រាជធានីភ្នំពេញ ៖ ផលិតកម្មហង្សមាសបានធ្វើសន្និសីទសារព័ត៌មាននៅព្រឹកថ្ងៃទី០៨ ខែមករា ឆ្នាំ២០១៨នេះ ដើម្បីស្វាគមន៍តារាចម្រៀងវ័យក្មេង៣រូបដែលជាកូនប្រុសសំណព្វចិត្តរបស់កំពូលតារាចម្រៀងជួរមុខនៅកម្ពុជា គឺលោក ព្រាប សុវត្តិ ជាផ្លូវការ។…
រាជធានីភ្នំពេញ ៖ ផលិតកម្មហង្សមាសបានធ្វើសន្និសីទសារព័ត៌មាននៅព្រឹកថ្ងៃទី០៨ ខែមករា ឆ្នាំ២០១៨នេះ ដើម្បីស្វាគមន៍តារាចម្រៀងវ័យក្មេង៣រូបដែលជាកូនប្រុសសំណព្វចិត្តរបស់កំពូលតារាចម្រៀងជួរមុខនៅកម្ពុជា គឺលោក ព្រាប សុវត្តិ ជាផ្លូវការ។ នេះជាការបង្ហាញវត្តមានលើកដំបូងរបស់តារាចម្រៀងវ័យក្មេងទាំង៣ដួង ក្នុងការបោះជំហានចូលផលិតកម្មហង្សមាស។
ក្នុងសន្និសីទកាសែតនេះ ក៏មានវត្តមានលោក ព្រាប សុវត្តិ និងភរិយារបស់លោក គឺលោកស្រី ឡុង ស្រីមុំ អង្គុយសងខាងកូនប្រុសទាំងបីផងដែរ។
ថ្លែងក្នុងសន្និសិទ្ធសារព័ត៌មានបង្ហាញជាផ្លូវការតារាចម្រៀងថ្មីប្រចាំផលិតកម្មហង្សមាសនៅសណ្ឋាគារសូហ្វីតែល ភូគីត្រា ភ្នំពេញ នាព្រឹកថ្ងៃទី០៨ មករានេះ លោកស្រី អ៊ឹង គឹមលាង អគ្គនាយករងក្រុមហ៊ុនហង្សមាស បានបញ្ជាក់ពីមូលហេតុនៃការសម្រេចទទួលយកតារាចម្រៀងវ័យក្មេងទាំងបី ដោយសារលោក ព្រាប សុវត្តិ ដែលជាឪពុកត្រូវបានមហាជនចាត់ទុកជាកំពូលតារាចម្រៀងដ៏ល្បីប្រចាំប្រទេសកម្ពុជា ក៏ដូចជាផលិតកម្មហង្សមាស ហើយកូនប្រុសទាំងបីរបស់លោក ក៏សុទ្ធតែមានឈាមជ័រ និងទេពកោសល្យដូចឪពុករបស់ខ្លួនផងដែរ ដែលកត្តានេះ ផលិតកម្មរំពឹងថា ពួកគេនឹងអាចស្នងតំណែងលោកព្រាប សុវត្តិបាន។
លោកស្រីបញ្ជាក់បន្ថែមថា៖ «គឺជារឿងមួយដែលភ្ញាក់ផ្អើលសម្រាប់ប្រជាពលរដ្ឋទាំងអស់នៅស្រុកខ្មែរ ដែលចាត់ទុកថា គាត់ជាធនធានមួយដែលកម្រ នឹងដែលគាត់អាចមានខ្សែលោហិតជាប់មកជាមួយលោក ព្រាប សុវត្តិ ដែលអាចបន្តពីលោក ព្រាប សុវត្តិ បន្តទៅមុខទៀត»។
កូនប្រុសទាំង ៣ របស់លោក ព្រាប សុវតិ្ត គឺសុវត្ថិ មុន្នីវណ្ណមាន អាយុ២០ឆ្នាំ សុវត្ថិ មុន្នីនាគ វ័យ១៨ឆ្នាំ និងកូនប្រុសពៅ សុវត្តិ សេរីវុឌ្ឍ អាយុ១៥ឆ្នាំ។ កូនចំណោមកូនប្រុសទាំងបី មុនីវណ្ណ និងមុនីនាគ ធ្លាប់ឡើងច្រៀងជាច្រើនដងតាំងពីពេលពួកគេទាំង២នៅកុមារភាពមកម្ល៉េះ ។ មិនត្រឹមតែមានទឹកដមសម្លេងពីរោះដូចឪពុករបស់ពួកគេនោះទេ តែបុត្រទាំង៣របស់កំពូលតារាចម្រៀងជួរមុខនៅកម្ពុជា ក៏មានរូបរាងស្រស់សង្ហារផងដែរ ជាពិសេសពួកគេតែងតែបង្ហាញវត្តមានរាំលើឆាកប្រគំតន្ត្រីធំៗទាំងនៅក្រុងភ្នំពេញ និងបណ្តាខេត្តនានា ជាមួយនឹងក្រុម Dancers របស់លោក ព្រាប សុវត្តិ ។
