រាជធានីភ្នំពេញ ៖ ការលក់រថយន្តថ្មីបានកើនឡើងខ្ពស់ក្នុងឆ្នាំ២០១៧ ស្របពេលការទិញរថយន្តបង់រំលស់កាន់តែមានប្រជាប្រិយភាពខ្លាំងឡើងពីមួយឆ្នាំទៅមួយឆ្នាំ ។
លោក សេង វឹង អគ្គនាយកផ្នែកបច្ចេកទេសយានយន្តនៃក្រុមហ៊ុន RMA Asia បានថ្លែងឲ្យដឹងតាមទូរស័ព្ទនាថ្ងៃទី៣ មករា ថា ការនាំចូលរថយន្តជជុះបានថយចុះកាលពីឆ្នាំមុន ដោយសារអ្នកនាំចូលបានសម្រុកនាំចូលមុនពេលរាជរដ្ឋាភិបាលដំឡើងពន្ធ ដែលធ្វើឲ្យការនាំចូលរថយន្តថ្មីកើនឡើងក្នុងរង្វង់២០% ហើយចំនួនរថយន្តថ្មីចរាចរលើដងផ្លូវបានកើនរហូតដល់ចន្លោះពី១៣ទៅ១៧%នៃរថយន្តសរុប ។
លោកបន្តថា ជាមួយនឹងកំណើនសេដ្ឋកិច្ចកើនឡើង និងជីវភាពប្រជាពលរដ្ឋមានភាពល្អប្រសើរ ការលក់រថយន្តរបស់ RMA បានកើនឡើងប្រមាណ៣០%ផងដែរ ។
លោកបន្តថា ៖« ការកើនឡើងនៃការលក់ ដោយសាររថយន្តទំនើបរបស់យើង គួបផ្សំនឹងប្រាក់ចំណូលប្រជាពលរដ្ឋកើនឡើង ក៏ដូចជាការពេញនិយមទិញរថយន្តដោយបង់រំលស់ » ។
លោកបន្តថា ៖« បច្ចុប្បន្ន ប្រជាជនមិនចង់ចំណាយលុយទាំងដុលទិញរថយន្តទេ ដោយពួកគេទុកលុយពង្រីកមុខរបរដទៃទៀត ហើយបានសម្រេចចិត្តទិញរថយន្តបង់រំលស់»។
លោក សេង វឹង បានបន្តថា ប្រសិនជាគិតពីឆ្នាំ២០១៨នេះ លោកនៅតែមានសុទិដ្ឋិនិយម សម្រាប់ទីផ្សាររថយន្តនៅកម្ពុជា ប៉ុន្តែនេះជាការប្រមើលមើលពីឥឡូវប៉ុណ្ណោះ លោកគិតថា ស្ថានភាពនយោបាយនឹងនៅតែមានលំនឹង គ្មានអ្វីគួរឲ្យបារម្ភទេ ។
នាយកផ្នែកទីផ្សារ និងលក់នៃក្រុមហ៊ុនតូយ៉ូតា ខេមបូឌា លោក លី ប៊ុនហៃ បានមានប្រសាសន៍ស្រដៀងគ្នាថា ការលក់រថយន្តកាលពីឆ្នាំមុនមានសញ្ញាល្អប្រសើរ ធៀបនឹងឆ្នាំ២០១៦ ដោយក្រុមហ៊ុនសម្រេចបានកំណើនលក់ចន្លោះពី២០ទៅ៣០% ។ លោកបន្តថា សម្រាប់ឆ្នាំ២០១៨នេះ លោកនៅតែមានសុទិដ្ឋិនិយម ដោយសារសេដ្ឋកិច្ច និងប្រាក់ចំណូលរបស់ប្រជាពលរដ្ឋនៅតែរក្សាបានកំណើនល្អប្រសើរ និងស្ថានភាពនយោបាយគ្មានអ្វីគួរឲ្យចាប់អារម្មណ៍ ។
លោកបន្តថា ៖« ឆ្នាំ២០១៨ ខ្ញុំគិតថា អ្វីៗនឹងប្រសើរឡើង ព្រោះយើងអ្នករកស៊ី មិនសូវគិតពីបញ្ហានយោបាយទេ យើងគិតពីសេដ្ឋកិច្ច បើសេដ្ឋកិច្ចល្អ យើងនៅតែបន្តរីកចម្រើន »។លោកបន្តថា ៖« ការលក់រថយន្តកើនឡើងមួយផ្នែក ដោយសារប្រជាពលរដ្ឋបានទិញរថយន្តបង់រំលស់កាន់តែច្រើន ព្រោះពួកគេគិតពីការដាំលុយ ។ ដូច្នេះ ពួកគេមិនយកលុយទាំងដុំទៅទិញរថយន្តទេ ពួកគេទុកលុយរកស៊ី វាជាការដាំលុយ ឬធ្វើឲ្យលុយកើតកូន » ។
ប្រធាននាយកប្រតិបត្តិធនាគារអេស៊ីលីដា ភីអិលស៊ី លោកបណ្ឌិត អ៊ិន ចាន់នី បានថ្លែងថា ឥណទានសម្រាប់ទិញវត្ថុ ឬរបស់របរប្រើប្រាស់កំពុងកើនឡើង ប៉ុន្តែវាមិនទាន់ឈានដល់ចំណុចគ្រោះថ្នាក់នោះទេ ។ លោកបន្តថា ឥណទានប្រើប្រាស់ជាប្រភេទឥណទានមិនជួយដល់សេដ្ឋកិច្ចទេ ព្រោះឥណទានបែបនេះមិនបង្កើតឲ្យមានសកម្មភាពសេដ្ឋកិច្ចឡើយ ផ្ទុយទៅវិញ វាជាឥណទានបំណុល ជាការទិញបំណុល ។ លោកបន្តថា ៖ «ឥណទានបែបនេះ បើកើនឡើងខ្លាំងពេក វាផ្តល់គ្រោះថ្នាក់ដល់សេដ្ឋកិច្ចជាតិ ប៉ុន្តែនៅកម្ពុជាមិនទាន់ឈានដល់កំណើនខ្ពស់នោះទេ » ៕
ចែករំលែកព័តមាននេះ