ខេត្តកំពង់ឆ្នាំង ៖ លោកនាយសាលាបឋមសិក្សា យុគន្ធ ដែលជាសាលារៀនបណ្តែតលើទឹក និងអាជ្ញាធរ មូលដ្ឋានបានអះអាងថា ក្នុងចំណោមសិស្ស សរុបមានចំនួន១៧៤នាក់ គឺមានសិស្សប្រមាណ៨០% គឺជាកូនចៅប្រជាពលរដ្ឋក្រីក្រ ពុំមានប៊ិច សៀវភៅ រៀនសូត្រឡើយ ហេតុនេះក្នុងនាមលោកគ្រូអ្នកគ្រូ និងអាជ្ញាធរមូលដ្ឋាន សូមអំពាវនាវដល់សប្បរសជនរស់នៅជិតឆ្ងាយមេត្តាជួយឧបត្ថម្ភដោយសេចក្តីអនុគ្រោះផង។ សាលាបឋមសិក្សាខាងលើ ស្ថិតនៅក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូណ៍ ខេត្តកំពង់ឆ្នាំង។ លោក អាត សុផល ជំនួយការភូមិឆ្នុកទ្រូ បានឲ្យដឹងថា ប្រជាពលរដ្ឋនៅក្នុងចំណុចយុគន្ធ ភូមិឆ្នុកទ្រូ ឃុំឆ្នុកទ្រូ មានជាង៦០៦គ្រួសារ ក្នុងនោះ៨៥% គឺជាប្រជាពលរដ្ឋក្រីក្រ ប្រកបមុខរបរនេសាទ និងធ្វើចម្ការ រីឯកូនចៅពួកគាត់ដោយសារតែភាពក្រីក្រ បានទៅជួយនេសាទ ឬធ្វើចម្ការជាមួយឪពុកម្តាយ ធ្វើឲ្យ ការទៅរៀនសូត្ររបស់ពួកគាត់ពុំទៀងទាត់ និងខ្លះបោះបង់ការរៀនសូត្រ ហើយភាគច្រើនគឺ ខ្វះខាតសម្ភារសិក្សា។
ចំណែកខ្លះទៀតគ្មានទូកសម្រាប់ឲ្យកូនជិះចៅទៅរៀន ពេលខ្លះពួកគេត្រូវជិះទូកមួយគ្នា៥ទៅ៦នាក់ ដែលមានផ្ទះទឹកនៅជិតគ្នា។ ដោយឡែក លោក នួន បូរ៉ា នាយសាលាបឋមសិក្សា យុគន្ធ ក៏បានប្រាប់ឲ្យដឹងថា សាលាបឋមសិក្សានេះ មានថ្នាក់រៀន៦ថា្នក់គឺ ពីថ្នាក់ទី១ដល់ថ្នាក់ទី៦ មានសិស្សសរុបចំនួន១៧៤នាក់ ស្រី៩១នាក់ ប៉ុន្តែមានថ្នាក់រៀនជាផ្ទះបណ្តែត លើទឹកតែ៤បន្ទប់ ដោយត្រូវរៀនផ្លាស់ប្តូរគ្នាព្រឹកល្ងាច។ ក្នុងនោះគឺពីថ្នាក់ទី១ដល់ទី៤ ត្រូវរៀននៅពេលព្រឹក ចំណែកថ្នាក់ទី៥ និងទី៦ ត្រូវរៀនពេលល្ងាច។ លោកបានបញ្ជាក់ថា ក្នុងចំណោមសិស្ស១៧៤នាក់ គឺមាន៩០%គឺជាកូនចៅប្រជាពលរដ្ឋក្រីក្រ ដែលខ្លះគ្មានសៀវភៅ ប៊ិច សម្រាប់រៀនសូត្រឡើយ។
លោកបានបន្តថា ជារៀងរាល់ថ្ងៃសិស្សក្រីក្រមួយចំនួន មករៀនមិនបានទៀងទាត់ពេលវេលាឡើយ ដោយសារទៅជួយសាមង ឬលើក លប ជាមួយឪពុកម្តាយ ពេលខ្លះដល់ម៉ោង៨ព្រឹកទើបមកដល់សាលា។ ចំណែកគ្រូបង្រៀនវិញបច្ចុប្បន្នក៏មានការខ្វះខាតមធ្យោបាយ ទូកសម្រាប់ធ្វើដំណើរមកបង្រៀនសិស្សផងដែរ។ គាត់ក្នុងនាមអាជ្ញាធរភូមិឆ្នុកទ្រូ និងនាយកសាលាបឋមសិក្សាយុគន្ធ សំណូមពរ ឯកឧត្តម លោកជំទាវ លោក លោកស្រី និងសប្បុរសជន នៅទីជិតឆ្ងាយ សូមមេត្តាជួយឧបត្ថម្ភ សៀវភៅ ប៊ិច ដល់សិស្សដែលកំពុងមានការខ្វះខាតដោយសេចក្តីអនុគ្រោះផងចុះ។ បើអាចបានសូមមេត្តាជួយសំបកទូកបាឡាស្មាច់ ធុនតូច១គ្រឿងដែលមានតម្លៃប្រមាណ៣០០ដុល្លារ ចំណែកម៉ាស៊ីនសម្រាប់លើទូកពួកលោកគ្រូៗមានហើយ ខ្វះតែសំបកទូកបាឡាតែប៉ុណ្ណោះ៕
ចែករំលែកព័តមាននេះ