ស្របពេលក្លាយជាតារាចម្រៀងផ្លូវការប្រចាំផលិតកម្មហង្សមាស កូនប្រុសទាំងបីរបស់លោក បានបង្ហាញអារម្មណ៍រីករាយយ៉ាងខ្លាំង ដែលខ្លួនអាចសម្រេចបំណងក្លាយជាតារាចម្រៀង។
លោក សុវត្តិ មុនីវណ្ណ ជាកូនច្បងបានថ្លែងថា «ខ្ញុំពិតជារំភើបចិត្ត និងសប្បាយចិត្តយ៉ាងខ្លាំងដែលខ្ញុំអាចមកដល់ក្រុមហ៊ុនដែលឈានមុខគេ ធំជាងគេនៅព្រះរាជាណាចក្រកម្ពុជា »។
ចំណែក សុវត្តិ មុនីនាគ បាននិយាយថា «ថ្ងៃនេះខ្ញុំមានអារម្មណ៍រំភើប និងមោទនភាពបំផុតដែលបានសម្រេចគោលបំណងតាំងពីតូច ហើយមកដល់ពេលនេះបានសម្រេចគោលបំណង ហើយបានអង្គុយនៅកន្លែងមួយដែលកក់ក្តៅ ដែលធំ គឺក្រុមហ៊ុនហង្សមាស ហើយខ្ញុំសង្ឃឹមថា អ៊ុំប្រុស អ៊ុំស្រី នឹងគាំទ្ររូបខ្ញុំទាំងបីនាក់»។
ក្រៅបង្ហាញអារម្មណ៍រំភើប កូនប្រុសពៅ របស់កំពូលតារាចម្រៀងប្រចាំប្រទេសកម្ពុជា សុវត្តិ សេរីវុឌ្ឍបាននិយាយថា «ខ្ញុំនឹងពង្រឹងនូវសមត្ថភាពរបស់ខ្ញុំ ដើម្បីបម្រើទៅដល់ទស្សនិកជន និងបងប្អូន អ៊ុំប្រុស អ៊ុំស្រីទាំងអស់»។
ខណៈមានវត្តនៅក្នុងសន្និសីទសារព័ត៌មាន លោក ព្រាប សុវត្តិ បានលើកឡើងការដែលលោកជំរុញកូនទាំងបីឱ្យចូលក្នុងវិស័យសិល្បៈដូចខ្លួន ដោយសារតែកូនប្រុសទាំងបីមានដុងសិល្បៈដូចលោកពីធម្មជាតិមក។
លោកបន្តថា «និស្ស័យរបស់គាត់បានល្អសម្រាប់ផ្នែកសិល្បៈ អញ្ចឹងទៅខ្ញុំពេញចិត្ត សប្បាយចិត្តទទួលនូវលទ្ធផលបែបនេះថា ខ្ញុំមិនជម្រុញ ក៏មិនអាចថា បានដែរ ព្រោះថា នៅជាមួយគ្នារាល់ពេលវេលា អញ្ចឹងអ្វីដែលនៅជាមួយគ្នាធ្វើឱ្យមានភាពបន្ស៊ាំក្នុងការចូលចិត្ត និងការពេញចិត្តប្រាកដជាមានច្រើន អញ្ចឹងអ្វីដែលជាសិល្បៈនេះ បើសិនយើងមិនមានដុង ឬមានទេពកោសល្យសម្រាប់ខ្លួនឯងទេ យើងជំរុញយ៉ាងណាក៏មិនអាចទៅបានដែរ»។
លោក ព្រាប សុវត្តិ រំពឹងថា ទស្សនិកជននឹងបន្តគាំទ្រលោក និងលោកប្រុសទាំងបីរបស់លោកបន្តទៀត ហើយលោក និងកូននឹងខិតខំបន្ថែមទៀត ព្រមទាំងទទួលយកការផ្តល់យោបល់ល្អពីសាធារណជន ដើម្បីពង្រឹងសមត្ថភាពរបស់ខ្លួន។
បើតាមអគ្គនាយករងផលិតកម្មរស្មីហង្សមាសថា ប្រសិនបើតារាចម្រៀងវ័យក្មេងទាំងបី ដែលមានរូបរាងសង្ហារ ទទួលបានការគាំទ្រខ្លាំងពីមហាជន ពួកគាត់នឹងអាចមានឱកាសក្លាយជាតារាសម្តែងប្រចាំផលិតកម្មផងដែរ៕
ចែករំលែកព័តមាននេះ