រាជធានីភ្នំពេញ ៖ «បញ្ហាស្វាយធ្លាក់ចុះ មិនមែនមកពីរាជរដ្ឋាភិបាល ឬក្រសួងពាណិជ្ជកម្ម មិនរកទីផ្សារនោះទេ គឺមកពីអ្នកដាំតែម្ដង»។ នេះជាសម្ដីរបស់លោក អ៊ីន ឆៃវ៉ាន់ អ្នកគ្រប់គ្រងសមាគមស្វាយកំពង់ស្ពឺ ។
មិនថាដំណាំស្វាយនោះទេ ដំណាំកសិកម្មផ្សេងទៀតក៏តែងមានបញ្ហាទីផ្សារ និងតម្លៃដែរ។ ក្នុងអំឡុងពេលដាំដុះ ឬជិតប្រមូលផល តែងតែមានដំណឹងថា ទីផ្សារដំណាំនេះត្រូវប៉ាន់ តម្រូវការទីផ្សារមានច្រើន តែនៅពេលចាប់ផ្ដើមប្រមូលផល បែរជាមានតម្លៃថោកទៅវិញ ។
ពាក់ព័ន្ធនឹងបញ្ហានេះ អ្នកគ្រប់គ្រងសមាគមស្វាយកំពង់ស្ពឺ បានប្រាប់ឲ្យដឹងថា បញ្ហាស្វាយធ្លាក់ចុះមិនមែនមកពីរាជរដ្ឋាភិបាល ឬក្រសួងពាណិជ្ជកម្មមិនរកទីផ្សារទេ គឺមកពីអ្នកដាំតែម្ដង គាត់ខ្វះនូវបច្ចេកទេសថែទាំ និងការវេចខ្ចប់ ។
លោកថា ៖« ប្រជាកសិករមួយចំនួនគាត់នៅមិនទាន់យល់ច្បាស់ពីការថែទាំ និងការវេច
ខ្ចប់នៅឡើយ គឺគាត់ដឹងតែពីថា ឲ្យតែមានភ្លៀង ដឹងតែបាញ់ថ្នាំ ឲ្យតែមានសត្វល្អិតស៊ី ដឹងតែបាញ់ថ្នាំ ដើម្បីឲ្យវាងាប់ និងឆាប់បានធំ តែគាត់មិនបានគិតថា ថ្នាំដែលគាត់កំពុងប្រើនោះ វាប៉ះពាល់ដល់ផ្លែ និងដើមយ៉ាងណាទេ » ។
លោកបន្ដថា ក្រសួង ក៏ដូចជាសមាគម តាមតំបន់នីមួយៗកំពុងខិតខំស្វែងរកដៃគូ ទីផ្សារសម្រាប់ប្រជាកសិករ តែកសិករភាគច្រើនមិនបានសិក្សាឲ្យច្បាស់លាស់ពីការប្រើប្រាស់បច្ចេកទេសថែទាំដំណាំ ។
លោក អ៊ីន ឆៃវ៉ាន់ បានបន្តថា ប្រជាកសិករមិនបានសិក្សាឈ្វេងយល់ពីការប្រើប្រាស់បច្ចេកទេសឲ្យបានត្រឹមត្រូវ ហើយនៅតែបន្តទម្លាប់របស់គាត់ ។ ដូច្នេះ បើទោះបីជាមានទីផ្សារច្រើនយ៉ាងណាក៏ដោយ ក៏តម្លៃមិនបានថ្លៃដែរ ។ ជាមួយគ្នានេះ សមាគមនីមួយៗ ក៏ត្រូវចែករំលែកចំណេះដឹងទៅដល់ប្រជាកសិករនៅក្នុងភូមិដែរ ពិសេសចេះមើលពីទីផ្សារ និងតម្រូវការ មិនមែនចេះតែឲ្យពួកគាត់ដាំនោះទេ ។
អ្នកគ្រប់គ្រងនៃសមាគមសា្វយកំពង់ស្ពឺរូបនេះ ក៏បានឲ្យប្រជាកសិករដែលដាំដំណាំសក្ដានុពលសម្រាប់នាំចេញ គួរតែរួមគ្នាឈ្វេងយល់ពីបច្ចេកទេសដាំដុះ និងថែទាំឲ្យបានត្រឹមត្រូវ ព្រោះក្រុមហ៊ុនធំៗជាអ្នកបញ្ជាទិញមកពីចិន និងថៃ ជាដើមនោះ គេចង់បានផលិតផលមួយដែលមានសុវត្ថិភាព និងមានការផ្គត់ផ្គង់ឲ្យបានគ្រប់គ្រាន់ ។ គិតមកទល់ពេលនេះ ប្រជាកសិករអាចទទួលបានបទពិសោធន៍គ្រប់គ្រាន់ហើយ អីចឹង ត្រូវតែចាប់ផ្ដើមស្វែងរកការប្រឹក្សាបច្ចេកទេស និងប្រឹក្សាតម្លៃទិញលក់ ហើយទាំងពីរនេះត្រូវមានការទូទាត់ដោយសុវត្ថិភាព និងលក់សុវត្ថិភាពផងដែរ ។
លោក សុខ គ្រៀជ ប្រធានសមាគមប្រចាំខេត្តកំពង់ស្ពឺ បានបន្ថែមថា ជារៀងរាល់ឆ្នាំ ការនាំចេញស្វាយពីសមាគម មានប្រមាណ១ម៉ឺនតោនក្នុង១ឆ្នាំ ។
លោកថា ៖« ចំនួននេះ មិនទាន់គ្រប់គ្រាន់នឹងតម្រូវការនៅឡើយ ដោយសារផលិតផលរបស់យើងពុំទាន់ត្រូវតាមស្ដង់ដាបច្ចេកទេស ប៉ុន្តែបើប្រជាកសិករគាត់ផលិតប្រកបដោយបច្ចេកទេសត្រឹមត្រូវ គឺយើងអាចផ្គត់ផ្គង់តម្រូវការទីផ្សារបានច្រើន » ។
លោក សុខ គ្រៀជ សង្ឃឹមថា នៅថ្ងៃខាងមុខ ស្វាយនឹងចុះបញ្ជីផលិតផលសម្គាល់ភូមិសាស្ត្រដូចម្រេចកំពតដែរ ព្រោះទាក់ទងនឹងស្វាយនៅកំពត កែប កំពង់ស្ពឺ និងតាកែវនេះ យើងអាចរក្សាទុកបានយូរ ហើយវាជាប្រភេទស្វាយដែលគ្មានសរសៃ ។ ចំណែករសជាតិវិញឆ្ងាញ់លើសគេ សូម្បីតែប្រទេសថៃ ក៏គេត្រូវការស្វាយរបស់យើងជាចាំបាច់ដែរ ៕
ចែករំលែកព័តមាននេះ