ទីក្រុងបាងកក ៖ រដ្ឋមន្ត្រីកសិកម្ម និងសហករណ៍ លោក Grisada Boonrach បានថ្លែងថា ផែនការរបស់ប្រទេសចិនក្នុងការវិនិយោគលើចម្ការកៅស៊ូនៅថៃ ត្រូវតែឆ្លងកាត់ការពិចារណាឲ្យបានដិតដល់…
ទីក្រុងបាងកក ៖ រដ្ឋមន្ត្រីកសិកម្ម និងសហករណ៍ លោក Grisada Boonrach បានថ្លែងថា ផែនការរបស់ប្រទេសចិនក្នុងការវិនិយោគលើចម្ការកៅស៊ូនៅថៃ ត្រូវតែឆ្លងកាត់ការពិចារណាឲ្យបានដិតដល់ ដោយគម្រោងទាំងនេះ មិនត្រូវប៉ះពាល់ដល់កសិករក្នុងស្រុកទេ ។
លោកមានប្រសាសន៍ដូចនេះដើម្បីឆ្លើយតបនឹងរបាយការណ៍មួយថា China Hainan Rubber Industry Group ចង់វិនិយោគលើចម្ការកៅស៊ូបន្ថែមក្នុងប្រទេសថៃ ដូចដែលពួកគេបានធ្វើក្នុងប្រទេសកម្ពុជា, ឡាវ, មីយ៉ាន់ម៉ា និងវៀតណាម ។
ក្រុមហ៊ុននេះក៏ចង់បង្កើតក្រុមហ៊ុនរួមមួយជាមួយក្រុមប្រឹក្សាបណ្តាញកៅស៊ូ និងវិទ្យាស្ថានកសិករកៅស៊ូថៃ ដើម្បីទិញកៅស៊ូពីកសិករក្នុងតម្លៃខ្ពស់ជាងទីផ្សារ ប្រមាណ០,៦សេនក្នុង១គីឡូក្រាម ។
លោក Grisada Boonrach បន្តថា យើងគួរតែសិក្សាឲ្យបានច្បាស់លាស់ដើម្បីបញ្ជាក់ពីផលប៉ះពាល់ដល់អ្នកផលិតក្នុងស្រុក ។ ការព្រួយបារម្ភធំជាងគេរបស់លោក គឺឈ្មួញកណ្តាលចិនអាចនឹងលក់ក្នុងតម្លៃយ៉ាងទាប ដូចដែលបានធ្វើក្នុងទីផ្សារផ្លែឈើនៅខេត្តប៉ែកខាងកើតប្រទេស ។
លោកអះអាងថា ក្រសួងនឹងមិនគាំទ្ររាល់សំណើប្រឆាំងនឹងគោលនយោបាយក្នុងស្រុក រួមមាន ការកាត់បន្ថយចម្ការកៅស៊ូក្នុងប្រទេសឡើយ ។ ក្រសួងនឹងបញ្ជាក់ថា តើចំនួនចម្ការកៅស៊ូពិតជាធ្លាក់ចុះឬទេ ។
ជាមួយគ្នានេះ កសិករថៃដែលរស់នៅក្នុងខេត្ត Songkhla, Satun, Yala, Pattani និង Narathiwat កំពុងតែរៀបចំផែនការដើម្បីកាត់បន្ថយចម្ការកៅស៊ូផងដែរ ។
ពួកគេជឿជាក់ថា សំណើរបស់ពួកគេអាចបង្កើនតម្លៃកៅស៊ូឲ្យកើនឡើងប្រមាណ២,៥ដុល្លារក្នុង១គីឡូក្រាម ។
កិច្ចប្រជុំមួយរបស់គណៈកម្មការគោលនយោបាយកៅស៊ូធម្មជាតិ កាលពីថ្ងៃទី១៥ ធ្នូ ឲ្យដឹងថា ការនាំចូលកៅស៊ូពីថៃរបស់ចិន បានធ្លាក់ចុះតាំងពីឆ្នាំ២០១៦មកម្ល៉េះ បើទោះជាតម្រូវការក្នុងប្រទេសចិនកើនឡើងក៏ដោយ ។
ការធ្លាក់ចុះនេះ គឺមកពីការនាំចេញកៅស៊ូកើនឡើងពីប្រទេសកម្ពុជា, ឡាវ, មីយ៉ាន់ម៉ា និងវៀតណាម ក្នុងរយៈពេលប្រមាណ១០ឆ្នាំមកនេះ ៕
ចែករំលែកព័តមាននេះ