រាជធានីភ្នំពេញ ៖ បច្ចុប្បន្នវិស័យកាត់ដេរ និងសេវាកម្មទេសចរណ៍ ជាចំណែកមួយធំនៅក្នុងការជំរុញកំណើនសេដ្ឋកិច្ចជាតិ ក៏ប៉ុន្តែសេដ្ឋវិទូមួយចំនួនបានផ្ដល់ជាយោបល់ថា កម្ពុជាមិនគួរនៅរក្សាស្ថានភាពនៅដដែលបែបនេះទៀតទេ ពោលគឺកម្ពុជាមិនគួរនៅតែពឹងផ្អែកលើវិស័យកាត់ដេរ ដែលជាវិស័យស្នូលនៅពេលបច្ចុប្បន្នទេ តែគួរងាកមកផលិតរបស់ណាដែលអាចលក់បានតម្លៃខ្ពស់ ដើម្បីនាំចេញទៅកាន់ទីផ្សារអន្តរជាតិ។ ក្នុងន័យនេះ មិនមែនឲ្យកម្ពុជាបោះបង់ចោលវិស័យឧស្សាហកម្មកាត់ដេរនោះដែរ ។
លោកបណ្ឌិត សុក ស៊ីផាណា ទីប្រឹក្សារាជ រដ្ឋាភិបាលកម្ពុជា មានប្រសាសន៍ថា បច្ចុប្បន្ន មូលដ្ឋានសេដ្ឋកិច្ចរបស់កម្ពុជា មានវិស័យកាត់ដេរ សំណង់ និងទេសចរណ៍ ក៏ប៉ុន្តែនៅថ្ងៃអនាគតកម្ពុជា មិនអាចនៅតែពឹងលើវិស័យទាំងប៉ុន្មាននេះទេ ។ កម្ពុជាត្រូវជំរុញកម្មន្តសាល ហើយកម្មន្តសាលនេះ គឺត្រូវផលិតនូវផលិតផលដែលមានតម្លៃខ្ពស់ ។
លោកបណ្ឌិតនិយាយថា ៖« យើងមិនអាចនៅតែរក្សាការដេរសម្លៀកពាក់ ដេរស្បែកជើងនោះទៀតទេ ព្រោះផលិតផលទាំងនេះវាមានតម្លៃទាប ដូចនេះយើងត្រូវបង្កើតសាលាបង្រៀនបច្ចេកទេស បច្ចេកវិទ្យា ដើម្បីបណ្ដុះបណ្ដាលជំនាញ ហើយនៅពេលដែលយើងមានធនធានកាន់តែច្រើននោះ វិនិយោគិននឹងមកបណ្ដាក់ទុន និងផលិតនូវអ្វីដែលមានតម្លៃលក់ខ្ពស់ » ។
លោកបណ្ឌិតបន្តថា ការវិវត្តទៅរកការផលិតរបស់ដែលមានតម្លៃខ្ពស់ មិនត្រឹមតែចំណេញដល់ការនាំចេញនោះទេ ក៏ប៉ុន្តែវាក៏បានផ្ដល់ផលចំណេញដល់កម្មករដែលមានជំនាញកម្ពុជាផងដែរ ហើយវាក៏ជាការលើកទឹកចិត្តដល់សិស្សនិស្សិតដែលចេញពីសាលាបណ្ដុះបណ្ដាល ដោយមិនចាំបាច់ពិបាកស្វែងរកការងារធ្វើទៀតនោះឡើយ ។
លោកបណ្ឌិតបន្ថែមថា បច្ចុប្បន្ននេះរាជរដ្ឋាភិបាលកម្ពុជាបានខិតខំស្វែងរកកិច្ចសហការជាបន្តបន្ទាប់ជាមួយបណ្ដាប្រទេសនៅក្នុង និងក្រៅតំបន់។ ជាក់ស្ដែងរយៈពេលជាង២ឆ្នាំមកនេះ កម្ពុជាបានចូលរួមកិច្ចសហការជាមួយបណ្ដាប្រទេសមហាអនុតំបន់មេគង្គ ដើម្បីបើកច្រកមួយសម្រាប់កម្ពុជាទទួលវិនិយោគិនបន្ថែមទៀត ។
