ខេត្តកំពត ៖ នៅព្រឹកថ្ងៃទី០៦ ខែមករា ឆ្នាំ២០១៨ នៅមន្ទីរគណៈកម្មាធិការគណបក្សប្រជាជនកម្ពុជាខេត្តកំពត បានធ្វើពិធីប្រកាសផ្ទេរតំណែងប្រធានគណៈកម្មាធិការគណបក្សប្រជាជនកម្ពុជាខេត្តកំពត ក្រោមអធិបតីភាព លោក នៃ ប៉េណា សមាជិកអចិន្ត្រៃយ៍ នៃគណៈកម្មាធិការកណ្តាល និងជាប្រធានក្រុមការងារថ្នាក់កណ្តាល ចុះជួយខេត្តកំពត ។
យោងតាមសេចក្ដីសម្រេចស្ដីពីការផ្ទេរភារកិច្ច និងតែងតាំងមន្ត្រីគណបក្សរបស់គណៈអចិន្ត្រៃយ៍គណបក្សប្រជាជនកម្ពុជា ត្រូវបានសម្រេចតែងតាំងឲ្យ លោក ជាវ តាយ អភិបាលខេត្តកំពតកាន់តំណែងជាប្រធានគណៈកម្មាធិកាគណបក្សប្រជាជនខេត្ត ជំនួសតំណែងចាស់ លោក ចាន់ ចេស្ដា ប្រធានគណៈកម្មាធិការគណបក្សប្រជាជនខេត្តកំពត ដែលត្រូវបានសម្រួលឲ្យទៅទទួលភារកិច្ចថ្មី ។
មានប្រសាសន៍ណែនាំផ្ដាំផ្ញើដល់មន្ត្រីគណបក្សថ្នាក់ខេត្ត ស្រុក និងថ្នាក់មូលដ្ឋានដែលបានចូលរួមនាឱកាសនោះ ។ លោក នៃ ប៉េណា បានបញ្ចប់ថា ការតែងតាំងការដំឡើងឋានៈ ការផ្ទេរភារកិច្ចបម្រើគណបក្ស គឺជាការងារជាប្រក្រតី ដែលគណបក្សប្រជាជនកម្ពុជាគ្រប់ថ្នាក់គ្រប់ផ្នែក តែងបានអនុវត្ត ដើម្បីឆ្លើយតបតាមសំណូមពរចាំបាច់របស់គណបក្ស ស្របតាមសភាពការណ៍ជាក់ស្ដែង នៃដំណាក់កាល និងមូលដ្ឋាននីមួយៗ ។
លោក នៃ ប៉េណា ក៏បានកោតសរសើរចំពោះ លោក ចាន់ ចេស្ដា ដែលកន្លងមកបានយកអស់កម្លាំងកាយចិត្ត និងប្រាជ្ញាស្មារតីរួមជាមួយគណបក្សគ្រប់ថ្នាក់ដឹកនាំកសាង និងពង្រឹងពង្រីកខេត្តកំពត បានរីកចម្រើនរឹងមាំល្អប្រសើរ ទាំងការងារគណបក្ស និងការងាររដ្ឋបាលសាធារណៈជូនប្រជាពលរដ្ឋ ។
ពិសេសក្នុងឋានៈជាអភិបាល នៃគណៈអភិបាលខេត្តកំពត កន្លងមក បានដឹកនាំអនុវត្តនូវកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាល ទទួលបានលទ្ធផលជាផ្លែផ្កា ធ្វើឲ្យខេត្តកំពតប្រែមុខមាត់ថ្មីជាលំដាប់ ស្របតាមការរីកចម្រើនរបស់ប្រទេសជាតិ ។
ជាមួយឱកាសនោះដែរ លោក នៃ ប៉េណា ក៏បានផ្ដាំផ្ញើដល់ លោក ជាវ តាយ ដែលបានទទួលតួនាទីជាប្រធានគណបក្ស និងជាអភិបាលខេត្តកំពត ចាប់ពីពេលនេះតទៅ ត្រូវបន្តខិតខំប្រឹងប្រែងជម្នះគ្រប់ឧបសគ្គដឹកនាំខេត្តកំពត ឲ្យទទួលបានកាន់តែរីកចម្រើនជោគជ័យថ្មីៗបន្ថែមទៀត ។ ពិសេសត្រូវក្ដាប់ឲ្យជាប់លក្ខន្តិកគណបក្ស និងអនុវត្តឲ្យបានល្អនូវកម្មវិធីគោលនយោបាយគោលការណ៍ទាំងឡាយរបស់គណបក្ស ដែលថ្នាក់កណ្ដាលបានដាក់ចុះឲ្យបានត្រឹមត្រូវម៉ឺងម៉ាត់ ព្រមទាំងសាមគ្គីភាពផ្ទៃក្នុងគណបក្សឲ្យបានរឹងមាំ ដោយឈរលើមាគ៌ាមហាជនរបស់បក្ស ។ ដើម្បីត្រៀមការងារសំខាន់ៗឆ្ពោះទៅកាន់ការបោះឆ្នោតជ្រើសតាំងសមាជិកព្រឹទ្ធសភាខាងមុខនេះ និងការបោះឆ្នោតរដ្ឋសភា នាខែកក្កដា ឆ្នាំ២០១៨ ឲ្យទទួលបានលទ្ធផលជោគជោគជ័យ ៕
ចែករំលែកព័តមាននេះ