រាជធានីភ្នំពេញ ៖ យោងតាមរបាយការណ៍របស់ក្រសួងពាណិជ្ជកម្ម បានឱ្យដឹងថា ការនាំចូលទំនិញកសិកម្មពីប្រទេសចិនបានថយចុះជាង២លានដុល្លារ បើធៀបនឹងឆ្នាំ២០១៦ ។ របាយការណ៍បានឱ្យដឹងទៀតថា ការនាំចូលទំនិញកសិកម្មពីប្រទេសចិន បានចុះបីឆ្នាំជាប់គ្នា…
រាជធានីភ្នំពេញ ៖ យោងតាមរបាយការណ៍របស់ក្រសួងពាណិជ្ជកម្ម បានឱ្យដឹងថា ការនាំចូលទំនិញកសិកម្មពីប្រទេសចិនបានថយចុះជាង២លានដុល្លារ បើធៀបនឹងឆ្នាំ២០១៦ ។
របាយការណ៍បានឱ្យដឹងទៀតថា ការនាំចូលទំនិញកសិកម្មពីប្រទេសចិន បានចុះបីឆ្នាំជាប់គ្នា កាលពី២០១៥ ការនាំចូលមានចំនួន ១១.៤៧២.៧០១ដុល្លារ ។ ដោយឡែកឆ្នាំ២០១៦ បានថយមក១០.៦៧២.៥៨៤ដុល្លារ ខណៈឆ្នាំ២០១៧កន្លងទៅនេះ ការនាំចូលមានត្រឹមតែ៧.៣៣៩.៦៩៦ប៉ុណ្ណោះ ។
ទំនិញកសិកម្មដែលកម្ពុជាបាននាំពីប្រទេសចិន រួមមាន សាច់ស្រស់ ផលនេសាទ ទឹកដោះ និងផលិតផលពីទឹកដោះ បន្លែស្រស់ ផ្លែឈើស្រស់ ស្រូវសាឡី និងទំនិញកសិកម្មផ្សេងទៀត។
ការថយចុះនៃការចូលទំនិញកសិកម្មនេះ ទំនងអាចមកភាពរីកចម្រើននៃវិស័យកសិកម្មនៅកម្ពុជា ដែលកាលពីមុន បន្លែ ផ្លែឈើ ដែលបានដាំដុះត្រឹមតែជាលក្ខណៈគ្រួសារ និងបំពេញតម្រូវការនៅក្នុងស្រុក ប៉ុន្តែបច្ចុប្បន្ន កម្ពុជាមិនត្រឹមតែមានលទ្ធភាពក្នុងការផ្គត់ផ្គង់ក្នុងស្រុកប៉ុណ្ណោះទេ ថែមទាំងបានធ្វើការនាំចេញផលិតផលកសិកម្មរបស់ខ្លួនទៅក្រៅប្រទេសទៀតផង ។
នៅក្នុងវេទិកាស្តីពីវិស័យកសិកម្ម រុក្ខាប្រមាញ់ និងនេសាទ កាលពីថ្ងៃទី៣ មករា កន្លងមកនេះ ក្រសួងកសិកម្មបានបញ្ជាក់ពីចក្ខុវិស័យរបស់រាជរដ្ឋាភិបាលគឺការធ្វើទំនើបកម្មវិស័យកសិកម្ម ដោយប្រែក្លាយពីដំណាក់កាលអភិវឌ្ឍន៍តាមបែបវិបុលវប្បកម្ម និងតាមបែបប្រពៃណី ឈានទៅរកដំណាក់កាលតាមបែបប្រពលវប្បកម្ម ដោយផ្អែកលើបច្ចេកទេសថ្មីៗ ការស្រាវជ្រាវ ការផ្សព្វផ្សាយ ការធ្វើយន្តូបនីយកម្ម ការបង្កើនសមត្ថភាពស្រោចស្រព ដើម្បីលើកកម្ពស់ផលិតភាព ពិពិធភាវូបនីយកម្មដំណាំ និងកសិផលផ្សេងៗ រួមទាំងការចិញ្ចឹមសត្វ និងវារីវប្បកម្ម ការគ្រប់គ្រងដីធ្លីប្រកបដោយប្រសិទ្ធភាព ព្រមទាំងការធានាចីរភាពបរិស្ថាន និងធនធានធម្មជាតិ ។
វេទិកានេះបានពិភាក្សា និងពិចារណាធ្វើប្រតិភូកម្មបន្ថែមដល់មន្ទីរកសិកម្ម រុក្ខាប្រមាញ់ និងនេសាទ និងការពង្រឹងការទទួលខុសត្រូវរបស់មន្ទីរ ក៏ដូចជាអាជ្ញាធរមូលដ្ឋាន ការគាំទ្រនិងជំរុញដល់SMEsក្នុងការទទួលឥណទាន ជាពិសេសពីធនាគារSMEs ដែលនឹងបង្កើតនាពេលឆាប់ៗខាងមុខ ការជំរុញបន្ថែមដល់ការងារទីផ្សារកសិផលដោយវិស័យឯកជន និងពង្រឹងការគ្រប់គ្រងសហគមន៍ព្រៃឈើក្នុងការដាំដំណាំកសិ-ឧស្សាហកម្ម និងចិញ្ចឹមសត្វផងដែរ ។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានថ្លែងបញ្ជាក់ពីគោលនយោបាយរបស់រាជរដ្ឋាភិបាលក្នុងការអភិវឌ្ឍសេដ្ឋកិច្ចជាតិដែលជំរុញកំណើនសេដ្ឋកិច្ចជាតិក្នុងរង្វង់៧%ជាង១ទសវត្សរ៍កន្លងមក ដែលធ្វើឲ្យប្រទេសកម្ពុជាក្លាយជាប្រទេសមានចំណូលមធ្យមកម្រិតទាប និងការអភិឌ្ឍវិស័យកសិកម្ម ៕
ចែករំលែកព័តមាននេះ