លោកបណ្ឌិតនិយាយថា ៖« កិច្ចសហការមេគង្គឡានឆាងគឺមានប្រយោជន៍ធំណាស់ សម្រាប់កម្ពុជា ហើយប្រយោជន៍ដែលធំ និងសំខាន់នោះ គឺការបង្កើតការងារឲ្យកូនខ្មែរ តែអ្វីដែលកូនខ្មែរខំប្រឹងដោយខ្លួនឯងនោះ គឺត្រូវមានជំនាញផ្ទាល់ខ្លួនសម្រាប់ធ្វើការងារ ដែលមានតម្លៃខ្ពស់ជាងការងារនាពេលបច្ចុប្បន្ន »។
លោក ឈាង វណ្ណារឹទ្ធ ស្ថាបនិក និងជាអនុប្រធានក្រុមប្រឹក្សាភិបាលនៃវិទ្យាស្ថានកម្ពុជាសម្រាប់សិក្សាយុទ្ធសាស្ត្រ បានឲ្យដឹងផងដែរថា កម្ពុជាមានទីផ្សារក្នុងស្រុកតូចនៅឡើយ។ ជាក់ស្ដែងបច្ចុប្បន្ននេះ ទីផ្សារក្នុងស្រុកកម្ពុជាមានត្រឹមតែជាង១៥លាននាក់ប៉ុណ្ណោះ ដូចនេះកម្ពុជាត្រូវតែជំរុញការនាំចេញទៅកាន់បណ្ដាប្រទេសជាច្រើនទៀត ក្នុងនោះក្នុងតំបន់អាស៊ាន ។
លោកនិយាយថា ៖« នៅក្នុងបរិបទសមាហរណកម្មសេដ្ឋកិច្ចអាស៊ាន គឺត្រូវមានការនាំចេញនិងនាំចូល ដូចនេះដើម្បីឲ្យទំហំនៃការនាំចេញរបស់យើងមានទឹកប្រាក់ច្រើន យើងត្រូវផលិតនូវអ្វីដែលមានតម្លៃខ្ពស់ »។
បើតាមទស្សនៈរបស់ធនាគារពិភពលោក ក៏បានបញ្ជាក់ផងដែរថា កម្ពុជាគួរងាកទៅរកការផលិតនូវផលិតផលណាដែលមានតម្លៃខ្ពស់ ដើម្បីនាំចេញ ។ ការផលិតនូវរបស់ដែលថ្លៃៗសម្រាប់នាំចេញ វានឹងផ្ដល់ផលប្រយោជន៍ដល់កម្មករ និយោជិត និងប្រទេសជាតិទាំងមូល ។
ក្រសួងពាណិជ្ជកម្មកម្ពុជាក៏បាននិងកំពុងចរចាជាមួយបណ្ដាប្រទេស៥ ក្នុងសហគមន៍អាស៊ីអឺរ៉ុប ក្នុងការផ្ដល់អនុគ្រោះពន្ធនាំសម្រាប់ផលិតផលអាវរងារ ដែលជាផលិតផលមានតម្លៃខ្ពស់ ។ បើសិនជាកិច្ចចរចានេះបានសម្រេច ពេលនោះវិនិយោគិនបរទេសនឹងសម្រុកមកបណ្ដាក់ទុនផលិតអាវរងារនេះ ដើម្បីផ្គត់ផ្គង់ទៅប្រទេសទាំង៥ ក្នុងសហគមន៍អាស៊ីអឺរ៉ុប ហើយតម្លៃពលកម្មក្នុងស្រុករបស់កម្ពុជានឹងកាន់តែទទួលបានចំណូលខ្ពស់ផងដែរ ៕
ចែករំលែកព័តមាននេះ