រាជធានីភ្នំពេញ ៖ ស្ត្រីវ័យក្មេងម្នាក់ត្រូវបានមិត្តភក្តិនិយាយថាមានវិបត្តិស្នេហា ដោយនាងស្រឡាញ់បុរសម្នាក់ដែលជាប្តីគេ ហើយត្រូវប្រពន្ធគេតាមរករឿងដល់កន្លែងស្នាក់នៅរបស់នាង ធ្វើឱ្យទទួលរងនូវភាពអាម៉ាស់ខណៈរូបនាងក៏ត្រូវចាញ់បោកបុរសមិនស្មោះនឹងស្នេហា ។ ដោយសារមានរឿងបែបនេះកើតឡើង ទើបធ្វើឱ្យនាងខូចចិត្តក៏បានផឹកទឹកត្នោតជូរជាមួយមិត្តភក្តិរហូតស្រវឹងជោក បន្ទាប់មកបានមកលោតទឹកបឹងតាម៉ាតដែលមានជម្រៅជាង១០ម៉ែត្រប៉ុនប៉ងសម្លាប់ខ្លួន តែត្រូវបានមិត្តភក្តិលោតចុះទៅជួយស្រង់ទាន់ និងដឹកចេញពីកន្លែងកើតហេតុយ៉ាងប្រញាប់ប្រញាល់បំផុត ។
ហេតុការណ៍នេះបានកើតឡើងកាលពីវេលាម៉ោង៤និង៤៥នាទីរសៀលថ្ងៃទី២៥ វិច្ឆិកា នៅបឹងតាម៉ាតស្ថិតនៅក្នុងភូមិសំបួរ សង្កាត់ដង្កោ ខណ្ឌដង្កោ ។ ស្ត្រីរូបនោះត្រូវបានគេស្គាល់ថា ឈ្មោះយ៉ា អាយុប្រហែល២០ឆ្នាំ ដែលតាមការអះអាងថា នាងបម្រើការងារនៅហាងខារ៉ាអូខេរស្មីភ្នំពេញ និងស្នាក់នៅផ្ទះជួលក្បែរនោះ ។ តាមប្រភពព័ត៌មានបានឱ្យដឹងថា នៅមុនពេលកើតហេតុគេបានឃើញស្ត្រីម្នាក់នេះជិះម៉ូតូបីគ្រឿងជាមួយមិត្តភក្តិ៤នាក់ទៀត ក្នុងនោះមានស្ត្រីពីរនាក់ទាំងរូបនាងផងទៅឈប់នៅក្បែរចំណុចខាងលើ ។ ពេលទៅដល់ពួកគេជជែកគ្នាលេង លុះមួយសន្ទុះក្រោយមកស្រាប់តែស្ត្រីម្នាក់នោះបានរត់សំដៅទៅកាន់បឹងតាម៉ាតនោះ រួចក៏បានលោតទឹកប៉ងសម្លាប់ខ្លួនតែម្តង ។
ស្ត្រីរូបនេះរួមជាមួយមិត្តភក្តិសុទ្ធតែស្រវឹងទឹកត្នោតជូរដូចគ្នា ឯការព្យាយាមលោតទឹកសម្លាប់ខ្លួននោះត្រូវបានមិត្តភក្តិរបស់នាងនិយាយប្រាប់គេឯងនៅទីនោះថា នាងមានវិបត្តិស្នេហាជាមួយនឹងបុរសម្នាក់ដែលមានប្រពន្ធរួចទៅហើយ ដែលកន្លងមកបុរសនោះធ្លាប់ជួយផ្គត់ផ្គង់ដល់រូបនាងទៀតផង ។ ប៉ុន្តែចំណងស្នេហានោះត្រូវបានប្រពន្ធគេដឹង ហើយតាមទៅរករឿងនាងម្នាក់នេះដល់កន្លែងស្នាក់នៅ ទើបបានជានាងខូចចិត្តនិងខ្មាសគេក៏សម្រេចចិត្តលោតទឹកប៉ងសម្លាប់ខ្លួនបែបនេះតែម្តង ។
ទោះជាយ៉ាងណា ពេលនោះត្រូវបានមិត្តភក្តិប្រុសម្នាក់ដែលទៅជាមួយលោតចុះទៅជួយ ប៉ុន្តែអ្នកដែលលោតទឹកចុះទៅជួយនោះមិនសូវចេះហែលទឹកទៀត និងស្ទើរតែលង់ទឹកស្លាប់ខ្លួនឯងទៀតផងជាសំណាងល្អបានមិត្តភក្តិម្នាក់ផ្សេងទៀតលោតចុះទៅជួយបន្តទើបរួចផុតពីសេចក្តីស្លាប់ទាំងអស់គ្នា ។ បន្ទាប់មក ពួកគេបាននាំគ្នាចាកចេញពីកន្លែងកើតហេតុយ៉ាងប្រញាប់ប្រញាល់បំផុត ។
ទាក់ទិនទៅនឹងរឿងរ៉ាវខាងលើ គឺគ្រាន់តែជាការរៀបរាប់មនុស្សមួយក្រុមដែលអះអាងថា ជាមិត្តភក្តិរបស់នាងម្នាក់នោះតែប៉ុណ្ណោះ ។ ឯការពិតបែបណានោះគេមិនទាន់បានដឹងច្បាស់ឡើយ ព្រោះស្ត្រីមានវិបត្តិនោះមិនបាននិយាយអ្វីទាំងអស់ ដោយនាងគិតតែពីយំក្រោមការចោមរោមមើលពីមនុស្សរាប់សិបនាក់ ។ តាមមើលទៅនាងហាក់មានវិបត្តិយ៉ាងចាក់ស្រេះបំផុត ទើបសម្រេចចិត្តគិតខ្លីចង់ធ្វើបែបនេះ ៕
ចែករំលែកព័តមាននេះ