រាជធានីភ្នំពេញ ៖ ព្រឹត្តិការណ៍ប្រកួតប្រដាល់ដណ្ដើមខ្សែក្រវាត់គោជល់ក្នុងប្រភេទទម្ងន់៦៩គីឡូក្រាមនៅលើសង្វៀនស៊ីអិនស៊ីនៅសល់ប្រហែលជាង១សប្ដាហ៍ទៀតប៉ុណ្ណោះនឹងឈានចូលដល់វគ្គផ្ដាច់ព្រ័ត្រហើយគឺនៅថ្ងៃសៅរ៍ ទី១៣ មករា ខាងមុខនេះ ។
ការប្រកួតលើកនេះ រឿង សោភ័ណ្ឌ ជើងខ្លាំងប្រចាំក្លិបមកុដរាជសីហ៍ ដែលត្រូវប្រកួតជាមួយកីឡាករថៃឈ្មោះ អូប៉ ស.ថវីស៊ីត ដណ្ដើមខ្សែក្រវាត់ជើងឯកគោជល់និងប្រាក់រង្វាន់៥ពាន់ដុល្លារអាមេរិកបានសម្ដែងក្ដីបារម្ភយ៉ាងខ្លាំងដោយសារតែរបួសចង្កេះរបស់គេមិនទាន់ជាសះស្បើយនៅឡើយ ។
កីឡាករទាំងពីរឡើងមកដល់វគ្គនេះដោយសារបានយកឈ្នះគូប្រកួតរៀងខ្លួននៅវគ្គពាក់កណ្ដាលផ្ដាច់ព្រ័ត្រកាលពីថ្ងៃសៅរ៍ ទី៣០ ធ្នូ កន្លងទៅនេះ ដោយរឿង សោភ័ណ្ឌ បានយកឈ្នះកីឡាករថៃឈ្មោះហ្វាមាំងកន ស៊ីតប៉ានសក្ដិ ដោយពិន្ទុ ចំណែកកីឡាករថៃអូប៉ ស.ថវីស៊ីតវិញបានផ្ដួលកីឡាករថៃដូចគ្នាឈ្មោះណាត់ថាក់គាត ប្រាណឈុំភុន ឱ្យសន្លប់នៅត្រឹមទឹកទី៤ ។ ទោះបីរឿង សោភ័ណ្ឌ ធ្លាប់យកឈ្នះពិន្ទុកីឡាករអូប៉ ស.ថ.វីស៊ីត នៅក្នុងវគ្គប្រកួតជម្រុះម្ដងរួចមកហើយក្ដី ក៏ជ័យជម្នះនោះត្រូវគេមើលឃើញថាទទួលបានទាំងវេទនាបំផុត ។
ជាក់ស្ដែងរឿង សោភ័ណ្ឌ បង្ហើបថា កីឡាករថៃម្នាក់នេះពិតជាល្អមួយចប់តែម្ដងទាំងកម្ពស់និងកម្លាំងឡើងទៅដែលធ្វើឱ្យគេពិបាកទប់ទល់បំផុត ។ ប៉ុន្តែភាពខ្លាំងរបស់គូប្រកួតទាំងអស់នេះមិនជាបញ្ហាទេ អ្វីដែលធ្វើឱ្យរូបគេព្រួយបារម្ភខ្លាំងនោះគឺខ្លាចជំងឺថ្លោះចង្កេះរបស់គេដែលចាប់ផ្ដើមធ្វើទុក្ខខ្លាំងពេលកំពុងហាត់សមជាមួយមិត្តរួមអាជីពកាលពីជាងកន្លះខែមុន ។ពេលប្រកួតនៅវគ្គពាក់កណ្ដាលផ្ដាច់ព្រ័ត្រ គេប្រើតែស្នៀតកណ្ដាប់ដៃសុទ្ធសាធតែម្ដង ព្រោះស្នៀតជើងមិនអាចប្រើការបានឡើយ ដូច្នេះសម្រាប់ការប្រកួតនៅវគ្គផ្ដាច់ព្រ័ត្រជាមួយកីឡាករថៃនាពេលឆាប់ៗខាងមុខ គេមានជំនឿចិត្តក្នុងការយកឈ្នះត្រឹមតែ៥០%ប៉ុណ្ណោះ ។
