រាជធានីភ្នំពេញ ៖ នៅល្ងាចថ្ងៃសៅរ៍ ទី៦ មករា ឆ្នាំ២០១៨ ស្អែកនេះ ស្ថានីយទូរទស្សន៍ប៉ុស្ដិ៍លេខ៥ នឹងបើកការប្រដាល់ជាលក្ខណៈអន្តរជាតិទៀតហើយនៅក្នុងទីតាំងរបស់ខ្លួនដែលស្ថិតនៅព្រែកកំពិស ម្ដុំព្រែកហូរជាយរាជធានីភ្នំពេញ បន្ទាប់ពីសង្វៀនមួយនេះទើបតែជម្រើសបានជើងខ្លាំងកម្ពុជា២រូបក្នុងចំណោម៣២រូបឱ្យត្រៀមប្រកួតដណ្ដើមជើងឯក។
កីឡាករកម្ពុជា គឺ អាំង សំអាត នឹងក្លាយជាសមាសភាពរបស់កម្ពុជាតែមួយរូបគត់ ដែលនឹងស្វាគមន៍ការប្រកួតអន្តរជាតិមួយនេះជាមួយកីឡាករថៃ ខណៈដែលការប្រកួតទាំងមូលក៏នឹងកាន់តែមានការចាប់អារម្មណ៍ថែមទៀត ដោយសារតែក្រៅពីការប្រកួតជាលក្ខណៈអន្តរជាតិរបស់កីឡាករទាំងពីរ ក៏មានការប្រកួតមិត្តភាពរវាងកីឡាករជើងខ្លាំងកម្ពុជា៤រូបដើម្បីឱ្យអ្នកមានឈ្មោះប្រកួតណ្ដើមជើងឯកបានសម្រាកសន្សំកម្លាំង។
ការប្រកួតដែលនឹងចាប់ផ្ដើមឡើងពីម៉ោង៥ល្ងាចស្អែកនេះ មានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលថ្ងៃសម្រាក ដែលជាថ្ងៃមនុស្សម្នានៅតំបន់ព្រែកកំពិសនោះនិយមមកទស្សនាកកកុញ ស្របគ្នាដែលនៅប៉ុស្ដិ៍លេខ៥ក៏មានកំណើនអ្នករស់នៅច្រើនឡើងព្រោះតែសំណង់បុរីព្រោងព្រាតនោះផង ។
កីឡាករកម្ពុជា និងថៃ២រូប គឺអាំង សំអាត និងជើងខ្លាំងមកពីប្រទេសថៃ Yorth Pupha នឹងក្លាយជាគូប្រកួតស៊ីសាច់ហុតឈាមជាមួយគ្នានៅក្នុងថ្ងៃនោះ ។ អ្នករៀបចំការប្រកួតបានអះអាងថា នៅក្នុងថ្ងៃនោះកីឡាករកម្ពុជាចំនួន៤រូបក៏ត្រូវប៉ះគ្នាក្នុងលក្ខណៈមិត្តភាព ដើម្បីឱ្យវគ្គជម្រុះរបស់កីឡាករដែលទើបតែនៅសល់២នាក់ចុងក្រោយបានសម្រាក ។
ការប្រកួតជាលក្ខណៈអន្តរជាតិនៅសប្ដាហ៍នេះ កីឡាករកម្ពុជា និងថៃ សុទ្ធតែបានអះអាងថា មានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះរៀងខ្លួន និងមិនចង់បាត់បង់ក្រេឌីតក្រោយពេលប៉ះគ្នា ។ មួយគូនេះ មានការចាប់អារម្មណ៍ភាគច្រើនថានឹងមានអ្នកស្នេហាវិស័យប្រដាល់ជក់ចិត្ត ដោយសារជាបទពិសោធន៍ កីឡាករ អាំង សំអាត មិនសូវឡើងវាយលាក់ដៃស្រាប់ហើយ ។
លោក សេង កដិកា អ្នករៀបចំការប្រកួតប្រចាំនៅទូរទស្សន៍ប៉ុស្ដិ៍លេខ៥បានថ្លែងប្រាប់ថា ដោយសារតែកីឡាករដែលមានឈ្មោះឡើងដណ្ដើមយកខ្សែក្រវាត់ក្នុងព្រឹត្តិការណ៍ប្រដាល់នោះត្រូវបានអនុញ្ញាតឱ្យសម្រាកមួយសប្ដាហ៍ ទើបការប្រកួតក្នុងសប្ដាហ៍នេះ ត្រូវកំណត់ឱ្យកីឡាករជាលក្ខណៈជាតិ និងជាតិប៉ះគ្នា ហើយឱ្យកីឡាករកម្ពុជា អាំង សំអាត ជាជើងខ្លាំងដែលធ្លាប់មានឈ្មោះបោះសំឡេងឡើងប្រកួតមិត្តភាពជាមួយកីឡាករថៃ ។
