រាជធានីភ្នំពេញ ៖ រដ្ឋមន្ត្រីក្រសួងពាណិជ្ជកម្មកម្ពុជាបានស្នើទៅភាគីចិនជំរុញវិនិយោគិនចិនមកបណ្ដាក់ទុនលើការសាងសង់រោងចក្រកែច្នៃផលិតផលកសិកម្ម រួមមាន ដំឡូងមី មៀនប៉ៃលិន និងស្រូវ ដែលជាផលិតផលមានសក្ដានុពលខ្ពស់ និងកំពុងមានទីផ្សារសម្រាប់ការនាំចេញរបស់កម្ពុជា ។…
រាជធានីភ្នំពេញ ៖ រដ្ឋមន្ត្រីក្រសួងពាណិជ្ជកម្មកម្ពុជាបានស្នើទៅភាគីចិនជំរុញវិនិយោគិនចិនមកបណ្ដាក់ទុនលើការសាងសង់រោងចក្រកែច្នៃផលិតផលកសិកម្ម រួមមាន ដំឡូងមី មៀនប៉ៃលិន និងស្រូវ ដែលជាផលិតផលមានសក្ដានុពលខ្ពស់ និងកំពុងមានទីផ្សារសម្រាប់ការនាំចេញរបស់កម្ពុជា ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានឲ្យដឹងថា កម្ពុជាមានផលិតផលកសិកម្មជាច្រើនមុខសម្រាប់ឲ្យវិនិយោគិនកែច្នៃជាផលិតផលសម្រេចដើម្បីនាំចេញ ។
លោកមានប្រសាសន៍ថា ៖« ស្រូវយើងក្នុង១ឆ្នាំៗបានសល់ច្រើន បន្ទាប់ពីយើងទុកផ្គត់ផ្គង់ក្នុងស្រុក ហើយដោយសារតែយើងមិនមានឡសម្ងួត និងឃ្លាំងស្តុក ទើបប្រជាពលរដ្ឋបានបង្ខំចិត្តលក់ឲ្យទៅប្រទេសជិតខាង ប៉ុន្ដែនៅថ្ងៃខាងមុខនេះ ពេលដែលយើងមានឡសម្ងួត និងឃ្លាំងស្តុកក្រោមការវិនិយោគរបស់រដ្ឋាភិបាលកម្ពុជា និងការវិនិយោគិនចិនហើយនោះ យើងសង្ឃឹមថា នឹងអាចមានអង្ករគ្រប់គ្រាន់សម្រាប់នាំចេញទៅកាន់ប្រទេសមានតម្រូវការ » ។
លោកបន្តថា ក្រៅពីផលិតផលស្រូវ កម្ពុជាក៏នៅមានផលិតផលកសិកម្មជាច្រើនទៀត សម្រាប់ធ្វើការកែច្នៃនាំចេញទៅកាន់ទីផ្សារប្រទេសចិន និងទីផ្សារអន្តរជាតិជាច្រើនទៀត ដូចជា ដំឡូងមី និងមៀនប៉ៃលិនជាដើម ។ សម្រាប់ផលិតផលដំឡូងមី កម្ពុជាបាននាំចេញវត្ថុធាតុដើមជាច្រើនទៅកាន់ប្រទេសជិតខាង ដើម្បីកែច្នៃ រួចបន្តនាំចេញទៅកាន់ប្រទេសចិននិងប្រទេសផ្សេងទៀត ខណៈវិនិយោគិនកែច្នៃផលិតផលទាំងនោះនៅប្រទេសជិតខាង ក៏ដូចជាវិនិយោគិនចិនដែរ ។
លោកថ្លែងថា ៖« សូមឲ្យភាគីចិនពិនិត្យមើលពីលទ្ធភាពដើម្បីមកវិនិយោគផ្ទាល់នៅក្នុងប្រទេសកម្ពុជា ក្នុងការកែច្នៃផលិតផលដំឡូងមីសម្រាប់នាំចេញទៅកាន់ប្រទេសចិនផ្ទាល់ ដោយមិនចាំបាច់ឆ្លងកាត់ប្រទេសទី៣ ហើយសម្រាប់ផលិតផលមៀនប៉ៃលិនវិញ ក៏ដូចគ្នាដែរ គឺកម្ពុជាមានផលិតផលជាច្រើនសម្រាប់ឲ្យវិនិយោគិនកែច្នៃជាអាហារកំប៉ុង ដើម្បីនាំចេញទៅកាន់បរទេស » ។
លោក He Jainxiang អគ្គនាយករង ការិយាល័យកែច្នៃផលិតផលនៃក្រសួងកសិកម្ម ចិន បានឲ្យដឹងថា លោកនឹងយកសំណើនេះទៅពិភាក្សាឲ្យបានស៊ីជម្រៅ និងសិក្សាបន្ថែមអំពីលទ្ធភាពសហការវិនិយោគលើការអភិវឌ្ឍសង្វាក់តម្លៃនៃផលិតផលទាំងពីរ និងដំណាំសក្តានុពលផ្សេងៗទៀតរបស់កម្ពុជា ដូចជា ពោត ស្រូវ និងស្វាយជាដើម ។