សព្វថ្ងៃនេះ គេព្យាយាមស្វែងរកការព្យាបាលស្ទើរតែគ្រប់កន្លែងអស់ហើយទាំងគ្រូពេទ្យនិងគ្រូខ្មែរ តែរហូតមកដល់ពេលនេះទៅហើយអាការថ្លោះចង្កេះនេះហាក់មិនទាន់ធូរស្រាលនៅឡើយ ។ បើដល់ពេលហើយមិនទាន់ជាទៀតអាចនឹងប៉ះពាល់ដល់ការប្រកួតមិនខាន ។
គួរបញ្ជាក់ថា រឿង សោភ័ណ្ឌ ជាអ្នកប្រដាល់ជើងចាស់មួយរូបដែលខ្លាំងខាងប្រើកណ្ដាប់ដៃផ្ដួលគូប្រកួតជាពិសេសកណ្ដាប់ដៃឆ្វេងរបស់គេវាយចេញម្ដងៗបង្កគ្រោះថ្នាក់ខ្លាំងណាស់ បើគូប្រកួតបណ្ដោយឱ្យគេវាយត្រូវច្បាស់ជាស៊យធំមិនខាន ។ ទោះបីគេមិនសូវបានកម្ពស់ តែការប្រើស្នៀតជើងទាត់របស់គេក៏មិនអាចមើលស្រាលបានដែរព្រោះពេលទាត់ចេញលឿននិងសំដៅសុទ្ធតែកញ្ចឹងកតែម្ដង។ដូច្នេះបើសិនជាគេមិនអាចប្រើស្នៀតជើងបាន គឺត្រូវខាតបង់ដល់ទៅ៥០% រីឯ៥០%ទៀតគឺសំអាងតែលើស្នៀតកណ្ដាប់ដៃមួយមុខប៉ុណ្ណោះ ។
រឿង សោភ័ណ្ឌ គិតចាប់តាំងពីឆ្នាំ២០១៣មក គេធ្លាប់ដណ្ដើមបានខ្សែក្រវាត់ចំនួន៥រួចមកហើយ ។ នៅឆ្នាំ២០១៣ដណ្ដើមខ្សែក្រវាត់ស្រាបៀរកម្ពុជាក្នុងប្រភេទទម្ងន់៦៣,៥គីឡូក្រាម ។ នៅឆ្នាំ២០១៤និង២០១៥ដណ្ដើមបានខ្សែក្រវាត់ចំនួន២ក្នុងប្រភេទទម្ងន់៦៧គីឡូក្រាមនៅប្រទេសបារាំង ។ នៅឆ្នាំ២០១៦ដណ្ដើមបានខ្សែក្រវាត់ជើងឯកគោជល់នៅលើសង្វៀនស៊ីអិនស៊ីក្នុងប្រភេទទម្ងន់៦៧គីឡូក្រាម ។ នៅឆ្នាំ២០១៧ក្នុងព្រឹត្តិការណ៍ប្រកួតគុនខ្មែរអន្តរជាតិដែលរៀបចំធ្វើនៅក្នុងវិមានពហុកីឡដ្ឋានជាតិ រឿង សោភ័ណ្ឌដណ្ដើមបានខ្សែក្រវាត់ជើងឯកមួយទៀត ។
បើទោះជាការប្រកួតមុនៗរឿង សោភ័ណ្ឌ ធ្លាប់ធ្វើឱ្យគូប្រកួតញាក់សាច់ជាបន្តបន្ទាប់ក្ដី ក៏សម្រាប់ការប្រកួតជាមួយកីឡាករថៃអូប៉ ស.ថវីស៊ីតនៅវគ្គផ្ដាច់ព្រ័ត្រដណ្ដើមខ្សែក្រវាត់គោជល់ខាងមុខនេះ គេបែរជាបង្ហាញនូវការព្រួយបារម្ភដោយសារបញ្ហាថ្លោះចង្កេះទៅវិញ ។
ទោះបីយ៉ាងណា អ្នកគាំទ្រសង្ឃឹមថា ដល់ថ្ងៃប្រកួតបញ្ហាថ្លោះចង្កេះរបស់រឿង សោភ័ណ្ឌ នឹងជាសះស្បើយអាចឱ្យគេវាយអស់ពីសមត្ថភាពដណ្ដើមយកខ្សែក្រវាត់ជើងឯកគោជល់បានជាក់ជាមិនខាន ៕
ចែករំលែកព័តមាននេះ