត មិនមានឱកាសដល់ម្លឹងនោះទេ ។
យ៉ាងណាមិញ លោកបានសរសើរចំពោះកីឡាករកម្ពុជាដែលអាចរកឃើញចំណុចខ្សោយរបស់កីឡាករថៃទើបអាចវាយឈ្នះ ហើយលោកបានប្រកាសថា កីឡាកររបស់លោកក៏ត្រៀមចិត្តដើម្បីសងសឹកផងដែរ ៕
ចែករំលែកព័តមាននេះ