ខេត្តកំពត ៖ ដោយមើលឃើញពីភាពនឿយហត់ និងការខិតខំប្រឹងប្រែងកងកម្លាំងក្រោមឱវាទក្នុងការបំពេញភារកិច្ចការពារសន្តិសុខ សណ្តាប់ធ្នាប់ជូនភ្ញៀវទេសចរណ៍ជាតិ និងអន្តជាតិដែលបានអញ្ជើញមក លេងកម្សាន្តនៅក្នុងខេត្តកំពត នាឱវាទបុណ្យចូល ឆ្នាំសកល ឆ្នាំ២០១៨ កន្លងទៅនៅថ្ងៃទី0៦ ខែមករា ឆ្នាំ២០១៨ ។
លោកវរសេនីយ៍ទោ លក ញ៉ាវ នាយការិយាល័យព្រហ្មទណ្ឌកម្រិតស្រាល និងជាប្រធានក្រុមអន្តរាគមន៍ពិសេសនៃស្នងការដ្ឋាននគរបាលខេត្តកំពត តំណាងដ៏ខ្ពង់ខ្ពស់លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តបាននាំយកថវិកា និងស្រាបៀរទៅឧបត្ថម្ភជូនដល់កងកម្លាំងឈុតខ្មៅចំនួន៧៧នាក់ ដោយក្នុងមួយនាក់ទទួលបានថវិកាចំនួន៤០.០០០៛ (សែសិបពាន់រៀល) និងស្រាបៀរចំនួន១០កេស ការិយាល័យនគរបាលចរាចរណ៍ផ្លូវគោកទទួលបានថវិកាចំនួន១.០០០.០០០៛ (មួយលានរៀល) និងស្រាបៀរចំនួន១០កេស ការិយាល័យនគរបាលបង្ការ-ពន្លត់អគ្គិភ័យ និងសង្គ្រោះទទួលបានស្រាបៀរចំនួន០៥ កេស និងអធិការដ្ឋាននគរបាលក្រុងកំពតទទួលបានថវិកាចំនួន ១.០០០.០០០៛ (មួយលានរៀល) និងស្រាបៀរចំនួន ១០កេស ។
ដោយឡែកលោកស្នងការក៏បានឧបត្ថម្ភជូនដល់លោកអនុប្រធានក្រុមអន្តរាគមន៍ពិសេសចំនួន០២នាក់ បន្ថែមទៀតដោយក្នុងមួយនាក់ទទួលបានថវិកាចំនួន១០០.០០០៛ (មួយរយពាន់រៀល) ។ កត្តាទាំងនោះហើយ ដែលធ្វើឲ្យកងកម្លាំងនគរបាលទាំងអស់តាំងពីថ្នាក់មូលដ្ឋានរហូតដល់ខេត្ត កាន់តែមានភាពកក់ក្តៅ និងជឿជាក់លើការដឹកនាំដ៍ត្រឹមត្រូវ និងប៉ិនប្រសប់មេអង្គភាពវ័យក្មេងរូបនេះ ។
កងកម្លាំងនគរបាលក្រោមឱវាទទាំងអស់ និងប្រជាពលរដ្ឋនៅទូទាំងខេត្តកំពតផងដែរ សូមថ្លែងអំណរគុណដ៍ជ្រាលជ្រៅ និងថ្លៃថ្លាជាទីបំផុត ចំពោះកាយវិការសប្បុរសធម៌តាំងពីជួយកងកម្លាំងរហូត ដល់ប្រជាជនក្រីក្រទៀត ដោយឯកឧត្តមមិនប្រកាន់ ពណ៌សម្បុរ និន្នាការនយោបាយអ្វីទាំងអស់ឲ្យតែជួបការខ្វះខាតដូចជា ឆ្លងទន្លេ អ្នកស្លាប់ដោយជំងឺ សេចក្តីរាយការណ៍មកពីអាជ្ញាធរមូលដ្ឋាន ឬកម្លាំងនគរបាលប៉ុស្តិ៍រដ្ឋបាល គឺឯកឧត្តមស្នងការខេត្តលោកចាត់មន្ត្រី ក្រោមឱវាទយកអំណោយទៅជូនដល់លំនៅដ្ឋានបងប្អូនជានិច្ច នាពេលកន្លងមកនេះផងដែរ ៕
ចែករំលែកព័តមាននេះ