រាជធានីភ្នំពេញ ៖ សហព័ន្ធកីឡាបេស្បលខ្មែរក៏ដូចជាសហព័ន្ធកីឡាផ្សេងទៀត សុទ្ធតែបានត្រៀមខ្លួនរួចជាស្រេចទាំងមន្ត្រីបច្ចេកទេស និងអត្តពលិកដើម្បីចូលរួមប្រកួតកីឡាជាតិលើកទី២ នៅចុងខែឧសភា ឆ្នាំ២០១៨ ខាងមុខនេះ ។ លោក…
រាជធានីភ្នំពេញ ៖ សហព័ន្ធកីឡាបេស្បលខ្មែរក៏ដូចជាសហព័ន្ធកីឡាផ្សេងទៀត សុទ្ធតែបានត្រៀមខ្លួនរួចជាស្រេចទាំងមន្ត្រីបច្ចេកទេស និងអត្តពលិកដើម្បីចូលរួមប្រកួតកីឡាជាតិលើកទី២ នៅចុងខែឧសភា ឆ្នាំ២០១៨ ខាងមុខនេះ ។
លោក ញ៉ែម ថារី ប្រធានសហព័ន្ធកីឡាបេស្បលខ្មែរ បានឱ្យដឹងថា ការប្រកួតកីឡាជាតិលើកទី២ឆ្នាំ២០១៨នេះ សហព័ន្ធបានត្រៀមអត្តពលិករបស់ខ្លួនរហូតដល់ទៅ១៥ក្រុម ខណៈសព្វថ្ងៃនេះសហព័ន្ធមានអត្តពលិកដែលជាសមាជិកតែចំនួន១០ក្រុមប៉ុណ្ណោះ។
ទោះជាយ៉ាងណាសហព័ន្ធនឹងខិតខំប្រឹងប្រែងប្រមែប្រមូលកីឡាករ កីឡាការិនីនៅតាមបណ្ដាខេត្តនានាទូទាំងប្រទេសឱ្យបាន៥ក្រុមបន្ថែមទៀត ដើម្បីបង្គ្រប់ឱ្យបាន១៥ក្រុមតាមការរំពឹងទុក ។
ព្រឹត្តិការណ៍ប្រកួតកីឡាជាតិលើកទី២ឆ្នាំ២០១៨គឺជាព្រឹត្តិការណ៍កីឡាដ៏សំខាន់មួយ ដើម្បីស្វែងរកកីឡាករ-កីឡាការិនីវ័យក្មេងដែលមានសក្ដានុពល ក៏ដូចជាដើម្បីពង្រឹងសមត្ថភាព បច្ចេកទេសអត្តពលិកវ័យក្មេងទាំងនោះឱ្យបានគ្រប់គ្រាន់ សម្រាប់ត្រៀមប្រកួតប្រជែងដណ្ដើមយកមេដាយពីការប្រកួតកីឡាលើឆាកអន្តរជាតិនានាក៏ដូចជាត្រៀមប្រកួតនៅក្នុងព្រឹត្តិការណ៍កីឡាស៊ីហ្គេមឆ្នាំ២០២៣ដែលកម្ពុជាទទួលធ្វើជាម្ចាស់ផ្ទះ ។
សព្វថ្ងៃនេះ សហព័ន្ធកីឡាបេស្បលខ្មែរបានខិតខំប្រើប្រាស់គ្រប់មធ្យោបាយដើម្បីកៀងគររកអ្នកឧបត្ថម្ភពីខាងក្រៅប្រទេសដើម្បីឱ្យគេជួយដល់កីឡាប្រភេទថ្មីមួយនេះឱ្យកាន់តែរីកចម្រើន និងកាន់តែមានការអភិវឌ្ឍថែមមួយកម្រិតទៀត ។ ទោះជាយ៉ាងណាចំណុចសំខាន់គឺ សហព័ន្ធខិតខំបណ្ដុះបណ្ដាលកីឡាករវ័យក្មេងៗឱ្យបានច្រើនបន្ថែមទៀត ព្រោះថា កីឡាករថ្នាលគឺជាគោលដៅ សំខាន់ដែលក្រសួងអប់រំ យុវជន និងកីឡា ក៏ដូចជារាជរដ្ឋាភិបាលកំពុងជំរុញឱ្យមានការកែទម្រង់ស៊ីជម្រៅទាំងសមត្ថភាព បច្ចេកទេស និងធនធានកីឡាករបូករួមទាំងការងាររដ្ឋបាលផងដែរ៕
ចែករំលែកព័តមាននេះ