លោកបន្តថា នៅក្នុងខែមករានេះ នាយករដ្ឋមន្ត្រីចិននឹងមកបំពេញទស្សនកិច្ចផ្លូវការនៅកម្ពុជា ហើយក្នុងនោះក៏មានវត្តមានរដ្ឋមន្ត្រីក្រសួងកសិកម្មចិនអមដំណើរផងដែរ ។ ដូចនេះ វាជាឱកាសល្អសម្រាប់ភាគីកម្ពុជាស្នើចំៗទៅកាន់រដ្ឋមន្ត្រីក្រសួងកសិកម្មចិន ដើម្បីជំរុញឲ្យវិនិយោគិនមកបណ្ដាក់ទុនវិនិយោគផ្ទាល់នៅកម្ពុជា ។
គួរបញ្ជាក់ថា ទំហំពាណិជ្ជកម្មទ្វេភាគីសរុបរវាងចិន និងកម្ពុជា បានកើនឡើងយ៉ាងឆាប់រហ័សជាមធ្យម២៦%ក្នុងរយៈពេល១០ឆ្នាំចុងក្រោយនេះ ។ កាលពីឆ្នាំ២០១៦ ប្រទេសទាំងពីរសម្រេចបានទំហំពាណិជ្ជកម្មចំនួន៤.៨០០លានដុល្លារអាមេរិក ក្នុងនោះការនាំចេញរបស់កម្ពុជាមានទឹកប្រាក់៨៣០លានដុល្លារ និងនាំចូល៣.៩០០លានដុល្លារ។
ចិន គឺជាប្រទេសវិនិយោគធំជាងគេនៅកម្ពុជា ដែលគិតត្រឹមឆ្នាំ២០១៦ ទឹកប្រាក់វិនិយោគរបស់ចិនមានចំនួន៥.០០០លានដុល្លារ លើវិស័យមួយចំនួនដូចជា កម្មន្តសាល សំណង់ វាយនភ័ណ្ឌ និងអគ្គិសនី ។ ដោយឡែក ភ្ញៀវទេសចរចិនដែលមកកម្ពុជាបានកើនដល់៨៣ម៉ឺននាក់នៅក្នុងឆ្នាំ២០១៦ គឺបានកើនឡើង២០% បើធៀបនឹងឆ្នាំ២០១៥ ។ នៅក្នុងឆ្នាំ២០១៨នេះ ចិនក៏បានយល់ព្រមឲ្យកម្ពុជានាំចូលអង្ករ៣០ម៉ឺនតោនបន្ថែមទៀតផងដែរ ។
គួររំឭកថា កាលពីពេលថ្មីៗនេះ ដោយមើលឃើញពីសក្តានុពលនៃផលិតផលកសិកម្មរបស់កម្ពុជា ក្រុមហ៊ុនចំនួនបីបានចុះកិច្ចព្រមព្រៀង ដើម្បីប្រមូលទិញផលិតផលកសិកម្មកម្ពុជា ជាពិសេសផ្លែស្វាយ ចេក និងម្រេច ដើម្បីកែច្នៃ និងវេចខ្ចបសម្រាប់នាំចេញទៅកាន់ទីផ្សារអន្តរជាតិ ។
ក្រុមហ៊ុនទាំងបីរួមមាន ក្រុមហ៊ុន Digital Agriculture Exchange របស់ប្រទេសចិន, ក្រុមហ៊ុន Chaintope របស់ប្រទេសជប៉ុន និងក្រុមហ៊ុន Cambodia golf and country club co.ltd របស់កម្ពុជា ដែលពិធីចុះហត្ថលេខាលើកិច្ចព្រមព្រៀងនេះ បានធ្វើឡើងកាលពីថ្ងៃទី២៩ ខែធ្នូ ឆ្នាំ២០១៧ កន្លងទៅ នៅរាជធានីភ្នំពេញ ។
បើតាមការបញ្ជាក់ពីលោកស្រី ចាន់ សុធា អគ្គនាយិកាក្រុមហ៊ុន Cambodia golf and country club co.ltd បានថ្លែងក្នុងសន្និសីទកាសែតថា ការផ្តួចផ្តើមគម្រោងនេះគឺដើម្បីលើកស្ទួយជីវភាពកសិករខ្មែរ ក៏ដូចជាដំណាំកសិកម្មរបស់ប្រទេសកម្ពុជា ។
លោកស្រីបន្តថា ៖« គម្រោងនេះ នឹងចាប់ផ្តើមនៅឆ្នាំ២០១៨ ដោយក្រុមហ៊ុននឹងរៀបចំរោងចក្រសម្រាប់ក្លាសេ និងបាននាំចូលម៉ាស៊ីនសម្លាប់មេរោគ ម៉ាស៊ីនសម្រាប់វេចខ្ចប់ ចុះបញ្ជីម៉ាកយីហោ ព្រមទាំងបង្កើតធនាគារកសិកម្ម ដើម្បីផ្តល់កម្ចីដល់កសិករ » ៕
ចែករំលែកព័តមាននេះ