បើទោះជាកីឡាករកម្ពុជាត្រូវប្រឈមនឹងកីឡាករថៃល្អជាគូប្រកួតក៏លោកនៅតែប្រកាសថា អាំង សំអាត គឺជាជើងខ្លាំងដែលមានសមត្ថភាព ដែលអាចរំពឹងខ្លាំង ។ គេត្រូវប៉ះប្រកួតជាមួយកីឡាករថៃឈ្មោះ Yorth Pupha ក្នុងនាមជាគូឯកអន្តរជាតិ ដោយការប្រកួតរបស់ពួកគេក៏មានការចាប់អារម្មណ៍មិនតិចអមដោយការប្រកួតរបស់ជើងខ្លាំង៤រូបនៅថ្ងៃនោះដែរ។
លោកថា ជំនួបរវាងពួកគេមិនមែនជារឿងធម្មតានោះទេ ដោយសារអ្នកណាឈ្នះក្រៅពីទទួលបានទឹកប្រាក់ច្រើនហើយ ក៏ទទួលបានទំនុកចិត្តពីអ្នកគាំទ្រដូចគ្នា ។ ផ្ទុយទៅវិញ បើចាញ់មិនខុសពីបាក់មុខ និងមានការរិះគន់ធ្ងន់ធ្ងរនោះទេ ហើយនឹងធ្លាក់ចេញពីការទុកចិត្តរបស់អ្នកគាំទ្រដោយស្វ័យប្រវត្តិ ។ លោកថា ជំនួបរបស់ពួកគេត្រូវដាក់យ៉ាងពិសេសសម្រាប់ថ្ងៃសៅរ៍សប្ដាហ៍បើកឆាកខែនេះតែម្ដង ។ លោកថា កីឡាករ អាំង សំអាត អាចចាត់ទុកថាជាជើងខ្លាំងម្នាក់នៅលើសង្វៀនប្រដាល់អន្តរជាតិមួយនេះ ដែលជាព្រឹត្តិការណ៍ចម្រុះតែកីឡាករខ្លាំងៗនៅក្នុងពិភពប្រដាល់ ។
លោកជឿជាក់ថា កីឡាកររូបនេះ នឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក ទើបលោកយល់ថា ជំនួបអាំង សំអាត ជាមួយកីឡាករជាដៃគូពិតជាមិនធម្មតាសម្រាប់ការប្រកួតទាំងមូល ។ លោកនិយាយថា ជើងខ្លាំងកម្ពុជារូបនេះនៅតែចាត់ទុកថាជាជើងខ្លាំងនៅលើសង្វៀន ទើបលោករំពឹងខ្ពស់សម្រាប់ការប្រកួតរបស់គេ ។ កីឡាករថៃដែលត្រូវប្រកួតជាមួយ អាំង សំអាត លោកថាធ្លាប់ប្រកួត៨១លើក ឈ្នះ៦៤លើក ចាញ់១៧លើក និងមិនដែលស្មើក្នុងពេលដែលកីឡាករកម្ពុជាធ្លាប់ប្រកួតរហូតដល់៨១លើក ឈ្នះ៦៦លើក ចាញ់១៣លើក និងស្មើ២លើក ។
សម្រាប់ការប្រកួត៤នាក់ជាលក្ខណៈមិត្តភាពនោះវិញ រួមមានកីឡាករ លាប សំណាង ត្រូវប្រកួតជាមួយកីឡាករ សៀវ ង៉ុយ ដោយអ្នកទាំងពីរសុទ្ធតែជាអ្នកឆ្នើមៗដូចគ្នា ។ លោកសេង កដិកា បញ្ជាក់ថា ការប្រកួតគូនេះ ម្នាក់ៗមានការត្រៀមទុកសម្បើមណាស់ ដោយសារតែអ្នកដែលទទួលបានជ័យជម្នះ នឹងមានឱកាសកាន់តែច្រើននៅក្នុងព្រឹត្តិការណ៍ប្រដាល់អន្តរជាតិក្នុងនាមជាគូឯក ហើយទទួលបានតម្លៃខ្លួនខ្ពស់ ។ លោកថា ការប្រកួតរបស់ពួកគេនៅមិនទាន់ដឹងថា អ្នកណាល្អជាងអ្នកណានោះទេ ក្នុងពេលដែលភាគីម្ខាងៗសុទ្ធតែអះអាងថា ត្រូវតែឈ្នះឱ្យបានដាច់ខាត ។ លោកចាត់ទុកថា អ្នកទាំងពីរគឺជាធនធានកីឡាករដ៏កម្រដែលមានសមត្ថភាពខ្ពស់នៅក្នុងសង្វៀនប្រដាល់។
សម្រាប់មួយគូប្រកួតទៀត គឺកីឡាករ រឿម វណ្ណៈ ជាមួយនឹងកីឡាករ ភុន សោភ័ណ្ឌ ដោយអ្នកទាំងពីរក៏ជាបេក្ខភាពត្រូវប្រកួតជាលក្ខណៈមិត្តភាពផងដែរ ខណៈដែលអ្នកទាំងពីរសុទ្ធតែបានប្រកាសថា មិនអាចចាញ់ដូចគ្នា ។ សម្រាប់សង្វៀនទូរទស្សន៍អាស៊ីអាគ្នេយ៍ ក៏មានការប្រកួតជាលក្ខណៈអន្តរជាតិផងដែរ ទាំងថ្ងៃសៅរ៍ និងថ្ងៃអាទិត្យ ទាំង៥សង្វៀន ៕
ចែករំលែកព័តមាននេះ